SIGUI VIGILÁ!
Dikon Mundu Tin Asina Tantu Odio?—Kiko Beibel Ta Bisa?
Den notisia, nos ta tende hopi tokante guera i tokante hende ku ta sembra odio òf hasi kos violento kontra hende di otro kultura òf otro lugá.
“Pa motibu di e konflikto entre Israel i Gaza i pa motibu di hende ku ta promové odio i violensia, tin mas i mas komentario riba ret sosial di hende ku ta ekspresá odio kontra otro.”—The New York Times, 15 di novèmber 2023.
“Desde 7 di òktober, tin hopi mas hende ku ta ekspresá odio òf hasi kos violento pa motibu di prehuisio kontra hende di otro kultura òf lugá.”—Dennis Francis, presidente di Asamblea General di Nashonnan Uní, 3 di novèmber 2023.
Guera, violensia i ekspresá odio kontra hende di otro lugá òf kultura no ta nada nobo. De echo, Beibel ta papia tokante hende den pasado ku tabata “mek nan palabranan kruel manera flecha” i hende ku tabata promové guera i violensia. (Salmo 64:3; 120:7; 140:1) Sinembargo, Beibel ta bisa ku e odio ku nos ta wak awe ta un indikashon di algu signifikante.
Odio—Un indikashon di e tempu ku nos ta bibando aden
Beibel ta menshoná dos motibu pakiko odio ta algu asina komun awe.
1. El a papia tokante un periodo unda “amor di mayoria di hende lo fria.” (Mateo 24:12) Na lugá di mustra amor, en general hende lo hasi kos ku ta hiba na mas odio.—2 Timoteo 3:1-5.
2. E kantidat di odio ku tin awe ta debí na e influensia di Satanas, e Diabel. Beibel ta bisa ku “henter mundu ta den poder di e Malbado.”—1 Huan 5:19; Revelashon 12:9, 12.
Pero, Beibel ta bisa tambe ku pronto Dios ta bai eliminá e fuente di odio. Ademas di esei, Dios ta bai kura tur doló ku odio a kousa. Beibel ta primintí ku:
Dios lo “seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—Revelashon 21:4.