Despues di tres aña, nos organisashon a kuminsá tene asamblea di sirkuito en persona atrobe na yanüari 2023. Na yanüari, nos a kuminsá tene skol teokrátiko en persona na hopi pais. Ta bisto ku Yehova a bendishoná e areglonan akí.

Na Villahermosa, Tabasco State, México mas o ménos 200 publikadó a yuda hasi un Salòn di Asamblea limpi pa e ta kla pa nan asamblea di sirkuito. Algun di e publikadónan a biaha kasi 6 ora pa yega einan. Un ruman muhé a bisa: “Nos tin hopi tempu sin mira tantu ruman asina huntu na un lugá. Nos no kier a pèrdè e oportunidat akí pa yuda.”

Na un asamblea na Crownsville, Maryland, Merka, un ruman muhé a bisa: “Mi ta asina kontentu. Fo’i ora ku m’a yega mi ta yora. Tur mi lensunan a kaba, i e programa no a ni kuminsá ainda. Lo mi no a pèrdè esaki pa nada di mundu.”

E rumannan den hopi teritorio di sukursal tabata masha kontentu mes ku nan por a asistí en persona na e Skol di Proklamadó di Reino i na e Skol pa Superintendente di Sirkuito ku Nan Kasá. Ruman Giovanny Cabezas ta un instruktor kaminda ta tene skol na Palm Coast, Florida, Merka. El a bisa lo siguiente: “Mi a bira masha kontentu ora m’a tende ku lo tene e skolnan teokrátiko en persona atrobe. Nos tin un lugá i un ambiente tremendo aki; tur e instruktornan, e studiantenan i e boluntarionan ta kompletamente dediká na hasi Yehova su boluntat.”

Na yanüari 2023, un ruman muhé ku yama Satoko Nakata a asistí na e Skol pa Superintendente di Sirkuito ku Nan Kasá huntu ku su esposo. Ruman Satoko a bisa: “Tabata hopi bon ku, durante e pandemia, nos por a tene reunion i skol di pionero riba Zoom. Sinembargo, tabata difísil pa kòmbersá ku otro, i nos no por a tende otro kanta òf hari. E skol akí ku nos a bai en persona tabata manera un regalo presioso di Yehova. Nos i e otro studiantenan a kòmbersá i hari ku otro. Tin biaha, nos tabata yora huntu, i nos tabata kanta huntu ku alegria. Mi ta masha gradisidu na Yehova i Kuerpo Gobernante.”

Yehova ta masha kontentu ora e mira su pueblo bini huntu pa ador’é i pa asistí na skol teokrátiko. Nos ta sinti meskos ku Rei David, kende a bisa: “Lo mi gradisí bo den e kongregashon grandi. Lo mi alabá bo entre multitut di hende.”—Salmo 35:18.