Dia 22 di febrüari 2023, Ruman Andrey Andreyev a sali for di prizòn na Rusia. E tabata será pa mas ku 3 aña.

E outoridatnan a listra kas di hopi Testigu di Yehova na Kursk, i e outoridatnan a interogá hopi di nos rumannan na Kursk. Despues di esei, riba 16 di òktober 2019, e outoridatnan a arestá Ruman Andrey i vários otro ruman hòmber. Ruman Andrey tabata bou di aresto preventivo; e tabata será pa kasi 20 luna. Korte a dikta sentensia kontra Ruman Andrey riba 3 di yüni 2021. El a haña kastigu di prizòn.

Tempu ku Ruman Andrey tabata será, el a hasi tur loke e tabata por pa kuida su esposa, Svetlana, i nan dos yu muhénan, Anzhelika i Albina. Den e kartanan ku Ruman Andrey tabata skirbi pa su famia, el a duna nan hopi animashon basá riba Beibel. Ruman Andrey a asta skirbi henter e diskurso di kasamentu di su yu muhé, Anzhelika, den un karta. Anzhelika a kasa tempu ku su tata tabata será. Anzhelika a bisa: “E diskurso tabata masha bunita. El a emoshoná tur hende ku tabata presente . . . Tabata komo si fuera mi tata tabata huntu ku nos riba e dia di mi kasamentu.”

Andrey su famia mester a biaha ocho ora den konvoi pa yega serka Andrey. Maske e biaha ei tabata difísil, Svetlana a bisa ku e rumannan ku tabata biba serka di e prizòn semper tabata yuda e ku su yu muhénan bon. E rumannan tabata duna Svetlana i su yu muhénan un lugá pa pasa anochi i kuminda. Ademas, e rumannan tabata hiba nan pa e sentro di detenshon i bèk. Pa bo bishitá un persona na e sentro di detenshon, bo mester para den rei. Algun di e rumannan tabata para den rei pa e famia. Hopi bes, e rumannan tabata para henter anochi den rei pa reservá un lugá den rei pa e famia.

Bida den prizòn tabata duru pa Ruman Andrey, pasobra nan tabata trata Ruman Andrey malu. Maske e tabata den prizòn, el a keda ku un fe fuerte. E outoridatnan den prizòn a haña masha rèspèt pa Ruman Andrey debí na su bon kondukta i su bunita kualidatnan kristian. Debí na su bon reputashon, e outoridatnan a permití su famia bishit’é mas tantu biaha, mas ku e otro prizoneronan. Ruman Andrey a bisa lo siguiente tokante e sentensia ku Korte a dikta kontra dje: “Mi no ta rabiá; mi no ta karga renkor, i mi no tin rabia riba niun hende. Danki na Yehova, mi a keda fiel na dje, i mi ta kontentu.”

Nos tin sigur ku Yehova lo sigui bendishoná Ruman Andrey pa su determinashon pa sigui mustra amor kristian.—1 Huan 4:16.