Kon Beibel Por Yuda Nos Tolerá Otro Hende?
“Sin toleransia no por tin pas.”—Deklarashon di Prinsipio di Toleransia ku UNESKO a adoptá, 1995.
Pero intoleransia por kousa falta di rèspèt i asta odio. Ora hende tin e tipo di sintimentunan ei, nan por bisa kos ku ta mustra ku nan ta odia hende, nan por diskriminá i asta por bira violento.
No ta tur hende tin e mesun opinion tokante kiko toleransia òf mustra rèspèt ta nifiká. Tin ta pensa ku un hende tolerante mester bai di akuerdo ku tur loke otro hende ta hasi. Pero otronan tin e mesun pensamentu ku Beibel. Nan ta respetá otro hende su derecho di skohe nan kreensianan i nan normanan aunke ku nan mes no ta di akuerdo ku e kreensianan i e normanan ei.
Di bèrdat Beibel por yuda nos tolerá otro den nos tempu?
Segun Beibel, dikon nos mester ta tolerante?
Beibel ta mustra ku ta bon pa nos ta tolerante pasobra e ta bisa: “Laga tur hende mira ki rasonabel boso ta.” (Filipensenan 4:5) Beibel ta animá nos pa mustra interes den otro hende i pa trata nan na un manera amabel i hustu. P’esei, esnan ku ta sigui e konseho akí lo no stroba otro hende di hasi loke nan ke ku nan bida, maske nan mes no ta di akuerdo ku loke e otro hendenan ei ta pensa i hasi.
Beibel ta siña nos sí ku Dios ke pa nos komportá nos na un sierto manera. Beibel ta bisa: “Abo, hende trahá di stòf, Yehova ta bisa bo loke ta bon.” (Mikéas 6:8) Dios ta bisa nos den Beibel kiko nos mester hasi si nos ke disfrutá di e mihó bida posibel.—Isaías 48:17, 18.
Pero Dios no a duna nos derecho di husga otro hende. Segun Beibel, “ta ún legisladó i hues tin . . . Ken bo ta, pa bo ta husga bo próhimo?” (Santiago 4:12) Dios ta duna kada un di nos libertat pa tuma nos mes desishonnan. Pero klaru, nos ta keda responsabel pa nos desishonnan.—Deuteronomio 30:19.
Loke Beibel ta bisa tokante rèspèt
Beibel ta bisa ku nos mester “respetá tur hende.” (1 Pedro 2:17, Beibel na papiamentu koriente) Pues, tur hende ku disidí di sigui e normanan di Beibel lo trata tur hende ku rèspèt, sin importá nan kreensianan òf estilo di bida. (Lukas 6:31) Esaki no ke men sí ku esnan ku ta sigui Beibel lo bai di akuerdo ku tur kreensia òf opinion ku otro hende tin ni ku nan lo apoyá tur nan desishonnan. Pero esei lo no pone nan trata otro hende malu òf ku falta di rèspèt. Mas bien, nan lo hasi nan bèst pa imitá e manera ku Hesus a trata hende.
Por ehèmpel, un biaha, Hesus a topa un señora ku tabatin un religion ku e no tabata di akuerdo kuné. Ademas, e señora tabata biba ku un hende hòmber ku no tabata kasá kuné. Esaki ta un estilo di bida ku Hesus no tabata di akuerdo kuné. Tòg, el a papia ku e señora akí ku rèspèt.—Huan 4:9, 17-24.
Meskos ku Hesus, kristiannan ta kla pa splika nan kreensianan na esnan ku ke skucha, pero nan ta hasi esei ku “rèspèt profundo.” (1 Pedro 3:15) Beibel ta bisa ku kristiannan no mester fòrsa hende pa aseptá loke nan ta kere. E ta bisa ku un siguidó di Kristu “no tin nodi di pleita, pero e mester ta amabel ku tur hende,” inkluyendo esnan ku tin un otro religion.—2 Timoteo 2:24.
