Poko despues ku e guera na Ukrania a kuminsá, Iryna Makukha, un ruman muhé soltera di 46 di edat, a bai stashon di trein na Kharkiv. El a disidí ku lo ta mas safe pa e bai un otro pais. Tabata un káos na e stashon di trein. Hende tabata subi trein sin sa unda e trein lo hiba nan. Iryna a subi un trein ku tabatin tur su bentananan tapá. Nan tabata hasi esei pa evitá un atake riba e trein. Ta te despues ku e trein a sali, Iryna a haña sa ku e trein tabata rumbo pa Slovakia.

Awor, Ruman Iryna ta biba Repúblika Cheko. El a yega Praga dia 3 di mart 2022. El a haña un trabou di limpiesa, i e ta hasi mantenshon chikitu na un edifisio. E ta biba den un apartamento huntu ku dos otro ruman di Ukrania ku tambe ta refugiado. Ruman Iryna ta siñando Cheko. Anto el a sigui traha den e trabou di tempu kompleto. E tin 20 aña kaba ta trahando den e trabou di tempu kompleto.

Ruman Iryna a bisa: “M’a mira bon kla ku Yehova ta usa nos rumannan pa kuida nos. Esei a fortalesé mi fe masha hopi mes.”

Kasi 23.000 di nos rumannan di Ukrania a tuma e desishon personal di bai otro pais pa buska refugio. Hopi bes, e rumannan ku a disidí di keda biba na un otro pais a haña un lugá mas safe pa biba. Pero nan a haña nan mes ku otro reto. Nan mester buska un kas i trabou, i nan mester regla nan papelnan. Ademas, e refugiadonan mester regla pa nan yunan bai un skol nobo. Fuera di hasi tur e kosnan ei, nan mester siña un idioma nobo tambe. E rumannan akí a realisá ku nan rutina spiritual i e yudansa di nan rumannan ta sumamente importante pa yuda nan durante e tempu difísil akí.

Famia Perceac a pasa den esei. Anatoli i Olena Perceac i nan yu muhé Alina di 17 aña di edat tabata biba na Mykolaiv Oblast, na Ukrania. E bombardeonan a destruí parti di e bario kaminda nan tabata biba. Nan a bai Rumania dia 6 di mart 2022. Anatoli tin nashonalidat di Moldavia. P’esei, e tabatin mag di sali di Ukrania pa bai Rumania ku su famia. Olena a splika kon nan a sinti ora nan mester a bandoná nan pais. El a bisa ku bo por kompar’é ku ora “bo ta saka un palu ku rais i tur i plant’é un otro kaminda.”

E rumannan na Rumania a yuda Famia Perceac haña un apartamento pa nan biba aden. Anatoli i Olena a logra haña trabou. Anto Alina por a sigui bai su skol na Ukrania via Internet.

E rumannan na Rumania a yuda e famia akí na vários manera práktiko. Ademas, e rumannan a duna e famia sosten emoshonal i spiritual. Regularmente, e rumannan ta pasa tempu ku e famia pa nan no sinti nan nan so. Olena i Alina ta siñando e idioma di Rumania. Loke ta yuda nan ta JW Language, i nan ta partisipá den e trabou di predikashon ku nan kongregashon nobo. Anatoli a siña papia e idioma tempu e tabata mas yòn.

Anatoli a bisa: “For di kuminsamentu, nos por a mira kon Yehova ta yuda nos. Yehova a mustra ku e ta stima nos; el a usa e organisashon i nos rumannan pa yuda nos.”

Alina Havryliuk tabata biuda promé ku e guera a kuminsá. E tin 37 aña di edat, i su yu hòmber tin 16 aña di edat. Nan a bandoná nan stat Vinnytsia, na Ukrania. Nan a yega Suwałki, na Polonia dia 27 di febrüari. Alina a konta: “Mi tabata preokupá tokante unda nos lo biba i kon lo mi pèrkurá pa nos famia. Pero mi tabatin tur konfiansa ku Yehova lo kuida nos.”

Mesora Alina a kuminsá buska un trabou ku lo no strob’é di bai reunion. El a haña trabou na un skol, kaminda e mester hasi limpiesa i mantenshon. Alina a bisa: “Mi ta gradisidu ku e trabou ku mi a haña a duna mi mas oportunidat pa partisipá den e trabou di predikashon. Ademas, e ta yuda mi pèrkurá pa mi famia.”

Alina i Vladyslav ta siñando polako. Nan ta sirbi tambe komo pionero ousiliar riba un base regular na un kongregashon di idioma polako. Vladyslav a logra inskribí na un skol sekundario.

Nos rumannan di Ukrania ta haña nan ku hopi difikultat, pero Yehova ta sigui duna nan e poder ku ta surpasá esun di hende. Nan a mira kon e palabranan di 2 Korintionan 4:8 a kumpli den nan kaso. E ta bisa: “Nos ta haña nos bou di hopi preshon, ma nos no ta asina den pèrtá ku nos no por move; nos no sa sigur kiko pa hasi, ma nos no ta totalmente sin salida.”