Na Ukrania, e rumannan ta kontentu pasobra nan por a kuminsá ku e predikashon públiko, i nan a haña vários bon eksperensia. E superintendentenan di sirkuito i e ansianonan a informá sukursal ku hopi hende ta kontentu pa mira nos garoshinan di literatura atrobe. Algun persona a asta bisa ku nan a sinti falta di mira Testigunan di Yehova den nan bario.

Tatiana ta un ruman di Kongregashon Serhiivka na region Odesa. El a disidí di bai bishitá e personanan ku el a yega di papia kuné promé ku e pandemia. El a bisa: “Tabata bisto ku Yehova ta bendishoná nos esfuersonan pa kuminsá predikashon en persona atrobe.” Promé ku e pandemia, Ruman Tatiana a ofresé un señora un kurso di Beibel pero e no a aseptá esei. Awor, el bishitá e señora atrobe, i e señora tabata masha interesá pa papia tokante Beibel. Ademas, awor sí, el a aseptá un kurso di Beibel. Esei a animá Ruman Tatiana hopi. P’esei, el a bisa: “Mi tin ku bai bèk serka tur hende ku mi a yega di bishitá pa wak si nan ke un kurso di Beibel!”

Yevheniy i Lilia ta dos publikadó ku mester a bandoná nan stat, Mariupol. Nan a bai biba na un lugá mas safe na Ukrania. Durante e tempu ei, nan a sigui prediká. Nan ta bisa ku e trabou di prediká a yuda nan pa nan no keda pensa riba nan problemanan. Nan a bisa: “Nos bida a kambia drástikamente, i nos tabata sa ku kos lo no bai bèk manera nan tabata na ántes. No ta fásil pa kuminsá un bida nobo otro kaminda. Apesar di esei, nos sa ku Yehova semper lo yuda nos. E ta yuda nos mediante su spiritu santu, i e ta usa nos rumannan ku ta kla pa yuda nos.”

Na otro lugá na Ukrania, nos rumannan ta duna testimonio pa medio di nan bon obranan. Por ehèmpel, un grupo di ruman na e stat Mykolaiv a yuda un organisashon internashonal hasi reparashon na un depósito pa produkto pa yuda e hendenan den e área. E rumannan a drecha e sistema di awa, pone planki na muraya i sòrter vários tòn di produkto. Ora un señora ku ta representante di e organisashon humanitario a bin kontrolá e trabou, awa a kuminsá basha for di su wowo. El a bisa: “Mi no a ferwagt ku nan lo hasi e trabou asina bon.”

Nos rumannan na Ukrania ta pasando den tempu difísil. Pero nan ta keda aktivo den e trabou di prediká i ta sigui “hasi loke ta bon.” Esei ta yuda nan mantené nan goso.—Galationan 6:9.

E siguiente sifranan ta for di un informe ku nos a haña di Ukrania te ku 13 di yüli 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 42 publikadó a muri

• 97 publikadó a ser herida

• 28.683 publikadó a bandoná nan kas pa bai otro lugá di e pais ku ta mas safe

• 524 kas a ser destruí

• 588 kas tin daño grandi

• 1.554 kas tin daño leve

• 5 Salòn di Reino ta kompletamente destruí

• 10 Salòn di Reino tin daño grandi

• 36 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 52.947 publikadó haña otro lugá mas safe pa keda

• 23.863 publikadó a hui pa otro pais. Einan, nos rumannan ta yudando e publikadónan ei