SIGUI VIGILÁ!
E Guera na Ukrania Ta Kontribuí na Skarsedat di Kuminda Rònt Mundu
Dia 19 di mei 2022, mas ku 75 funshonario di alto rango a informá Konseho di Siguridat di Nashonnan Uní tokante e skarsedat di kuminda ku tin rònt mundu. E funshonarionan a indiká ku “esaki tabata un krísis kaba debí na COVID-19 i debí na kambio di klima. Pero awor, tin mas skarsedat debí na e guera na Ukrania. Rònt mundu, vários pais tin poko òf kasi niun kuminda.” Poko despues di esei, e korant The Economist a skirbi ku “e guera akí ta bai kousa hamber pisá na tur parti di mundu.” Beibel a bisa di antemano ku lo bai tin e tipo di krísisnan akí den nos tempu. Ademas, Beibel por yuda nos trata ku e krísisnan akí.
Beibel a bisa di antemano ku lo tin skarsedat di kuminda
Hesus a profetisá: “Nashon lo lanta kontra nashon i reino kontra reino, i lo tin skarsedat di kuminda.”—Mateo 24:7.
Revelashon ta papia tokante kuater koredó di kabai simbóliko. Un di e koredónan di kabai ta representá guera. E koredó ku ta bini despues di dje ta representá hamber. Esei ta referí na un tempu ku kuminda lo bira skars i preis di kuminda lo bira masha haltu mes. “Mi a mira un kabai pretu aparesé; esun sintá riba dje tabatin un balansa den su man. Mi a tende un kos ku a zona manera un stèm, bisa . . . : ‘Solamente un kana di trigo pa e suèldu di henter un dia di trabou i solamente tres kana di sebada pa e suèldu di henter un dia di trabou!’”—Revelashon 6:5, 6, Beibel papiamentu koriente.
E profesianan di Beibel akí tokante skarsedat di kuminda ta kumpliendo awor, den e tempu ku Beibel ta yama “e último dianan.” (2 Timoteo 3:1) Pa haña sa mas tokante “e último dianan” i e korementu di e kuater koredónan di kabai den e buki Revelashon, wak e vidio Mundu A Kambia Desde 1914 i lesa e artíkulo “E Kuater Koredónan di Kabai—Ken Nan Ta?”
Kon Beibel por yuda bo?
Beibel ta kontené hopi konseho práktiko ku por yuda nos trata ku situashon difísil, inkluso oumento di preis di kuminda òf asta skarsedat di kuminda. Pa algun ehèmpel, lesa e artíkulo “Siña Kon pa Biba ku Ménos Sèn.”
Beibel ta duna nos speransa ku e situashon lo mehorá. Beibel ta primintí ku lo tin un tempu ku “lo tin un abundansia di maishi den e tera” i tur hende lo tin kuminda na abundansia. (Salmo 72:16) Pa haña sa mas informashon tokante loke Beibel ta primintí pa futuro i dikon bo por konfia loke Beibel ta bisa, lesa e artíkulo na spañó: “Speransa pa un Mihó Futuro.”