Mas o ménos 3.000 kas di Testigunan di Yehova na Ukrania a sufri daño òf ser destruí desde ku e guera a kuminsá na febrüari 2022. Na ougùstùs, e rumannan na Ukrania a kuminsá drecha algun di e kasnan ku a sufri daño. Nan ta hasi e trabounan ei kaminda ta safe pa hasi esei. Departamento di Trabou di Ousilio i Departamento Lokal di Diseño i Konstrukshon ta supervisá e trabounan ei. E trabounan ta enserá, entre otro, drecha dak ku a haña daño, kambia bentana i otro reparashon chikitu. Tin biaha, ora ta trata di un kas ku a ser destruí, e rumannan ta kombertí un garashi, òf ket (schuur) den un kas simpel. Te ku awor, e rumannan a logra kaba ku 37 proyekto di konstrukshon. Tin 48 proyekto di konstrukshon andando.

No ta fásil pa hasi e trabounan di konstrukshon durante un tempu asina turbulento. Pero e rumannan no a laga esei stroba nan di yuda den e trabounan di rekonstrukshon. Un ruman muhé ku yama Svitlana tin 70 aña di edat, i e ta biba na e stat Velyka Dymerka, na Region Kiev. El a bisa: “Mi no tabatin sèn pa drecha e dak i e parti dilanti di mi kas. Pero Yehova tabatin un sorpresa grandi pa mi. Mi rumannan den fe a bin hasi e trabounan, i nan a kaba tur kos den tres dia.”

Un ruman muhé ku yama Nadiia ta biba na e stat Horenka, na Region Kiev. El a splika kon e trabounan di ousilio ta yudando e rumannan den e trabou di prediká. El a bisa: “E trabounan di konstrukshon ta dunando un testimonio grandi den nos komunidat. Asta hende ku mi no konosé ta papiando tokante e amor ku e rumannan ta mustrando pa otro. Nan no por kere ku mi kompañeronan den fe a bin yuda mi.”

Asta e rumannan ku a pèrdè nan kas ta yudando ku e trabounan. Por ehèmpel, e kas di Ruman Yevhen i Tetiana a ser destruí ora un bòm a eksplotá riba e kas. Na lugá di keda sinti duele di nan mes, nan ta trahando duru pa yuda nan rumannan. Ruman Yehven a bisa: “Semper nos tabata gusta yuda otro hende. Esei ta yuda nos trata ku nos mes problemanan.”

Un ruman muhé ku yama Lidiia ku ta biba na e stat Hostomel, Region Kiev a hasi algu similar. E rumannan a drecha Lidiia su kas. Esei a motivá Lidiia pa bai yuda ku e trabounan di ousilio. El a bisa: “Pa dos siman, 16 ruman hòmber i ruman muhé a yuda drecha mi kas. Pa mi, tabata manera mi tabata den mundu nobo kaba. Awor, mi tambe ke yuda otro ruman.”

Resientemente, un miembro di Komité di Sukursal di Ukrania a bishitá e lugánan kaminda e rumannan ta hasi trabou di ousilio pa animá e rumannan ku a pèrdè nan kas. El a bisa: “Semper e rumannan di Ukrania ta mustra amor na otro. Sinembargo, durante e guera akí, e rumannan a sera mas ku otro. Ta bunita pa mira kon nos kerido rumannan ta reakshoná riba e yudansa ku nan ta haña: Nan ta sigui hasi mas den e trabou di prediká. Ademas, manera 2 Korintionan 9:12 ta bisa, nan ta mustra na vários manera ku nan ta gradisidu na Dios.”

E siguiente sifranan ta for di un informe ku nos a haña di Ukrania te ku 20 di desèmber 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 47 publikadó a muri

• 97 publikadó a ser heridá

• 11.477 publikadó a bandoná nan kas pa bai otro lugá di e pais ku ta mas safe

• 590 kas a ser destruí

• 645 kas tin daño grandi

• 1.722 kas tin daño leve

• 7 Salòn di Reino ta kompletamente destruí

• 19 Salòn di Reino tin daño grandi

• 68 Salòn di Reino tin daño leve

• Tin 26 Komité di Ousilio na Ukrania

• E komiténan a yuda 54.212 publikadó haña otro lugá mas safe pa keda

• 26.892 publikadó a hui pa otro pais. Einan, nos rumannan ta yudando e publikadónan ei