Sink’or di mainta, Ruman Femi Durodola i su kasá, Yana, a haña un yamada di un ansiano di nan kongregashon ku a lanta nan for di soño. Ruman Yana ta konta: “E ansiano a bisa: ‘No pensa muchu riba e asuntu; djis prepará. E ehérsito di Rusia ta yegando Kiev!’ Despues di e yamada ei, mi a sinti mi tur anshá.”

Ta resientemente Femi a kasa ku Yana. Femi ta di Nigeria i Yana ta di Ukrania. Despues di e yamada, nan a bisti, prepará nan último kòfi ku nan lo bebe na nan kas i lesa nan teksto di dia. E teksto di e dia ei a bisa: “Boso lo tin forsa si boso keda kalmu i demostrá konfiansa den mi.” (Isaías 30:15, NW) Femi a hasi un orashon ferviente na Yehova. Kaba, nan a kohe nan tasnan di emergensia (go bag), i nan a laga tur otro kos atras pa buska refugio na Hulanda.

Tin hopi ruman ku a hasi meskos ku e pareha ei. Nan a tuma un desishon personal pa bandoná Ukrania despues ku Rusia a invadí Ukrania riba 24 di febrüari 2022. Tin mas o ménos 130.000 Testigu di Yehova na Ukrania. Te ku awor, mas ku 36.000 Testigu a disidí di bandoná nan kas. I mas ku 16.000 di e rumannan ei a bai otro pais. Hopi di nan a laga nan kas, trabou i kongregashon atras. Durante e guera, niun hende hòmber na Ukrania entre 18 pa 60 aña di edat no tabatin mag di bandoná Ukrania. Sinembargo, tabatin eksepshon. Por ehèmpel, si un hende hòmber tin siudadania di otro pais e tin mag di bai.

Algun di e rumannan ku a disidí di bai ta kohe trein òf konvoi. E biahe ta basta pisá i tin biaha nan no sa di antemano unda nan lo bai. Nan ta pone fe den Yehova i ku kurashi nan ta kuminsá nan biahe. Nan ta bandoná nan stat ku a keda tur destruí pa motibu di e guera, sin sa si nan lo bini bèk.

Yana a bisa: “Nos a laga tur kos atras. Nos a djis bai ku algun kos. Loke nos ta pasando aden a pone mi realisá ku nos amistat ku Yehova ta e kos di mas importante.”

Serka di ruman Lilia Antoniuk su kas, tabatin zonido di alarma pa avisá di un posibel atake di avion di guera. Ademas, e por a tende e zonido di bòm ku ta eksplotá. Tur kaminda riba kaya tabatin outo kimá i pida pida di edifisio i brùg.

Ruman Lilia i su yu muhé, Oleksandra, di 17 aña di edat, a disidí di bai for di Ukrania. Nan a biaha vários dia den trein pa yega Polonia. E trein tabata yen yen di hende. Ruman Lilia i Oleksandra no tabatin muchu kuminda, i nan mester a para hopi ora den trein. Nan a sinti nan mas trankil ora nan a yega e stat Przemyśl na Polonia.

Ruman Lilia a bisa: “Ora nos a mira e rumannan ku bòrchi di ‘JW.ORG’, nos tabata sa ku nos por a keda kalmu i ku e rumannan lo yuda nos bon.” E rumannan a hiba Lilia i Oleksandra un Salòn di Reino kaminda nan por a sali for di friu, kome algu i deskansá un poko. Despues di un ratu, nan a bai pa keda na kas di un ruman.

Mientrastantu Ruman Lilia i su yu muhé a bai Alemania. Ruman Lilia a bisa: “Nos tabata sinti ku Yehova tabata kuida nos, i esei a fortalesé nos fe. Mi ta apresiá Yehova su kuido amoroso mashá. Ademas, mi ta masha gradisidu pa tur loke nos rumannan ta hasi pa yuda nos den e tempu difísil aki.”

Ruman Anastasiia Kovalyova a konta kon e ehérsito di Rusia a hasi un atake aéreo riba e stat Zaporizhzhia. E tabata mira lus manera kandela tabata sali for di e armanan grandi ku ta tira e bòmnan, i for di su apartamento, e tabata tende e eksploshonnan. E subrino i subrina di Anastasiia tin shete i tres aña di edat. E bombardeonan ku tabata bini un tras di otro tabata spanta e muchanan asina tantu ku e famia a disidí di bai. Anastasiia ta konta: “Nos no por a bai ku muchu kos. P’esei, nos tabata falta paña i vários otro kos. Pero e rumannan a regla tur kos pa nos. Nos a asta haña mas di loke nos tabatin mester.” Anastasiia, su kuñá Anya i e muchanan a bai Alemania via Polonia.

Kada bes ku Ruman Anastasiia Shchukina i su mama, Ruman Olha Lysenko, a tende e alarma ku ta avisá di un posibel atake di avion di guera, nan tabata sera nan mes den e bodega di nan kas chikitu. E bodega tabata friu. E rumannan ei ta pionero regular. Nan tabata sirbi kaminda tabatin mester di mas predikadó, na e pueblo chikitu Brailiv, Oblast Vinnytsia. Nan no tabata sa sigur si nan mester a bai for di Ukrania. Pero finalmente, ora e situashon a bira pió, nan a disidí di bai. Nan a bai ku djis e kosnan nesesario, i nan a biaha ku trein pa dos dia. Nan no por a drumi muchu den trein. No tabata fásil pa nan hasi e biahe, pasobra Ruman Olha tin 58 aña di edat i su salú no ta bon. Dos or di mardugá, nan a yega e stat Rzeszów na Polonia. Nan rumannan kristian tabata einan pa yama nan bon biní. Ruman Anastasiia a bisa: “Maske tabata hopi lat, nos rumannan tabata warda pa nos yega. Nos ta masha gradisidu na Yehova i nos rumannan.”

Ruman Andrzej Chyba ta siudadano di Polonia i su kasá Elizabeth ta di Gran Bretaña. Nan tabata biba den e stat Sumy. Nan tabata den e bodega di kas di un ruman huntu ku sinku otro ruman. Anto nan por a tende e zonido di avion di guera ta bula, tiramentu i eksploshon di bòm. E rumannan a disidí di wak e drama bíbliko: “O Yehova, den Bo Mi Ta Konfia.” Esei a duna nan mas kurashi. E drama ei tabata basá riba e relato den Beibel tokante Rei Ezekías i e menasa di Asiria kontra Herúsalèm.

Awor, Ruman Andrzej i su kasá ta na Polonia. Ruman Andrzej a bisa: “Nos rumannan a manda nos vários animashon basá riba Beibel. Por ehèmpel, nan a animá nos pa lesa Salmo 27 huntu.”

Nos tin sigur ku Yehova lo bendishoná nos rumannan ku a sufri ‘pèrdida di tur kos material’ i ta wak padilanti pa un futuro sin guera.—Filipensenan 3:8.