Bo a haña bo obligá ta biba ku ménos sèn pa motibu di krísis ekonómiko? Pandemia, desaster natural, problema polítiko i guera por kousa un krísis ekonómiko diripiente. Ta bèrdat ku ora bo pèrdè entrada diripiente, esei por duna bo hopi strès. Pero e konsehonan sabí ku tin den Beibel por siña bo biba ku ménos sèn.

 Prinsipio di Beibel: “Mi a siña e sekreto di keda kontentu . . . sea ku mi tin abundansia òf mi no tin nada.”—Filipensenan 4:12.

 Aunke lo bo tin ménos sèn ku promé, bo por siña adaptá na bo situashon finansiero nobo. Si bo aseptá bo situashon nobo i adaptá mesora, esei lo yuda tantu abo komo bo famia trata ku e situashon mihó.

 Buska pa sa si gobièrnu ta yuda hende den bo situashon òf si tin otro instansia humanitario ku ta brinda yudansa. Dal paso mesora pasobra e programanan di yudansa akí hopi biaha ta duna hende masha tiki tempu pa apliká pa yudansa.

 Prinsipio di Beibel: “Pa falta di konseho plannan ta frakasá, ma ku hopi konsehero nan ta wòrdu lográ.”—Proverbionan 15:22.

 Papia tokante boso situashon finansiero ku bo kasá i bo yunan. Bon komunikashon ta yuda tur hende den famia komprondé e situashon i apoyá e kambionan ku kisas lo mester hasi. Si henter e famia hasi esfuerso pa spar i no gasta sèn di mas, e plaka ku tin por bai mas largu.

 Prinsipio di Beibel: “Sinta kalkulá e gastu.”—Lukas 14:28.

 Ora un hende hañ’é obligá di biba ku ménos sèn, ta masha importante pa e sa unda tur su sèn ta bai. Pues, ta bon pa traha un budget. Promé, traha un lista di tur e entradanan ku bo ta spera di haña pa luna. Despues, anotá tur bo gastunan i e kosnan ku bo tin kustumber di kumpra, maske bo sa ku esakinan lo mester kambia. Purba di inkluí un montante riba bo lista di gastu pa bo spar pa ora bo haña bo ku gastu inesperá òf un emergensia.

 Tep: Ora bo ta traha bo lista di gastu, no lubidá di inkluí algun kos chikitu ku bo sa kumpra. Lo bo keda sorprendí kuantu sèn bo ta gasta na kos chikitu. Por ehèmpel, despues ku un hòmber a kaba di analisá su gastunan, el a realisá ku tur aña e tabata gasta sentenáres di dòler na bals!

 Prinsipio di Beibel: “Hasi sigur kiko ta e kosnan mas importante.”—Filipensenan 1:10.

 Kompará bo entrada ku bo gastunan i disidí kiko bo por eliminá òf kua gastu bo por baha pa bo no gasta mas di loke bo ta gana. Analisá e siguiente puntonan:

•   Transporte. Si bo tin mas ku un outo, bo por bende un di nan? Si bo tin un outo luhoso, òf masha karu, bo por kambi’é pa un outo mas ekonómiko? Òf bo por bende bo outo i usa transporte públiko òf un baiskel?

•   Entretenimentu. Bo por kanselá algun servisio ku bo ta paga p’e, manera servisio di streaming i di televishon? Bo por haña alternativa mas barata? Por ehèmpel, kisas biblioteka por fia bo pelíkula, buki elektróniko òf buki den vershon oudio.

•   Awa i koriente. Komo famia, analisá kon boso por baha e gastunan di awa, elektrisidat i kombustibel. Kisas pagamentu di lus i tumamentu di un baño mas kòrtiku ta parse insignifikante, pero si boso kultivá e kustumbernan ei, boso lo spar hopi plaka.

•   Kuminda. En bes di kome na restorant, kushiná na kas. Plania di antemano loke bo ta bai kushiná e próksimo dianan. Si por, kumpra kuminda na kantidat grandi i kome kuminda ku a sobra. Traha un lista di kompra i pega na bo lista. Evitá di kumpra junk food. Bo a yega di pensa di planta algun bèrdura na kas?

•   Paña. Kumpra un paña nobo solamente ora e paña ku bo tin no ta representabel mas. No kumpra paña djis pa bo ta na moda. Kumpra paña ku ta den baratio òf paña segunda mano. Seka bo pañanan na waya, si esei ta posibel. Esei lo yuda bo spar e plaka ku lo bo a gasta na koriente si bo a usa un mashin pa seka paña.

•   Kompra ku lo bo ke hasi den futuro. Promé ku bo kumpra algu, puntra bo mes: ‘Mi tin e sèn pa kumpr’é? Mi tin ègt mester di dje?’ Bo por usa bo wasmashin, bo aparatonan elektróniko òf bo outo un poko mas tantu tempu promé ku bo kumpra nobo? Di otro banda, bo por bende algun kos ku bo no ta usa mas òf ku bo no tin mester di dje mas? Hasiendo e kosnan akí, lo bo por baha bo gastunan i haña algun sèn èkstra.

 Tep: Ora bo entrada baha diripiente, kisas ta un bon momento pa stòp ku hábito ku ta kosta bo hopi sèn i ku ta malu pa bo salú, manera humamentu, wega di plaka òf bebementu di mas. Hasiendo e kambionan ei no solamente lo mehorá bo situashon finansiero, pero lo mehorá bo kalidat di bida tambe.

 Prinsipio di Beibel: “Felis ta esnan ku ta konsiente di nan nesesidat spiritual.”—Mateo 5:3.

 Beibel ta yuda nos tin un punto di bista balansá. E ta bisa: “Sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” (Eklesiástes 7:12) Nos por haña tal sabiduria den Beibel. Hopi hende a ripará ku e konsehonan ku tin den Beibel a yuda nan pa nan no bira demasiado anshá ora nan haña nan ku problema finansiero.—Mateo 6:31, 32.