Nos rumannan na Ukrania no a stòp di apoyá otro. Nan ta sigui yuda otro i asina mustra amor i sakrifisio propio.

Ruman Olena tin 81 aña di edat. Riba 6 di yüni, un bòm a eksplotá djis un par di meter leu di su kas. E bòm a destruí kas di su bisiña i laga un buraku atras di 7 meter hundu. E eksploshon tabata asina pisá ku el a hasi hopi daño na e kas di Ruman Olena.

Ruman Olena a bisa: “Ora mi tabata drumí, un muraya a kai nèt banda di mi kabes. Tabatin un stòf pretu den laira, i tur kaminda tabatin glas i piedra bentá. M’a gradisí Yehova ku mi tabata na bida.” Algun minüt despues di e eksploshon, e rumannan den e área a bai serka Ruman Olena. Un ruman hòmber su kas tambe a haña hopi daño, tòg el a bin wak konta ku Ruman Olena. Ruman Olena a sigui bisa: “Ora e rumannan a yega, nan tabata den shòk. Nan no tabata sa ki pa bisa. Pero e simpel echo ku nan tabat’ei tabata un animashon pa mi. Tabata masha bunita pa mira kon nan tur tabat’ei pa apoyá mi.”

Serhii ta un ansiano ku huntu ku algun hóben den kongregashon regularmente ta bishitá Ruman Olena. Ruman Serhii a bisa: “Ora m’a tende ku tabatin un eksploshon serka di Ruman Olena su kas, m’a keda tur preokupá. M’a haña un alivio ora m’a mira ku e no a keda hopi heridá; el a djis haña algun sla na su kurpa. Kasi bo no por kere, pero e promé kos ku Ruman Olena tabata ke despues ku su kas a keda destruí ta e publikashonnan ku el a haña algun dia promé.”

Nos ta kontentu ku e famianan di Ruman Olena a haña un kas nobo pa Ruman Olena. E kongregashon ta sigui yuda Ruman Olena, i e ansianonan ta yam’é na telefòn tur dia. E rumannan a kumpra aparato di oido pa Ruman Olena pa e por benefisiá mas di e reunionnan. Ruman Olena a bisa: “Tin biaha, mi ta sinti manera mi no tin forsa, pero e reunionnan ta fortalesé mi. Mi rumannan ta yama mi regularmente, i mi ta masha gradisidu pa nan yudansa.”

Un pareha a tuma refugio den bodega di un Salòn di Reino ku 200 otro publikadó. Nan a skirbi un karta pa konta nan eksperensia. E ruman muhé a bisa: “Mi tabata masha impreshoná ku e bunita manera ku e ansianonan tabata kuida nos. Nan a kòrda mi di e ehèmpel di David. David a riska su bida pa salba su karnénan for di un leon i un ber. E ansianonan ku tabata huntu ku nos mester a riska nan bida pa buska awa i kuminda pa nos. Ademas, nan tabata buska kombustibel pa nos tin lus. Danki na nan esfuersonan, nos tabatin reunion di kongregashon i salida pa sirbishi. Asta ora e bombardeonan tabata masha pisá, e ansianonan tabata bishitá e rumannan ku a keda na nan kas. E ansianonan tabata trese kuminda i awa pa nan, i nan tabata konsolá e rumannan. Mi tin hopi rèspèt pa e ansianonan ei. Promé ku e guera, mi tabata mira e ansianonan manera e rumannan ku ta siña nos i ku ta prediká. Awor, mi ta mira nan manera wardadó ku bo por konta kuné. Mi ta asina gradisidu pa e bon ehèmpel ku nan ta pone. Nos ansianonan tin kurashi, semper bo por konta ku nan, i nan ta kuida nos bon.”

E publikadónan di un kongregashon na Ukrania a skirbi un karta na sukursal di Ukrania tokante e rumannan ku ta dirigí e trabou di ousilio. Nan a bisa: “Nos ta masha gradisidu mes. Nos ta asina impreshoná ku e manera ku Yehova ta kuida nos mediante nos rumannan. Nos e mira kon a palabranan di Hesus a kumpli den nos kaso: ‘Na esaki tur hende lo sa ku boso ta mi disipelnan, esta, si boso ta stima otro.’”—Huan 13:35.

E siguiente sifranan ta for di un informe ku nos a haña di Ukrania te ku 21 di yüni 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 42 publikadó a muri

• 83 publikadó a ser heridá

• 31.185 publikadó a bandoná nan kas pa bai otro lugá di e pais ku ta mas safe

• 495 kas a ser destruí

• 557 kas tin daño grandi

• 1.429 kas tin daño leve

• 5 Salòn di Reino ta kompletamente destruí

• 8 Salòn di Reino tin daño grandi

• 34 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 52.348 publikadó haña otro lugá mas safe pa keda

• 23.433 publikadó a hui pa otro pais. Einan, nos rumannan ta yudando e publikadónan ei