Dia promé di sèptèmber, Testigunan di Yehova rònt mundu tabata ansioso pa kuminsá prediká di kas pa kas atrobe, un trabou ku nos ta bon konosí p’e i ku nos ta balorá mashá. Tabata un goso tambe pa partisipá na e kampaña mundial pa ofresé kurso di Beibel durante sèptèmber. Pa algun ruman, e predikashon di kas pa kas tabata algu ku nan tabata kustumbrá di hasi. Sinembargo, pa algun otro ruman, tabata nan promé biaha ku nan a bai bishitá hende personalmente na nan kas pa hiba mensahe bíbliko. Aki ta sigui algun eksperensia di rònt mundu ku ta mustra kon e aña di sirbishi 2023 a kuminsá.

Riba 2 di sèptèmber 2022, Nicole i Tina, dos ruman muhé di Petershagen na Nort Rijn Westfalia, a bai prediká den un edifisio ku vários apartamento, pero nan no a haña niun hende na kas. Ora nan tabata kana bai, nan a tende un señora yòn yama nan. E señora a pidi nan pa bin papia un ratu kuné tokante Beibel. Anto e señora a splika nan ku e no por a bini na porta ora nan a yama na promé instante. Ora e dos rumannan a drenta e apartamento di e señora, nan a mira e Tradukshon di Mundu Nobo di e Santu Skrituranan riba mesa. Nan a mira ku e Beibel tabata hopi usá. E señora a splika nan ku el a haña e Beibel ei tres aña pasá tempu ku e tabata biba na Italia. Durante e pandemia, el a muda pa Alemania, i el a pèrdè kontakto ku e Testigunan. E rumannan a interkambiá informashon di kontakto ku e señora, i nan a invit’é na e reunionnan. Dos dia despues, e señora i su dos yunan a bai reunion. E rumannan a sòru pa un hende kuminsá studia Beibel ku e señora.

Manuel ku Karol Gastelum ta dos pionero spesial ku ta yuda ku e trabou di prediká na e idioma Mam. Nan a topa un señora kariñoso, kende a invitá nan den su kas. Komo ku e señora no tabata sa ku Dios tin un nòmber, e rumannan a disidí di trata lès 04 di e buki Bo Por Disfrutá di Bida pa Semper! Título di lès 04 ta: “Ken Dios Ta?” Ora nan a lesa Isaías 42:8, e señora a keda asombrá di mira nòmber di Dios, Yehova, den su propio Beibel.

E señora a kuminsá yora. El a bisa ku un hende no mester djis tin un Beibel; e mester sa tambe loke Beibel ta bisa pa asina e por obedesé e mandamentunan di Dios. Ora nan a kaba e lès, e señora a keda kontentu ku loke el a siña. El a bisa ku lo e konta su esposo tur loke el a siña. Famia Gastelums lo sigui studia Beibel ku e pareha.

Ora pareha Nukamori tabata prediká di kas pa kas, nan a papia ku un señora via interkòm. Nan a introdusí nan mes, i nan a bisa ku nan ta Testigu di Yehova. E señora a pidi e pareha pa nan ward’é un ratu. Despues di un ratu, e señora a habri porta i bisa: “Mi tabatin masha gana pa e Testigunan di Yehova bishitá mi.”

E señora a splika ku tempu e tabata biba na Nagasaki, el a kuminsá studia Beibel ku e Testigunan di Yehova. Durante e pandemia, el a muda bai Yokohama, i el a sigui studia via Zoom. E ruman ku tabata studia kuné via Zoom a bis’é: “Lo tin un kampaña na sèptèmber. Siguramente, un Testigu di Yehova lo bishitá bo. Pidi nan pa studia ku bo personalmente.” E señora a keda sorprendí ku e Testigunan di Yehova a bishit’é asina lihé. E señora a bisa ku e tin deseo di asistí na e reunionnan. Anto nan a traha afsprak pa e sigui ku e estudio di Beibel.

