Djadumingu, 20 di novèmber 2022, e Konferensia di Nashonnan Uní Tokante Kambio di Klima (COP27) a terminá. E nashonnan a sera un akuerdo importante, esta, pa duna yudansa finansiero na e paisnan mas pober ku lo no por trata ku e kalamidatnan ku ta surgi pa motibu di kambio di klima. Pero hopi hende no ta kere ku esei lo solushoná e problema di kambio di klima.

•   Dia 19 di novèmber 2022, António Guterres, sekretario general di Nashonnan Uní, a bisa: “Mi ta kontentu ku nos ta pone sèn un banda pa yuda e paisnan ku ta ser afektá pa motibu di kambio di klima, pero nos sa ku esei lo no ta sufisiente . . . Ta manera nos planeta ketu bai ta den sala di emergensia.”

•   Dia 20 di novèmber 2022, Mary Robinson, eks presidente di Irlanda i eks Komisario pa Derechonan Humano di Nashonnan Uní, a bisa: “E chèns ta grandi ku mundu lo eksperensiá kambio dramátiko den klima. Esei lo tin konsekuensia serio pa tur hende.”

 Spesialmente, e hóbennan ta preokupá tokante futuro di nos planeta. Sinembargo, e pregunta ta: E nashonnan lo por kooperá ku otro i asina kumpli ku nan promesa di solushoná e problemanan di kambio di klima? Kiko Beibel ta bisa?

 Beibel ta bisa ku apesar di trabou duru i esfuerso sinsero ku algun hende ta hasi, kualke progreso ku e nashonnan hasi pa kombatí e krísis klimatológiko lo ta limitá. Tin dos motibu dikon:

•   “Bo no por hasi stret loke ta trosí.”—Eklesiástes 1:15.

   Kiko esei ta enserá? E gobièrnunan no por hasi tur loke nan ta deseá di hasi pasobra Dios no a krea hende pa dirigí nan mes. (Yeremías 10:23) Asta si e nashonnan logra traha huntu, tòg nan lo no por resolvé e problemanan di mundu, ni kuantu esfuerso nan hasi.

•   “Pasobra hende lo stima nan mes, stima plaka, . . . nan lo no ta dispuesto pa sera ningun akuerdo.”—2 Timoteo 3:2, 3.

   Kiko esei ta enserá? Beibel ta bisa bon kla ku hopi hende den nos tempu lo ta egoista. Nan lo no ta dispuesto pa traha huntu pa mehorá bida di tur hende.

 Futuro di nos planeta no ta dependé di e promesanan ku e gobièrnunan ta hasi. Dios a sòru pa mundu tin un bon Gobernante, Hesukristu. Esaki ta loke Beibel ta bisa tokante Hesus:

•   “E gobernashon lo ta riba su skouder. Su nòmber lo ta Konsehero Maravioso, Dios Poderoso, Tata Eterno, Prens di Pas.”—Isaías 9:6.

 Hesus ta Rei di e Reino di Dios, òf gobièrnu den shelu. (Mateo 6:10) E tin poder, sabiduria i e deseo pa kuida nos planeta i tur su habitantenan. (Salmo 72:12, 16) Bou di Hesus su guia, e gobièrnu selestial akí lo stòp tur hende di “destruí e tera” i drecha tera su medio ambiente atrobe.—Revelashon 11:18, Beibel Santu; Isaías 35:1, 7.

 Pa mas informashon tokante e solushon permanente pa e kambio di klima destruktivo, lesa e artíkulo na spaño: “Kiko Beibel Ta Bisa Tokante Kambio di Klima i Nos Futuro?”