Awor ku nos ta drentando aña 2023, nos tur ta deseá pa kos bai bon ku nos i ku nos famianan. Ki speransa nos tin ku kos lo bira mihó den futuro?

 Beibel ta duna nos bon notisia: Tur e problemanan ku nos ta enfrentá aworakí ta temporal i pronto e situashon na mundu lo drecha. Bon mirá, Beibel “a ser skirbí pa nos instrukshon, pa asina mediante . . . e konsuelo for di e Skritura nos por tin speransa.”—Romanonan 15:4.

•   Pa haña sa mas tokante e promesanan ku tin den Beibel, lesa e artíkulo: “Berdadero Speransa pa un Mihó Futuro.”

 Nos por kompará e speransa ku Beibel ta duna ku “un anker.” (Hebreonan 6:19) E speransa ei por duna nos bida stabilidat. Ademas, e speransa ei por yuda nos trata ku e problemanan ku nos tin aworakí, i e por yuda nos keda positivo i haña berdadero felisidat. Por ehèmpel:

•   Pa haña sa kon e speransa ku Beibel ta duna a yuda un hòmber ku tabatin un adikshon, wak e vidio: Mi Tabata Fadá di e Manera Ku Mi Tabata Biba.

•   Pa haña sa kon e speransa ku Beibel ta duna por konsolá nos ora un ser kerí di nos muri, wak e vidio: Konsuelo pa Hende Ku A Pèrdè un Ser Kerí den Morto.

 Hopi hende ta spera ku kos lo drecha den futuro, pero nan no tin niun garantia ku loke nan ta spera lo bira realidat. E promesanan di Beibel sí lo kumpli sigur. Kon nos por sa esei? Wèl, ta Yehova Dios a a primintí e kosnan ei, i Yehova “no por gaña.” (Tito 1:2) Ta Yehova so tin poder pa kumpli ku tur su promesanan; e por hasi “tur loke e ta deseá di hasi.”—Salmo 135:5, 6.

 Nos ta deseá pa abo tambe benefisiá di e speransa ku Beibel ta duna, un speransa ku lo bira realidat sigur. Pa bo por fortalesé bo konfiansa den e promesanan di Beibel, ta importante pa bo “analisá e Skritura.” (Echonan 17:11) Pa haña sa mas tokante e speransa ku Beibel ta duna, tuma un kurso di Beibel grátis. Kuminsá aña 2023 ku un bon speransa pa futuro!