Ora bo pensa riba un persona ku ta trata ku ansiedat, a kisas bo ta imaginá un persona ku tin asina tantu miedu ku e ta paralisá, un persona ku di baina por lanta for di kama mainta òf un persona ku ta papia konstantemente tokante su preokupashonnan.

 Ta bèrdat ku algun hende ta reakshoná asina ora nan ta trata ku ansiedat. Pero, algun investigashon ta mustra ku otro hende, spesialmente hende hòmber, por reakshoná na un manera diferente. Un investigashon ta mustra ku hende hòmber “ta mas lihé pa usa alkohòl i droga pa trata ku nan ansiedat. Pues, loke por parse un problema ku bebementu di mas, en realidat por ta un indikashon di ansiedat. I hopi bes hende hòmber ku ansiedat tin problema ku rabia i ta sinti nan iritá lihé.”

 Klaru ku no ta tur hende hòmber ta reakshoná meskos ora nan haña nan ku ansiedat. Pero sin importá kon un persona reakshoná, ansiedat ta un problema ku ta birando mas grandi den e “tempunan krítiko [akí ku ta] difísil pa trata kuné.” (2 Timoteo 3:1) Si bo tin problema ku ansiedat, kon Beibel por yuda bo?

 Beibel tin hopi konseho ku por yuda nos trata ku ansiedat. Ban wak tres ehèmpel.

1.  1. “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.”—Mateo 6:34.

    Loke esaki ta enserá: Lo ta mihó pa nos no preokupá demasiado tokante kos ku lo (òf lo no) pasa den futuro. Hopi bes, e kosnan ku nos tin miedu ku lo sosodé, no ta sosodé. Tin biaha kos por asta resultá mihó di loke nos a pensa.

    Loke bo por hasi: Pensa riba algun situashon den pasado kaminda bo a pensa ku algu malu lo pasa, pero e no a pasa. Despues, pensa riba bo situashon aktual, purba di ta realístiko i puntra bo mes: ‘Ki probabilidat tin ku e situashon akí lo bira un problema grandi?’

2.  2. “Heru ta mula heru, asina un hende ta mula kara di su amigu.”—Proverbionan 27:17.

    Loke esaki ta enserá: Otro hende por yuda nos trata ku nos ansiedat, pero nos mester laga nan. Kisas nan por duna nos konseho práktiko basá riba nan mes eksperensia. Probablemente nan por yuda nos mira e situashon for di un punto di bista diferente.

    Loke bo por hasi: Pensa riba un hende ku por duna bo bon konseho, manera un amigu ku a trata ku problema similar na loke abo ta pasando aden. Puntr’é kiko a yud’é i kiko no a yud’é.

3.  3. “Tira tur boso inkietut [òf, “preokupashonnan,” nota] riba dje, pasobra e ta interesá den boso.”—1 Pedro 5:7.

    Loke esaki ta enserá: Dios ta preokupá pa hende ku ta sufri. E ke pa nos hasi orashon tokante tur loke ta preokupá nos.

    Loke bo por hasi: Traha un lista di tur loke ta duna bo ansiedat. Despues, hasi orashon tokante kada un di e preokupashonnan ei i pidi Dios yuda bo trata ku nan.

 Beibel ta hasi mas ku djis duna konseho tokante kon pa trata ku ansiedat. E ta primintí ku den futuro tur nos preokupashonnan lo disparsé pa semper. Kon esei lo tuma lugá?

 E Reino di Dios lo kaba ku tur loke ta kousa ansiedat. (Revelashon 21:4) De echo, ora nos ta biba bou di e gobièrnu ei, nos lo no kòrda mes riba e kosnan ku ta kousa ansiedat i ku ta pone nos sufri.—Isaías 65:17.

 Esaki ta e futuro ku “e Dios ku ta duna pas” ke pa bo. (Romanonan 16:20) E ta bisa nos: “Mi sa e plannan ku mi tin pa boso, . . . plannan pa pas i no pa kalamidat, pa duna boso un futuro i un speransa.”—Yeremías 29:11.