Gran parti di e infrastruktura na algun parti di Ukrania a sufri hopi daño òf a ser destruí debí na bombardeo. P’esei, hopi di nos rumannan no tin koriente. Pero nan no ta laga esei stroba nan di asistí na reunion of di partisipá den otro aktividat teokrátiko.

Anastasia i Debora ta sirbi komo pionero regular na Kiev. Nan a bisa ku pa por lo ménos 12 ora pa dia nan no tin koriente. Ora nan tin koriente, nan ta karga nan aparatonan elektróniko. Asina, nan por usa nan pa wak reunion ora koriente bai. Ademas, nan ta kumpra data pa wak e reunionnan. Hopi biaha, e konekshon di data ta wanta nèt te ora reunion kaba.

E problemanan ku koriente ta pone ku nos rumannan ta haña nan ku otro difikultat. Algun di nan no tin sufisiente kalefakshon (verwarming). Tin biaha, nan tin ku usa un generator ku ta pafó di kas pa nan por haña koriente i mantené nan kas kayente. Otro ruman ta muda bai serka nan famianan ku sí tin kalefakshon. Nos ta kontentu ku hopi di nos rumannan tin kas òf apartamento ku tin kalefakshon via e ret di gas. Pues, nan ta sigui haña gas apesar di e blèkoutnan.

Iryna ta un pionero ku ta biba na e stat Ivano-Frankivsk. E ta purba di keda positivo den e situashon difísil akí. E ta bisa: “Mi a disidí ku mi no ta bai konsentrá riba kos ku mi no tin kontrol ariba. Pues, mi ta purba di no preokupá muchu ku e kosnan ku lo pasa den futuro; mi ta djis enfoká riba loke ta pasando den e oranan ku tin mi dilanti. Mi ta purba di pensa di antemano loke mi por hasi durante un blèkout i hasi sigur ku mi tin e publikashonnan ku mi tin mester.”

Maske nos rumannan ta enfrentá vários difikultat, nan ta sigui hasi tur loke nan por den nan sirbishi pa Yehova. Nos tin sigur ku Yehova lo sigui bendishoná tur nan esfuersonan pa “hasi loke ta bon.”—Galationan 6:9.

E siguiente sifranan ta for di un informe ku nos a haña di Ukrania te ku 6 di desèmber 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 47 publikadó a muri

• 97 publikadó a ser heridá

• 11.537 publikadó a bandoná nan kas pa bai otro lugá di e pais ku ta mas safe

• 590 kas a ser destruí

• 645 kas tin daño grandi

• 1.722 kas tin daño leve

• 7 Salòn di Reino ta kompletamente destruí

• 19 Salòn di Reino tin daño grandi

• 68 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 54.212 publikadó haña otro lugá mas safe pa keda

• 26.811 publikadó a hui pa otro pais. Einan, nos rumannan ta yudando e publikadónan ei