Un pareha a ofresé un señora un kurso di Beibel. E señora a bisa e rumannan ku un tempu e tabata studia Beibel ku Testigunan di Yehova. El a bisa ku e tabata asta asistí na e reunionnan. El a pèrdè kontakto ku e Testigunan, i e tabatin bèrgwensa di buska kontakto ku nan atrobe pasobra e no tabata biba segun e prinsipionan di Beibel. Anto, el a kuminsá yora. E pareha a lesa Salmo 10:17 pa e señora, i nan a bis’é ku Yehova no a lubid’é. Nan a elogi’é pa e echo ku e ke biba segun e normanan di Yehova. E señora a aseptá un estudio di Beibel. El a bisa ku su yu hòmber di 16 aña tambe ke studia Beibel pa e sa mas.

E siguiente dia, e pareha a bai bèk serka e señora. E señora i su yu hòmber tabata spera nan. Nan a studia lès 01 di e foyeto Bo Por Disfrutá di Bida pa Semper! Despues di e estudio, e pareha a invitá nan na e reunion di den wikènt. Tantu e señora komo su yu hòmber a asistí na e reunion. Nan tur dos a bisa ku nan ke sigui studia Beibel i asistí na e reunionnan.

Ramon a hasi orashon i pidi Dios pa e haña un hende pa e prediká na dje riba e promé dia ku a kuminsá prediká di kas pa kas atrobe. Na e promé kas ku el a yama, un señora a habri porta djis un tiki asina pa wak ta ken. Ramon a kumindá e señora i introdusí su mes. Promé ku e por a kuminsá ku su presentashon, e señora a bisa: “Bo sa pa kuantu tempu mi a warda pa e momento akí? Mi tabata hasi orashon pa boso bishitá mi.”

E señora a splika ku algun aña promé Testigunan di Yehova a tuma kontakto kuné, i e tabata asistí na e reunionnan. Pero despues, el a muda i pèrdè kontakto ku e Testigunan. Ramon a splik’é ku nos no tabata prediká di kas pa kas durante e pandemia. Anto Ramon a lesa Salmo 37:29 pa e señora, i el a mustra e señora kon un kurso di Beibel ta bai. Mesora e señora a aseptá pa studia Beibel. Ramon a pidi un ruman muhé pa bishitá e señora.

Despues di e eksperensia ei, Ramon a bisa: “Mi sa ku Yehova i e angelnan ta guia nos pa nos haña e personanan ku ke skucha.”

Na un kas na Kentucky, Katelyn Thompson a ripará ku riba e pòstbùs tabatin algun teksto skirbí i e palabranan akí: “Hesus Ta Stima Bo.” Katelyn a bati na e porta, i un señora a kontestá. Katelyn a introdusí su mes, i el a bisa e señora ku, debí na e Pandemia COVID-19, nos no tabata bishitá hende personalmente. Katelyn a splika e señora ku nos tabata skirbi karta i hasi yamada di telefòn pa animá i konsolá hende. Katelyn a puntra e señora kon ta bai kuné i ku su famia. E señora a bisa ku su esposo a muri durante e pandemia. El a sigui bisa: “Mi a haña vários karta di boso. Mi a sinti ku Dios tabata yuda mi na e momento ku mi tabatin mester di esei!” Katelyn a bisa e señora ku ta duel e ku e señora su kasá a muri. Despues, el a trata lès 02 di e foyeto Bo Por Disfrutá di Bida pa Semper! ku e señora. Nan a lesa e tekstonan ku tin den e lès, i nan a papia tokante resurekshon. E señora a kuminsá yora. E señora a bisa ku presis un aña pasá su tata a muri. E señora a duna Katelyn su datonan, i el a bisa ku Katelyn por sigui bishit’é. Mas despues, Katelyn a haña un mensahe di telefòn di e señora. E mensahe a bisa: “Danki. Mi tabatin mester di e animashon ku bo a duna mi awe!”

No tin duda, Yehova ta bendishoná e echo ku nos a kuminsá prediká di kas pa kas atrobe i nos kampaña pa ofresé kurso di Beibel!—Huan 4:35.