Sekretario General di Konseho di Europa a manda un karta ku e fecha 9 di desèmber 2022 pa Minister di Relashon Eksterior di Rusia. Den e karta, Sekretario General a hasi un apelashon na Rusia pa kumpli ku algun sentensia ku Korte Europeo di Derechonan Humano a dikta resientemente. Un di e sentensianan ei ta e desishon históriko di Korte ku ta deklará e prohibishon kontra Testigunan di Yehova na Rusia ilegal. a

E karta a kòrda Rusia ku su gobièrnu mester tene su mes na e desishonnan ku Korte Europeo a tuma te ku 16 di sèptèmber 2022. Rusia tin e obligashon ei maske el a stòp di ta miembro di Konseho di Europa na mart 2022. Ademas, e karta a indiká ku Konseho di Europa, via su Komité di Minister, lo sigui vigilá si Rusia ta implementá e desishonnan di Korte Europeo.

For di yuni 2022, Komité di Minister a kuminsá hasi apelashon na Rusia pa kita e prohibishon ku Korte Supremo di Rusia a dikta na 2017 ku a prohibí tur aktividat religioso di Testigunan di Yehova. Komité di Minister a pidi Rusia “pa reevaluá e leinan kontra ekstremista ku ta deklará e organisashonnan di Testigunan di Yehova ekstremista . . . ; pa stòp tur kaso penal òf investigashon kontra Testigunan di Yehova i pa laga tur Testigu di Yehova ku ta será sali liber. Ademas, mester kita tur konsekuensia di tur Testigu di Yehova ku a ser kondená i mester duna tur partido den e kaso nan propiedatnan bèk of paga nan un kompensashon.” b

Te ku awor, e prohibishon a kousa problema legal pa mas ku 660 di nos rumannan ku djis ke sirbi nan Dios Yehova. Mas ku 360 di nan tabata será den prizòn, i 114 di nan ta den prizòn of detenshon preventivo na e momento akí.

Outoridatnan na Rusia a pone mas ku 450 di nos rumannan riba un lista federal di hende ekstremista i terorista. Esei ta pone ku nan i nan famia ta haña nan ku hopi difikultat. E lista akí ta públiko. Pues, tur hende por wak ken ta riba e lista. Esei ta pone ku hopi hende ta wak e personanan riba e lista malu. Ademas, hopi di nan no por a haña trabou. Fuera ku nan nòmber ta riba e lista, nan ta haña nan ku vários otro konsekuensia legal: nan no tin akseso na nan kuenta di banko; ta mas difísil pa nan renobá nan seguro òf sera un seguro nobo, bende propiedat, manehá nan invershonnan, haña herensia, of asta kumpra karchi di SIM nobo pa nan telefòn.

Nos ta kontentu ku Konseho di Europa ta sigui buska manera pa nos rumannan na Rusia haña hustisia. Mientrastantu, nos rumannan rònt mundu ta haña hopi animashon ora nan lesa e notisianan tokante nos rumannan na Rusia. Danki na Yehova, nos rumannan na Rusia tin fe fuerte, kurashi i goso.—Filipensenan 1:12-14.