27 DI DESÈMBER 2022
RUSIA

“Ora Nos Pasa den Prueba, Yehova Ta Hasi Nos Fuerte”

TOKA NA

Korte di e stat Apatity, na Region Murmansk, pronto lo anunsiá un veredikto den e kaso penal kontra Ruman Denis Merkulov. Fiskal no a bisa ainda ki sentensia ta pidi pa Ruman Merkulov.

Informashon Personal

Denis Merkulov

Nasí na: 1976 (Kirovsk, Region Murmansk)

Background: E ta traha komo lasdó i elèktrishèn

E idea ku morto ta algu inevitabel tabata preokup’é hopi. El a bira masha kontentu ora ku, durante su kurso di Beibel ku Testigunan di Yehova, el a siña tokante e propósito ku Dios tin pa humanidat. El a batisá na aña 1995. El a kasa ku Nataliya na aña 1998

Loke Nos Ruman A Bisa

Kiko bo a siña tokante bo mes durante e eksperensia akí?

Mi a siña ku no ta djis pasobra mi ta pasa den prueba mi ta bira un mihó persona. Tur dia, mi mester mustra ku mi ta konfia den Yehova, i esei lo yuda mi pa mi no entregá. Regularmente, mi ta puntra mi mes: ‘Mi desishonnan òf e metanan ku mi ta pone den bida ta mustra ku mi ta konfia den Yehova? Kuantu tempu mi ta apartá pa mi lesamentu di Beibel, preparashon pa reunion i e trabou di predikashon?’ Ora bo pasa den un prueba hopi difísil manera mi ta pasando aden, un prueba ku ta kambia bo bida kompletamente, ta solamente bo bon amistat ku Yehova i fe fuerte den dje lo yuda bo keda kalmu i no entregá.

Tin un teksto di Beibel ku a ègt yuda bo soportá situashon difísil?

E anochi promé ku mi a ser arestá, ami ku mi kasá a papia tokante Isaías 41:10. E teksto ta bisa: “No tene miedu, pasobra mi ta ku bo; no desmayá, pasobra mi ta bo Dios. Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.” E siguiente dia, ora mi a ser enkarselá den un sentro di detenshon, den mi mente, mi a keda ripití e teksto ei vários biaha. Mi tabata para na final di kada frase di e teksto, meditá riba e parti ei i hasi orashon. Mi tabata sinti manera ta Yehova mes tabata bisando mi e palabranan ei. Esei a yuda mi komprondé ku Yehova no ta laga nos pasa den prueba pasobra e ta pensa ku nos ta sufisientemente fuerte pa soportá nan nos mes. Mas bien, ora nos pasa den prueba, Yehova ta hasi nos fuerte.

Ta un konsuelo pa sa ku, si nos tin un bon amistat ku Yehova i pone konfiansa den dje, semper lo e hasi nos firme i fuerte ora nos pasa den prueba.—1 Pedro 5:10.

Algun Suseso Ku A Tuma Lugá

21 di yüli 2021

E outoridatnan a listra kas di 14 Testigu di Yehova na Apatity i den bisindario. E agentenan FSB a kibra drenta den e apartamento di Famia Merkulov, i nan a detené e pareha pa interogá nan. E outoridatnan a laga nan sali liber kuat’or di mardugá e siguiente dia
22 di yüli 2021

E outoridatnan a pidi Ruman Denis pa bini bèk na ofisina di e investigadónan. Nan a ser’é den un sentro di detenshon temporal
23 di yüli 2021

E outoridatnan a laga Ruman Denis sali liber, i nan a pon’é bou di aresto na kas
17 di sèptèmber 2021

E outoridatnan a kita e aresto na kas, i nan a duna Ruman Denis òrdu pa e no biaha
15 di yüli 2022

E outoridatnan ofisialmente a akusá Ruman Denis di a organisá aktividat ekstremista pasobra e tabata “kanta kantika” i “hasi orashon na Yehova Dios”
20 di sèptèmber 2022

E kaso penal den korte a kuminsá

KOMUNIKADO