Durante luna di yüli 2022, hopi pais rònt mundu a registrá temperatura haltu ku nunka promé nan no a yega di registrá:

•   “Pa kasi 70 stat na China, gobièrnu a saka e alerta di mas haltu pa un ola di kalor pisá. Esaki ta di dos biaha den un luna ku nan a saka e alerta ei.”—25 di yüli 2022, CNN Wire Service.

•   “Na tur parti di Europa temperatura a subi drástikamente, i esei a kousa kandela di mondi feros na hopi pais.”—17 di yüli 2022, e korant The Guardian.

•   “Riba djadumingu, vários stat na Merka a registrá temperatura haltu ku nunka promé nan no a yega di registrá. E ola di kalor inmenso akí a afektá Merka na parti ost i zùit i na parti sentral wèst.”—24 di yüli 2022, e korant The New York Times.

 Kiko tur e notisianan ei ta bisa nos? Nos por konkluí ku pronto hende lo no por biba riba tera mas? Kiko Beibel ta bisa?

 Sí. E olanan akí di kalor ku ta tumando lugá rònt mundu ta kuadra ku loke Beibel ta bisa tokante nos tempu. Por ehèmpel, Hesus a profetisá ku nos lo mira “esenanan spantoso,” òf “kosnan teribel.” (Lukas 21:11; Beibel na papiamentu koriente) E echo ku temperatura ta subiendo asina drástikamente ta spanta hopi hende. Esei ta asta pone nan pensa ku hende lo kaba ku nos planeta Tera.

 Nò. Dios a traha tera pa hende por biba riba dje pa semper. (Salmo 115:16; Eklesiástes 1:4) Dios lo no laga hende destruí tera. Mas bien, Dios a primintí ku lo e “kaba ku esnan ku ta kaba ku e tera.”—Revelashon 11:18.

 Wak e siguiente dos profesianan ku ta mustra kiko mas Dios ta primintí tokante nos planeta:

•   “Laga desierto i tera seku alegrá, mondi bira kontentu i floresé.” (Isaías 35:1, Beibel na papiamentu koriente) Dios lo no laga nos tera bira manera un desierto ku hende no por biba riba dje. Al kontrario, Dios lo restorá e áreanan ku hende a daña.

•   “Bo ta kuida tera; bo ta gòrd’é i hasié masha fruktífero.” (Salmo 65:9, Tradukshon di Mundu Nobo) Dios lo bendishoná tera, i tera lo bira un paradeis.

 Tin mas manera ku kambio di klima ta kumpli ku profesia di Beibel. Pa haña sa mas, lesa e artíkulo na spañó: “Kiko Beibel Ta Bisa Tokante Kambio di Klima i Nos Futuro?”

 Beibel tin mas promesa ku ta mustra kon Dios lo restorá medio ambiente. Pa haña sa mas, lesa e artíkulo na spañó: “Ken Lo Salba Nos Planeta?”