Dennis Christensen a yega Dinamarka sano i salvo dia 25 di mei 2022. E dia promé, el a sali di un prizòn ruso, i mesora, el a ser deportá. Na tur, el a keda 5 aña será. E tabata será den vários prizòn.

Ruman Dennis a bisa: “Mi ta masha kontentu ku mi a sali di prizòn i ku mi por ta huntu atrobe ku mi kasá Irina. Tur apoyo i animashon ku m’a haña di mi rumannan rònt mundu tabata manera un regalo di Yehova. Mi ta sigui pidi Yehova pa yuda mi rumannan ku ta ser persiguí debí ku nan ta sirbi Yehova.”

Dennis ku Irina ta hañando animashon i sosten finansiero di nan amigunan i nan famianan. Dennis ku Irina a bisa: “Nos ta kontentu ku awor nos por sirbi Yehova huntu ku nos rumannan na Dinamarka, sin ningun restrikshon.”

Dennis a ser arestá i detené dia 25 di mei 2017. Agente ku kara tapá a arest’é na un reunion di kongregashon na Oryol. Despues, un hues a deklará Ruman Dennis kulpabel di a organisá aktividat di un organisashon religioso ku Korte Supremo di Rusia a prohibí i deklará ekstremista un luna promé.

E outoridatnan na Rusia ta sigui bisa ku e prohibishon di 2017 ta konta solamente pa e entidat legal di Testigunan di Yehova na Rusia. Nan ke men ku e prohibishon no ta stroba persona individual ku ta Testigu di adorá Dios. Sinembargo, despues di Ruman Dennis su detenshon, e outoridatnan a arestá hopi Testigu di Yehova na Rusia i Crimea i pone nan den prizòn.

Te ku awe, 91 di nos rumannan ta den prizòn. Nos ta pidi Yehova pa sigui sostené e rumannan fiel ei i duna nan un trato spesial.—Salmo 4:3.