5 DI NOVÈMBER 2021
RUSIA

Ruman Aleksey Yershov Su Rutina Spiritual Ta Yud’é Bringa Kontra Desanimashon

TOKA NA

INFORMASHON NOBO | Korte di Rusia Kondená Ruman Aleksey Yershov

Riba 19 di yanüari 2022, korte die stat di Severskiy di e region di Tomsk a kondená Ruman Aleksey Yershov i a sentencia’é na tres aña di prizòn. Su sentensia ta kuminsá mesora.

Algun Suseso Ku A Tuma Lugá

22 di Yüni 2021

Nan a kuminsá un kaso penal kontra di Ruman Yershov den korte di e stat di Severskiy di e region di Tomsk
30 di Mart 2021

Aleksey a ser akusá a base di grabashon di vidio ku a ser hasí pa un persona ku a pretendé di ta interesá den studia Beibel pa mas ku un aña
14 di Yüli 2020

Agente di e agensia Federal di Siguridat di Rusia (FSB) i di e Komité di Investigashon a listra Aleksey su kas pa shete ora largu. E agentenan a konfiská karchi di banko, aparato elektróniko, Beibel, pasport i router di Wi-Fi

Informashon Personal

Aleksey Yershov

Nasí na: 1953 Seversk (Region di Tomsk)

Background: E mesun aña ku Aleksey a nase su tata a muri. Su mama a lant’é. Aleksey tabata traha komo ingeniero i tabata duna lès na un skol di fishi

El a kasa ku Lyudmila na aña 1976. Nan tin dos yu adulto

Despues ku un di su studiantenan a invit’é pa asistí na un reunion di Testigunan di Yehova, Aleksey kier a kuminsá studia Beibel. El a gusta Beibel su konseho práktiko i e speransa di e Reino. El a batisá komo Testigu di Yehova na aña 1994

Loke Nos Ruman A Bisa

Kiko a fortalesé bo amistat ku Yehova durante e tempu difísil akí?

Awor, ami ku mi kasá ta hasi mas tantu orashon huntu. Mi a ripará ku mi no por trata ku e situashon akí sin Yehova su yudansa. Pa e motibu ei, mi ta purba di mantené mi rutina spiritual, hasiendo mi estudio personal i lesando Beibel tur dia. Tur mainta, ami ku mi kasá ta trata e teksto di dia i hasi orashon na Yehova huntu.

Kiko ta yuda bo bringa kontra desanimashon?

Estudio personal ta yuda mi ora mi ta desanimá. Mi ta meditá riba ehèmpel di sirbidónan fiel di pasado. Tin hopi relato den Beibel ku ta mustra kon importante ta pa keda kalmu i konfia den Yehova. Ora mi meditá riba e relatonan ei, mi ta purba di komprondé kiko a yuda Dios su sirbidónan keda kalmu. Echonan 5:29 ta bisa: “Nos tin ku obedesé Dios na promé lugá, i no hende.” Ora Sanedrin a ordená e apòstelnan pa stòp di prediká, e apòstelnan no a drenta pániko. Asta ora nan a haña un halá di sota, nan no a haña miedu. E apòstelnan tabata sa ku Yehova tabata ku nan i ku e tabata kontentu ku nan.

Nos rumannan na Rusia ta sigui haña konsuelo i forsa segun ku nan ta hasi orashon i lesa nan Beibel tur dia. Salmo 9:9 ta sigurá nos ku “[Yehova] lo ta un refugio pa e oprimínan, un refugio den tempunan di angustia.”

KOMUNIKADO