Kada aña, un kantidat di ruman ku ta den sirbishi spesial di tempu kompleto ta haña invitashon pa bai Skol Bíbliko di Galaad di Watchtower, ku ta keda na Sentro Edukativo di Watchtower na Patterson, New York. a Na e skol ei, e studiantenan ta siña kon nan por bira mas efisiente den nan asignashonnan den e organisashon di Yehova. E entrenamentu ei ta yuda nan fortalesé i stabilisá e kongregashonnan i e sukursalnan rònt mundu.

 Skol di Galaad ta berdaderamente un skol internashonal. Por ehèmpel, e di 147 klas, ku a tuma lugá na aña 2019, tabatin 56 studiante for di 29 pais. E studiantenan ku ta bai Galaad ya tabata sirbi den algun forma di sirbishi spesial di tempu kompleto, sea komo bètelita, misionero, pionero spesial òf superintendente di sirkuito.

 Preparashon pa e lèsnan ei a kuminsá hopi tempu promé ku e skol kuminsá. Departamento di Biahe na Sede Mundial ta kumpra pasashi pa e rumannan ku a haña invitashon pa bai e skol. E averahe di gastu pa kada studiante di e di 147 klas di Skol di Galaad ida i buèlta pa Patterson a sali 1.075 dòler merikano. E studiantenan di Islanan Sálomon mester a tuma kuater vuelo pa nan yega Patterson i tres vuelo pa bai bèk nan pais, biahando un total di 35.400 kilometer! E vuelonan ei a kosta 2.300 dòler pa persona. Pa redusí e gastunan, Departamento di Biahe na sede mundial ta usa un sierto programa di kòmpiuter ku ta buska pasashi na preis rasonabel. I asta ora e pasashi ta di buk kaba, e programa ta keda chèk pa siman i asta luna despues pa wak si preis di un pasashi a baha. E departamento ta usa tambe deskuento den forma di krédito di biahe ku a risibí komo donashon pa kubri e pasashinan.

 Hopi studiante tin mester di visa pa por drenta Merka. Pa logra esei, Departamento di Asuntu Legal na Sede Mundial ta yuda e studiantenan haña visa. E averahe di gastu pa hasi esei ta 510 dòler pa persona.

 Kon nos ta benefisiá di e entrenamentu ku e studiantenan ei ta haña? Hendra Gunawan, un ansiano na Zùitost Asia, ta den kongregashon huntu ku un pareha ku a gradua di Skol di Galaad. E ta konta: “Anteriormente no tabatin niun ruman ku ta pionero regular den nos kongregashon. Pero despues ku un pareha ku a gradua di Skol di Galaad a bini den nos kongregashon, nan zelo i nan spiritu boluntario a motivá otro ruman pa nan tambe kuminsá traha pionero. Mas despues, un ruman muhé den nos kongregashon a asta asistí na Skol pa Predikadó di Reino!”

 Sergio Panjaitan ta traha na un Bètel na Zùitost Asia huntu ku algun ruman ku a gradua di Skol di Galaad. E ta konta: “E entrenamentu ku nan a haña no ta djis un bendishon pa nan; el a bira un bendishon pa nos tambe. Nan a siña masha hopi kos mes. Pero na lugá di sinti nan superior na otro hende, nan ta kla pa kompartí loke nan a siña. I e animashon spiritual ei ta keda pasa di un ruman pa otro.

 Kon nos ta kubri e gastunan di Skol di Galaad? Nos ta hasi esei ku yudansa di e donashonnan pa nos obra mundial. Hopi di e donashonnan ei ta tuma lugá via e métodonan ku tin riba nos website, bou di donate.pr418.com. Nos ta gradisí boso pa boso kontribushonnan generoso ku, entre otro, ta sostené e skol internashonal akí.