Ruman Rinat Kiramov a ser kondená na aprel 2023. Aworakí, e ta sinta un sentensia di 7 aña di prizòn den un kampo pa trabou fòrsá. Riba 18 di aprel 2024 (un aña despues ku el a ser kondená), e outoridatnan di prizòn a manda Ruman Rinat di e kampo pa trabou fòrsá pa un prizòn ku ta duna kuido médiko. Esei tabata algu inesperá. Supuestamente, e outoridatnan a sospechá ku Ruman Rinat a haña tuberkulósis. Dos dia despues, un grupo di prizonero a kuminsá interogá Ruman Rinat. Nan a eksigí pa Ruman Rinat duna nan informashon tokante e Testigunan di Yehova na Akhtubinsk, e stat kaminda e tabata biba. Despues ku Ruman Rinat a nenga di hasi esei, nan a kuminsá tortur’é. Pa kuater dia largu, nan a tortur’é na vários manera. E grupo a asta usa un arma ku ta manda shòk di koriente. Ademas, e hòmbernan no a laga Ruman Rinat drumi, sinta òf baña. Nan tabata fòrs’é pa keda lantá i pa keda pará riba su pianan henter dia i anochi. Ruman Rinat tabatin mag di kome solamente un bes pa dia.

Algun dia despues ku e hòmbernan a kuminsá tortura Rinat, Galina, Ruman Rinat su kasá, a bin bishit’é na e prizòn. Galina a keda den shòk ora el a wak su kasá. El a mira ku Rinat su kara tabata tur blousá, ku Rinat no por a kana bon i ku su mannan tabata tembla. Despues ku Rinat a konta Galina loke a pasa, Galina a tuma kontakto ku Rinat su abogado. Mesora, e abogado a pidi e outoridatnan pa hasi un eksaminashon médiko di Ruman Rinat pa e heridanan ku e tabatin, i e abogado a pidi pa hasi un investigashon di henter e asuntu.

Despues ku fiskal a ser informá di e asuntu, nan a reuní ku Rinat, i nan a laga un dòkter hasi un eksaminashon médiko. Despues ku e dòkternan a konfirmá ku Rinat a ser torturá, fiskal a manda e kaso pa Ministerio di Asuntu Interino. E eksaminashon a saka afó tambe ku Rinat no tabatin tuberkulósis. P’esei, riba 17 di mei 2024, nan a manda Rinat di e hospital bèk pa e kampo di trabou fòrsá. Einan, e ta aktualmente.

Rinat a bisa Galina loke a yud’é wanta henter e situashon. El a bisa: “Mi tabata djis keda resa i keda pensa riba teksto di Beibel. Niun hende no por a stòp mi di hasi e kosnan ei. Mi ta kontentu ku mi a studia Beibel regularmente promé ku esaki a pasa ku mi. Esei a yuda mi kòrda teksto di Beibel.” Rinat a sigui bisa: “Hopi hende a logra soportá trato kruel debí ku nan ta dediká na sierto kousa, i nan no tabatin Yehova su spiritu santu. Pero ami sí tin Yehova su poder sin límite pa fortalesé mi. Mi a bisa den mi mes: ‘Awor ta mi chèns pa mustra Yehova ku lo mi keda fiel na dje; lo mi no entregá.’”

Loke a pasa ku Ruman Rinat ta hasi nos tristu. Pero Ruman Rinat su ehèmpel ta animá nos tambe, pasobra e ta mustra nos ku Yehova semper lo duna nos “poder ku ta surpasá esun di hende” pa nos por perseverá.—2  Korintionan 4:7.