Músika ta un bunita regalo di Yehova. E por animá nos i influensia nos pensamentu i emoshonnan. Sin duda, esei ta loke ta pasa ora nos skucha nos kantikanan, manera esnan di JW Broadcasting. De echo, e kantikanan akí por asta yuda nos hala mas serka di Yehova.

 Desde aña 2014, nos a produsí mas ku 70 kantika, i por lo ménos un di e kantikanan ei ta disponibel na mas ku 500 idioma. Pero kisas bo ta puntra bo mes: ‘Ken ta traha riba e kantikanan akí, i kon nan ta ser produsí?’

 Bou di supervishon di Komité di Siñansa di Kuerpo Gobernante, rumannan ku ta produsí músika den Departamento di Oudio/Vidio ta traha riba kantika manera esnan di JW Broadcasting. Den e departamento tin 13 ruman ku ta traha riba e kantikanan ei. Nan ta hasi vários trabou, manera skèdjel, komponé músika i usa instrumento i teknologia pa krea zonido. Ademas, Komité di Siñansa a duna permiso pa usa rumannan rònt mundu ku ta traha komo boluntario for di kas pa yuda ku e trabou akí. Entre nan tin kompositor, músiko i kantante. E rumannan akí humildemente ta usa nan talentonan sin ku nan ta haña rekonosementu.

 Kon nan ta produsí kantika? Promé, Komité di Siñansa ta disidí riba ki teksto di Beibel e kantika mester ta basá i kon e mester laga e oyente sinti. Despues, e rumannan den Departamento di Oudio/Vidio ku ta traha riba kantika ta disidí ken ta bai komponé e músika i ken ta bai skirbi e letranan. Nan ta hasi un grabashon inisial, i Komité di Siñansa ta skuch’é i duna nan mas sugerensia. Despues, nan ta ahustá e kantika i ta graba e vershon final. Nan ta graba e kantikanan akí na diferente lugá, manera na sukursal i kas di rumannan ku tin ekipo pa graba.

 Pa komponé i graba kantika, nos rumannan ta usa diferente programa di kòmpiuter. Ademas, nan tin mester di instrumènt, ekipo pa meskla zonido, amplifier, spiker i mikrofon. Kada mikrofon por kosta entre 100 pa 1.000 dòler òf mas. Na aña 2020, nos a usa mas ku 116.000 dòler pa kumpra ekipo pa graba músika.

 Kiko nos ta hasi pa spar plaka? En bes di tin hopi ruman na Bètel ku ta produsí músika, ta usa hopi boluntario ku ta traha for di kas. Ademas, en bes di laga hopi músiko bini huntu pa graba, nos rumannan ta usa un programa di kòmpiuter pa krea zonido di vários instrumènt.

 E rumannan ta gusta skucha nos kantikanan. Tara, ku ta biba na Alemania, a bisa: “E kantikanan ta yuda mi relahá ora mi ta sinti mi preokupá òf anshá. Ora mi skucha nan na mi mes idioma, mi ta sinti komo si fuera ta un brasa mi ta haña for di Yehova.” Ruman Dmitry di Kazakstan a bisa: “Mi gusta ku mi por skucha e kantikanan sin ku mi mester pone atenshon pa wak si nan ta di akuerdo ku prinsipio di Beibel òf nò. Ademas, e kantikanan ta yuda mi enfoká riba kos spiritual.”

 Delia, di Suráfrika, a bisa kon e ta sinti tokante e kantikanan: “E kantikanan akí ta fortalesé mi fe. Ora mi ta sinti mi desanimá òf mi tin ku trata ku un situashon difísil, semper tin un kantika ku por animá mi. Hopi biaha, mi ta djis skucha e músika, i mi ta sinti mi mihó!”

 Pa algun hende, e kantikanan akí a bira nan faborito. Lerato, di Suráfrika, a bisa: “E kantikanan ‘Djis Tras di Porta’ i ‘Nos Dushi Paradeis’ ta yuda mi imaginá e tempu ku mi por yama mi mama bon biní atrobe. Kada bes ku mi skucha e kantikanan ei, mi ta mir’é ta kore bini serka mi ku brasa habrí.”

 Un di e kantikanan akí a ègt yuda un ruman muhé hóben na Sri Lanka. El a bisa: “Mi maestra di siensia a trata mi malu dilanti di tur e otro studiantenan djis pasobra mi ta un Testigu di Yehova. Mi a haña miedu, i mi no tabata sa kiko pa bisa. Ora mi a yega kas, mi mama a animá mi pa skucha e kantika ‘Studia i Meditá.’ E kantika a yuda mi mira ku mi mester a hasi investigashon i prepará un kontesta. E siguiente dia, mi a papia ku mi maestra. El a skucha mi i bisa mi ku awor e ta komprondé e kreensianan di Testigunan di Yehova mihó. Mi ta gradisí Yehova su organisashon pa duna nos kantikanan asina animante.”

 Unda nos ta haña e plaka ku ta nesesario pa produsí e kantikanan akí? E donashonnan ku rumannan ta hasi na e obra mundial ta hasi esei posibel. Mayoria di e donashonnan ei ta ser hasí via donate.pr418.com. Danki pa boso donashonnan generoso.