For di 26 desèmber 2022, pionero regular i pionero spesial por a kuminsá asistí na Skol di Pionero atrobe kaminda ta safe pa hasi esei. E pioneronan por asistí na e skol, sea en persona òf via Zoom. Tur kos ta dependé di e sirkunstansianan lokal. Nos rumannan ta hasi tur loke nan por pa sigui e lèsnan spesial akí. Nan ta hasi esei apesar di vários difikultat, manera bombardeo, blèkout, problema finansiero òf mal konekshon di Internet. Yehova a bendishoná nan rikamente pa nan esfuersonan.

Natalia ku ta biba na e stat Kryvyi Rih a bisa: “E skol di pionero tabata manera un salba bida pa mi. E skol a yuda mi pa mi no hoga den mi preokupashonnan i pa mi no laga miedu poderá di mi.” Anastasia ku ta biba na e stat Chernivtsi a bisa algu similar: “E skol a konvens’é mi ku Yehova ta stima mi masha hopi. Hopi kos teribel a pasa aña pasá, pero e skol a bini nèt na ora. E skol a duna mi forsa pa sigui lucha pa risibí e bendishonnan di Yehova.”

Svitlana ta un pionero ku ta biba na e stat Kitsman. Na promé instante, e tabata preokupá ora el a haña un invitashon pa asistí na e skol di pionero. El a splika: “Mi a bisa Yehova tur mi preokupashonnan, entre otro, mi preokupashon tokante sèn. Mi a konfia den dje, i e no a laga mi na kaya. Yehova a kuida mi, i el a mustra mi ku e ta stima mi.” Svitlana su eksperensia a motivá su kasá ku no ta Testigu pa kuminsá bai reunion di kongregashon.

Na dos okashon, algun pionero ku tabata den un skol di pionero na e stat Zhytomyr mester a buska refugio den un bodega pa motibu di un posibel atake di avion di guera. Nan a usa un fogon pa hasi e kamber kayente pa nan por sigui ku e lèsnan. Un di e pioneronan ei ku yama Valnetyna a kaba di muda pa Zhytomyr. Apesar di e difikultatnan ku nan a pasa aden, el a bisa: “Nunka lo mi no lubidá e skol akí. Mi tabata sinti manera mi tabata bon kuidá bou di e alanan poderoso di Yehova.”

Meskos ku e pioneronan na otro pais, e pioneronan na Ukrania tabata masha kontentu mes pa tende tokante e kambio den e rekisitonan pa pionero. Despues di e anunsio, Yulia a bisa: “Mi tin masha hopi apresio pa Yehova. Awe mainta, mi a roga Yehova pa yuda mi sigui traha den e trabou di pionero regular. Mi no tabata sa kon lo el a yuda mi, pero mi tabatin sigur ku lo el a hasié. Despues ku mi a tende ku e rekisitonan di ora pa pionero a baha, mi a haña mas apresio pa tur loke Yehova ta hasi pa mi. E notisia akí ku nos a haña na final di e skol tabata manera e chèri riba e bolo.”

E siguiente sifranan ta for di un informe ku nos a haña di Ukrania te ku 24 di yanüari 2023. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 47 publikadó a muri

• 97 publikadó a ser heridá

• 8.953 publikadó a bandoná nan kas pa bai otro lugá di e pais ku ta mas safe

• 590 kas a ser destruí

• 645 kas tin daño grandi

• 1.722 kas tin daño leve

• 8 Salòn di Reino ta kompletamente destruí

• 17 Salòn di Reino tin daño grandi

• 76 Salòn di Reino tin daño leve

• Tin 26 Komité di Ousilio na Ukrania

• 46 kas a ser drechá

• 5 Salòn di Reino a ser drechá

• E komiténan a yuda 54.445 publikadó haña otro lugá mas safe pa keda

• 27.655 publikadó a hui pa otro pais. Einan, nos rumannan ta yudando e publikadónan ei