Desde 26 di òktober 2022, tin 106 ruman hòmber i kuater ruman muhé detené òf será den prizòn na Rusia i Krimea pa motibu di nan fe. Ruman Dmitriy, kende tin 44 aña di edat, a bira e di 100 sirbidó di Yehova ku a ser enkarselá. Ruman Dmitriy a ser arestá dia 8 di sèptèmber 2022. Nan a akus’é di a partisipá den aktividat ekstremista pasobra e tabata bai reunion di kongregashon i prediká na otro persona. Desde 2017, un kantidat di mas o ménos 350 Testigu di Yehova tabata será den prizòn.

Polis a arestá Dmitriy i pone den aresto preventivo despues ku nan a hasi un entrada hudisial na su apartamento ku ta keda den e region Chelyabinsk. Dos dia despues, nan a ser’é den un prizòn na Novosibirsk. E prizòn ei ta keda mas ku 1.500 kilometer leu for di su kas.

Dmitriy ta kompartí un sèl ku 12 otro persona. Dmitriy su esposa, Marina, no tin mag di bishit’é. P’esei, nan ta komuniká via karta.

Marina a bisa: “Durante e promé dianan despues ku el a ser arestá, mi no por a drumi bon i mi tabata lanta kada bes den mardugá. Nos amigunan di kongregashon tabata invitá mi pa pasa dia serka nan i esei a yuda mi mashá.”

Marina a bisa ku Dmitriy ta masha positivo. Marina a sigui bisa: “Yehova ta sòru bon p’e.”

A base di Lei Penal di Federashon Ruso, e outoridatnan ta akusá nos rumannan di ta ekstremista. Anna Safronova, kende tin 27 aña di edat, tambe nan a akusá di ta ekstremista. Aktualmente, Anna Safronova ta sintando un kastigu di seis aña den prizòn. Esei ta un di e sentensianan di mas largu ku un ruman muhé a haña.

Aresto di Dmitriy ta un otro logro di Rusia su kampaña bergonsoso kontra Testigunan di Yehova. E kampaña ei tin 5 aña andando, apesar di intervenshon di diferente organisashon internashonal. Ora Korte Supremo di Rusia a dikta sentensia kontra Testigunan di Yehova na aña 2017, e outoridatnan ruso a bisa ku nan lo eliminá tur entidat legal di e Testigunan pero ku nan lo no a stòp nan aktividatnan spiritual. Sinembargo, nan a stroba e aktividatnan spiritual di e Testigunan. Awe, tin 308 kaso penal kontra kasi 700 Testigu di Yehova. Ademas, e outoridatnan a hasi mas ku 1.851 entrada hudisial na kas di Testigu di Yehova.

Nos ta hasi orashon pa Dmitriy i pa tur nos rumannan ku ta ser persiguí pa motibu di nan fe. Nos tin sigur ku Yehova lo sigui duna nan forsa pa perseverá.—Mateo 24:13.