Loke Beibel ta bisa tokante odio
Beibel ta bisa pa nos “hasi tur [nos] esfuerso pa ta na pas ku tur hende.” (Hebreonan 12:14) Esnan ku ta hasi esfuerso pa ta na pas ku tur hende lo no odia otro hende. I nan lo hasi esfuerso pa ta pasífiko, pero sin bai kontra nan propio prinsipionan. (Mateo 5:9) Ademas, Beibel ta animá kristiannan pa stima nan enemigunan i pa nan ta amabel ku hende ku ta trata nan malu.—Mateo 5:44.
Ta bèrdat sí ku Beibel ta bisa ku Dios ta “odia” òf “detestá” ora hende ta hasi kos ku ta rebahá òf kousa daño na otro hende. (Proverbionan 6:16-19, nota) Den e teksto akí, Beibel ta usa e palabra “odia” pa deskribí loke Dios ta detestá. Kiko esei ta? E kosnan malu ku hende ta hasi, i no e hende mes. Beibel ta siña ku Dios ta kla pa pordoná i yuda tur hende ku ta deseá di kambia i sigui su normanan.—Isaías 55:7.
Teksto di Beibel ku ta papia di toleransia i rèspèt
Tito 3:2: “[Sea] rasonabel, demostrando pleno suavedat pa ku tur hende.”
Un persona rasonabel ta keda trankil ora un hende no tin e mesun opinion kuné, i asina lo e mustra rèspèt.
Mateo 7:12: “Tur loke boso ke pa hende hasi ku boso, boso tambe mester hasi ku nan.”
Nos tur ta gusta ora hende ta trata nos ku rèspèt i ta tene kuenta ku nos opinion- i sintimentunan. Si bo ke haña sa mas tokante kon pa apliká e famoso regla akí ku Hesus a siña nos, wak e artíkulo “Kiko e Regla di Oro Ta?”
Hosue 24:15: “Skohe pa boso mes awe kende boso lo sirbi.” (Beibel Santu)
Ora nos aseptá ku hende tin derecho di tuma nan propio desishonnan, nos lo mustra rèspèt na nan i esei ta yuda nos keda na pas ku tur hende.
Echonan 10:34: “Dios no ta hasi distinshon di persona.”
Dios no ta diskriminá niun hende pa motibu di nan kultura, sekso, nashonalidat, rasa òf nan pasado. Esnan ku ke imitá Dios lo mustra rèspèt na tur hende.
Habakuk 1:12, 13: “[Dios] no ta tolerá maldat.”
Dios lo no permití hende sigui hasi malu pa semper. Dios su toleransia tin límite. Si bo ke haña sa mas, wak e vidio Dikon Dios Ta Permití Sufrimentu?
Romanonan 12:19: “Laga lugá pa e rabia di Dios; pasobra ta pará skirbí: ‘Vengansa ta di mi; ami lo paga bèk, Yehova a ta bisa.’”
Yehova Dios no a duna niun di nos derecho pa tuma vengansa. Ya el a disidí kaba ki dia lo e hasi hustisia. Pa haña sa mas, lesa e artíkulo “¿Alguna vez se hará justicia en el mundo?”
a Yehova ta Dios su nòmber personal. (Salmo 83:18) Wak e artíkulo “Ken Ta Yehova?”
Otro Artíkulo Interesante
E TOREN DI VIGILANSIA
E Religion Ku Ta Bon Ta Promové Amor Entre Su Miembronan i pa Otro Hende
BEIBEL TA KAMBIA BIDA DI HENDE
Na Ki Tempu Amor Leal Lo Vense Odio?
Por ta masha difísil pa vense prehuisio. Wak kon un hudiu i un palestino a logra vense prehuisio.
PREGUNTA KU HOPI HENDE SA HASI
Testigunan di Yehova Ta Kere Ku Nan Tin e Religion Berdadero?
Hesus a yega di bisa ku tin hopi kaminda ku ta hiba na salbashon?
TOKANTE NOS
Pidi un Bishita
Papia tokante un tópiko di Beibel òf haña sa mas tokante Testigunan di Yehova.
