Presidente di World Bank Group a bisa lo siguiente den un rapòrt na yüni 2022: “Ekonomia di e paisnan rònt mundu ta enfrentando dos problema grandi: kosto di bida ta subiendo drástikamente, i ekonomia na vários pais no ta kresiendo muchu.”

 International Monetary Fund a bisa: “Preis di kombustibel i kuminda a subi rápidamente. Esei a afektá e paisnan ku tin poko entrada muchu mas tantu.”

 Beibel ta yuda nos komprondé dikon nos ta enfrentando e problemanan ekonómiko akí. Ademas, Beibel ta mustra nos kon nos por trata ku e problemanan ei, i e ta duna nos speransa ku den futuro lo tin un solushon pa tur problema ekonómiko.

•   Beibel ta yama e tempu ku nos ta biba aden “e último dianan.”—2 Timoteo 3:1.

•   Hesus a indiká ku durante e periodo akí lo sosodé kos spantoso, ‘esena spantoso.’ (Lukas 21:11) E echo ku preis di vários kos ta subi na un manera drástiko ta pone hende haña miedu. Hopi hende ta preokupá tokante futuro. Nan no sa si nan lo por sigui proveé pa nan famia.

•   Den Beibel, e buki Revelashon a bisa di antemano ku preis di kuminda lo sigui subi durante e tempu akí. E ta bisa: “Mi a tende un kos ku a zona manera un stèm, bisa . . . : ‘Solamente un kana di trigo pa e suèldu di henter un dia di trabou.’”—Revelashon 6:6, Beibel papiamentu koriente.

 Si bo ke haña sa mas tokante “e último dianan” i tokante e profesia di e buki Revelashon, wak e vidio Mundu A Kambia Desde 1914 i lesa e artíkulo “E Kuater Koredónan di Kabai—Ken Nan Ta?”

•   “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome.”—Isaías 65:21, 22.

•   “Lo tin abundansia di maishi den e tera, riba kabes di e serunan.”—Salmo 72:16.

•   “‘Pa motibu di e opreshon di e pobernan, pa motibu di e kehamentu di esnan den nesesidat, lo mi lanta awor,” SEÑOR ta bisa.”—Salmo 12:5.

 Pronto Dios lo pone un fin na e sistema ekonómiko inhustu akí, no na un pais so, sino rònt mundu. Pa mira kon esei lo sosodé, lesa e artíkulo na spañó: “Ta Posibel pa Bini ku un Sistema Ekonómiko Hustu?”

 For di awor, Beibel por yuda nos trata ku oumento di kosto di bida. Kon asina? Beibel ta siña nos na un manera práktiko kon pa usa plaka na un manera sabí. (Proverbionan 23:4, 5; Eklesiástes 7:12) Pa mas informashon, lesa e artíkulonan “Sea Responsabel ku Bo Plaka i ku Loke Bo Tin” i “Siña Kon pa Biba ku Ménos Sèn.”