“No hopi tempu pasá, nos no por a imaginá ku nos lo a haña alimento spiritual den forma digital.” Abo ta di akuerdo ku e palabranan ei? Nan tabata parti di un diskurso animante ku Ruman Geoffrey Jackson a duna den e Informe #6 di 2020 di Kuerpo Gobernante. El a sigui bisa: “Anto awor nos ta puntra nos mes, ta kon nos lo hasi den e pandemia akí sin hèrmènt manera JW Library? Atraves di aña, Yehova a bini ta prepará nos pa nos ta kla pa un situashon asin’akí.”

 Kon Yehova a prepará nos? Kiko tur mester a hasi pa krea e app JW Library, i kiko ta nesesario pa mantené e app al dia i mehor’é?

 Na mei 2013, Kuerpo Gobernante a puntra MEPS Programming, un departamento di sede mundial, pa krea un app ku ta kontené e edishon revisá di Tradukshon di Mundu Nobo na ingles. Paul Willies, kende ta traha den e departamento di MEPS Programming, a bisa: “Nunka promé, nos no a yega di krea un app ku lo ta disponibel pa download via aparatonan elektróniko. Pa logra esei, nos mester a forma un tim, stòp di traha riba algun proyekto i traha huntu ku otro departamento di Bètel. Nos a hasi hopi orashon, i ku Yehova su yudansa e app tabata disponibel sinku luna despues na e reunion anual.”

 Despues tabatin un otro reto, nos mester a kombertí e app JW library den un biblioteka kompleto ku mas publikashon i disponibel na mas idioma. Na yanüari 2015, mayoria di nos publikashonnan na ingles tabata disponibel den e app, i apénas seis luna despues, hende por a download e publikashonnan ei den sientos di idioma.

 Desde e tempu ei, nos rumannan a mehorá e app den vários manera. Por ehèmpel, nan a agregá vidio, nan a pone tur material ku nos tin mester pa reunion na un lugá, i nan a hasi posibel pa nos por mira informashon for di e Guia pa Buska Informashon ora nos ta lesa un versíkulo di Beibel.

 JW Library ta ser habrí riba 8 mion aparato elektróniko tur dia i riba mas ku 15 mion aparato elektróniko tur luna! Kiko ta nesesario pa asina e app por sigui traha bon riba e aparatonan ei? Ruman Willies ta splika: “E trabou akí nunka ta keda kla. Konstantemente nos ta trahando pa agregá mas kos na e app i pa hasi e app mas fásil pa hende usa. Komo ku e operating systems riba nos aparatonan elektróniko ta keda update, nos tambe tin ku sigui update JW Library pa e sigui funshoná riba e aparatonan ei. Ademas, nos mester sigui mantené i mehorá nos software interno segun ku e kantidat di publikashon i grabashon riba e app JW Library ta sigui oumentá.” Aktualmente tin mas o ménos 200.000 publikashon i mas ku 600.000 grabashon di oudio i vidio disponibel riba JW Library na diferente idioma!

 Pa mantené e app al dia, no ta solamente ekipo di kòmpiuter ta nesesario. Ta nesesario tambe pa kumpra lisensia pa vários software. Un lisensia so ta kosta $1.500 (U.S.) pa aña. Ademas, MEPS Programming ta usa mas o ménos $10.000 (U.S.) tur aña riba aparatonan elektróniko di diferente marka pa hasi sigur ku e app lo sigui traha bon riba kòmpiuter, tablèt i telefòn nobo.

 Danki na e app JW Library, nos ta usa hopi ménos plaka pa prent i transportá publikashon. Tuma por ehèmpel e foyeto Analisá e Skritura Tur Dia. Nos a imprimí kasi 12 mion ehemplar di e edishon di 2013. Pero pa e edishon di 2020, nos a imprimí apénas sinku mion ehemplar—aunke nos tabatin mas o ménos 700.000 publikadó mas rònt mundu. Kiko a kambia? Awor, hopi di nos rumannan ta lesa e teksto di dia riba JW Library. a

 E app JW Library ta yuda nos den vários manera. Geneviève, kende ta biba na Canada, ta sinti ku e app a yud’é studia Beibel mas regular. El a bisa: “Si mi mester a sinta saka yen di buki pa mi por a studia Beibel, mi no ta kere ku lo mi hasié tur mainta. Pero ku e app, mi tin ku djis kohe mi tablèt i mi tin tur loke mi tin mester den mi man. Komo ku awor mi ta studia Beibel regularmente, mi fe a bira mas fuerte, i mi a hala mas serka di Yehova.”

 E app tabata hopi útil durante e pandemia di COVID-19. Charlyn, kende ta biba na Merka, ta splika: “Ku e pandemia di COVID-19 tur rònt di nos, mi no a mira un di nos publikashonnan imprimí pa mas ku un aña. Pero ku e app JW Library, nos por a haña tur loke nos tabatin mester pa keda spiritualmente fuerte, i mi ta gradisidu na Yehova pa e provishon amoroso akí.”

 Hopi hende ta sinti meskos ku Faye, ku ta biba na Filipinas. El a bisa: “E app akí ta tremendo, e tin tur loke mi tin mester pa keda pegá ku Yehova. Mi ta us’é pa lesa mainta trempan, pa skucha algu animante miéntras ku mi ta hasi kos rònt di kas, pa prepará pa reunion i pa studia Beibel. Den mi tempu liber, mi ta us’é pa wak vidio. I ora mi tin ku warda un kaminda, mi ta us’é pa lesa artíkulo òf Beibel. E ta balioso.”

 E app ta hopi balioso tambe den sirbishi. Por ehèmpel, un ruman muhé na Kamerun kier a usa un teksto ku el a skucha un otro ruman muhé usa algun siman promé. Sinembargo, e no por a kòrda e teksto. El a splika: “Ta bon mes mi por a kòrda un frase for di e teksto. Mi a habri e app, bai na Beibel, i mi a buska e frase. Mesora mi a haña e teksto. Ku e app, mi por haña hopi teksto ku tin biaha mi ta lubidá.”

 Boso donashonnan generoso usando e métodonan deskribí na donate.pr418.com a yuda nos krea, mantené i mehorá e app JW Library pa nos rumannan rònt mundu. Danki pa boso generosidat.

1. Òktober 2013—E app ku e revishon di Tradukshon di Mundu Nobo na ingles a bira disponibel

2. Yanüari 2015—Otro publikashon a bira disponibel na ingles i despues na vários otro idioma

3. Novèmber 2015—A bira posibel pa marka den e app

4. Mei 2016—A agregá e sekshon pa reunion

5. Mei 2017—A bira posibel pa skirbi nota den e app

6. Desèmber 2017—A agregá Beibel pa Estudio na ingles

7. Mart 2019—A bira posibel pa download grabashon di oudio, pa wak vidio online i pa mira e referensianan di Guia pa Buska Informashon

8. Yanüari 2021—A agregá algun kos pa e kurso di Beibel Bo Por Disfrutá di Bida pa Semper!