Den e siman di 23 pa 31 di yüli 2022, hopi publikadó di Ukrania a batisá na e kongreso di 2022: Sigui Buska Pas! Nan a batisá na Ukrania mes i na vários otro pais kaminda nos rumannan di Ukrania a hui bai. Te ku 2 di ougùstùs, 1.113 publikadó di Ukrania a batisá. Un ruman di Ukrania a bisa: “Asta e guera no por a para e trabou di hasi hende disipel. Hesus a kumpli ku su promesa: ‘Mi ta ku boso tur e dianan.’”—Mateo 28:20.

Nos ta kontentu ku nos por kompartí e siguiente eksperensianan:

Natalia ta di e stat Kreminna, Region Luhansk. E tin 63 aña di edat. Natalia i su dos yu muhénan a kuminsá studia Beibel ku Testigunan di Yehova den kareda di e añanan 1990. Su yu muhénan a progresá i batisá. Pero Natalia mes no a batisá. Tempu ku e guera a kuminsá, Natalia a kompañá un famia ku ta Testigu ora nan a hui bai un lugá mas safe. Natalia por a keda na un Salòn di Reino na e stat Ivano-Frankivsk.

Natalia a bisa: “Despues di e bombardeonan teribel, mi tabata sinti mi asina malu ku m’a pensa ku lo mi no por smail mas. E rumannan a mustra mi hopi amor. Mi no a ferwagt ku nan lo a kuida mi asina bon. Mi a kuminsá stima Yehova. Mi tabata lesa mi Beibel hopi, i un ruman muhé a ofresé mi un kurso di Beibel den e buki Bo Por Disfrutá di Bida pa Semper! E ruman ei tabata manera un regalo di Yehova.” Natalia a sigui bisa: “Mi ta masha kontentu ku mi a logra batisá komo un Testigu di Yehova. Mi ke obedesé e mandamentu di mas grandi: stima Yehova mi Dios ku ‘henter mi kurason, ku henter mi alma i ku henter mi mente.’”—Mateo 22:37.

Olia ta di e stat Cherkasy, i e tabata un publikadó no batisá ora e guera a kuminsá. Dia 6 di mart, Olia a hui bai Polonia ku su yu muhé i su ñeta. Olia a bisa: “Ora nos a yega Polonia nos tabatin solamente nos tas, pero e rumannan a kuida nos bon. Loke nos a pasa aden a konvensé mi ku Yehova su organisashon ta uní i ku Yehova ta guia su pueblo ku su spiritu santu. Ademas, mi tabata mas determiná pa dediká mi bida na Yehova. Yehova a yuda mi durante e momentonan di mas difísil di mi bida. Awor, mi ke sirbi Yehova i mustr’é ku mi ta apresiá loke el a hasi pa mi.”

Yulia ta di Region Donetsk. E tin 18 aña di edat. El a lanta den un famia ku ta Testigu, pero nunka e no a logra batisá. El a konta un eksperensia di loke a pasa poko despues ku e guera a kuminsá. El a bisa: “Mi tabata bentá riba flur, i mi a bin realisá ku un ora pa otro mi por a muri. Henter e kaya kaminda mi famia tabata biba tabata destruí, pero nos tabata na bida ainda. Despues di e eksperensia ei, mi a kuminsá hasi orashon na Yehova i meditá riba su kualidatnan. Mi tabata hala mas serka Yehova i mi no tabata duda mas pa dediká mi bida na Yehova. Yehova a kontestá mi orashonnan, i asina el a mustra mi ku e tabata serka di mi. Promé, mi tabata djis sa ken Yehova ta, pero awor, mi ta stim’é.” Dia 23 di yüli Yulia a batisá.

David tin 11 aña di edat. Ora e guera a kuminsá, David a hui bai Alemania ku su famia. E tabata un publikadó no batisá for di tempu ku e tabatin 9 aña di edat. E tin gana di logra e metanan spiritual ku e tin. El a bisa: “Mi a disidí di batisá pasobra mi ta stima Yehova i mi kier ta su amigu. Durante mi boutismo, mi tabata asina kontentu ku mi a kuminsá yora. Mi ta kontentu ku mi ta forma parti di Yehova su famia. Mi gusta konta otro hende tokante Yehova i su propósito pa humanidat. Pues, mi siguiente meta ta pa bira un pionero regular. Mi ke yuda e rumannan den kongregashon tambe. Pues, mi ta spera ku lo mi por bira un sirbidó ministerial. Mi meta di mas grandi ta di bai traha na Bètel. Di tempu ku mi a bishitá Bètel na Lviv na aña 2018, mi tabatin e soño pa bai traha na Bètel.”

Olena ta di Kiev. El a bira un publikadó no batisá na aña 2011. E tabata inaktivo pa 10 aña. Na 2020, e ansianonan di su kongregashon a tuma kontakto kuné, i nan a dun’é e foyeto Bolbe Serka Yehova. El a bisa: “Despues di nan bishita, mi a kuminsá studia Beibel atrobe i bai reunion. Pero, despues di poko tempu, mi a stòp atrobe. Durante e guera, Yehova a kontestá mi orashonnan. Anto mi a realisá ku Yehova a protehá mi, mustra mi ku e ta stima mi i duna mi pas mental. Mi a hui bai Rumania, i einan, mi a haña e Testigunan. E rumannan a mustra mi hopi amor i nan a kuida mi masha bon mes. Mi a sinti ku nan amor tabata manera un dushi deken ku Yehova a tapa mi kuné.” Dia 23 di yüli Olena a batisá. Por último, el a bisa: “Mi ta masha gradisidu na Yehova ku e tabatin asina tantu pasenshi ku mi. Awor mi sa ku ‘pa tur kos mi tin forsa pa medio di esun ku ta duna mi poder.’”—Filipensenan 4:13.

E siguiente sifranan ta for di un informe ku nos a haña di Ukrania te ku 2 di ougùstùs 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 43 publikadó a muri

• 97 publikadó a ser heridá

• 22.568 publikadó a bandoná nan kas pa bai otro lugá di e pais ku ta mas safe

• 586 kas a ser destruí

• 613 kas tin daño grandi

• 1.632 kas tin daño leve

• 5 Salòn di Reino ta kompletamente destruí

• 10 Salòn di Reino tin daño grandi

• 37 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 53.836 publikadó haña otro lugá mas safe pa keda

• 24.867 publikadó a hui pa otro pais. Einan, nos rumannan ta yudando e publikadónan ei