•   “China a indiká ku e aña akí e pais a eksperensiá e zomer di mas kayente i seku ku el a yega di registrá.”—e korant The Guardian, 7 di sèptèmber 2022.

•   “Pa di 5 aña konsekutivo, algun parti di Afrika lo sufri di un sekura teribel.”—UN News, 26 di ougùstùs 2022.

•   “Dos tersera parti di Europa ta konfrontando sekura ekstremo. Posiblemente, esaki lo ta e pió sekura raportá den 500 aña.”—BBC News, 23 di ougùstùs 2022.

 Hopi eksperto ta pronostiká ku lo tin mas sekura i ku e sekura lo bira pió. Tin speransa ku kos lo drecha den futuro? Kiko Beibel ta bisa?

 Hopi tempu di antemano, Beibel a bisa lo siguiente tokante nos tempu:

•   “Den un lugá tras di otro lo tin . . . skarsedat di kuminda.”—Lukas 21:11.

 Hopi biaha, sekura ta hiba na skarsedat di kuminda. Skarsedat di kuminda ta resultá den hopi sufrimentu i morto. E kosnan ei ta kumplimentu di profesia di Beibel.—Revelashon 6:6, 8.

 Beibel ta menshoná un di e kousanan prinsipal ku ta pone ku e problema di sekura ta birando pió. E ta bisa:

•   “No ta keda na hende pa dirigí su pasonan.”—Yeremías 10:23.

 Pues, hende no tin e kapasidat pa “dirigí [nan] pasonan,” esta, pa goberná nan mes. Hopi biaha, nan mal desishonnan ta kousa sekura i skarsedat di awa.

•   Mayoria di sientífiko ta pensa ku hende mes ta e kousa ku mundu ta bira mas kalor; p’esei, tin mas sekura rònt mundu.

•   Hopi hende awe ta golos pa plaka, i nan ta traha plan sin pensa tokante futuro. Nan echonan ta kaba ku e mondinan i kousa polushon. Golosidat ta hiba tambe na mal maneho di e rekursonan di nos planeta. Debí na tur e kosnan ei, nos ta kore riesgo di pèrdè algun fuente di awa sumamente importante.

 Sinembargo, Beibel ta duna nos speransa.

 Beibel ta primintí ku Dios lo trese un solushon pa e skarsedat di awa ku tin na mundu. Kon Dios lo hasi esei?

1.  1. Dios lo “kaba ku esnan ku ta kaba ku e tera.” (Revelashon 11:18) Lo e kaba ku e kousa di skarsedat di awa: hende malbado i golos ku ta hasi daño na nos medio ambiente.—2 Timoteo 3:1, 2.

2.  2. “Tera seku, kimá dor di solo, lo bira plas di awa.” (Isaías 35:1, 6, 7) Dios lo drecha e daño ku a tuma lugá pa motibu di sekura, i Dios lo laga nos planeta bira un Paradeis ku sufisiente awa pa tur hende.

3.  3. “Bo ta kuida tera;bo ta gòrd’é i hasié masha fruktífero.” (Salmo 65:9) Ora tera tin Dios su bendishon, tera lo tin abundansia di kuminda i awa limpi pa tur hende.