Ku masha tristesa, nos tin ku informá ku, te ku 29 di mart 2022, shete ruman mas a muri na e stat Mariupol. Na tur, 17 di nos rumannan a muri na Ukrania.

Vários Komité di Ousilio na Ukrania ta traha sin stòp pa duna nos rumannan yudansa. Nan ta asta riska nan bida pa yega na nos rumannan den e lugánan kaminda tin bringamentu.

Por ehèmpel, e rumannan ku ta traha huntu ku e komiténan a logra trese kuminda, remedi i otro kos esensial pa nos rumannan na e statnan ku a sufri mas tantu daño, entre otro, Kharkiv, Kramatorsk i Mariupol. Un miembro di un di e komiténan mester a biaha 500 kilometer tur dia i pasa vários blokeo militar pa trese kuminda i remedi pa mas o ménos 2.700 publikadó.

E komiténan ta regla transporte pa saka nos rumannan for di e lugánan kaminda tin bringamentu. Un ruman hòmber ku ta traha ku e komité di Chernihiv a bisa: “Ora e sòldánan a kuminsá bombardiá kas, nos a komprondé ku ta muchu peligroso pa keda na Chernihiv. No tabatin koriente i Internet a kai afó. P’esei, e ansianonan mester a hasi lihé pa informá tur publikadó ku ta tuma refugio den bodega ku tin transporte pa yuda nan sali di e stat.”

Doño di un negoshi di transporte a bai di akuerdo pa usa su bùsnan i su konvoinan pa transportá e rumannan. El hasi nuebe biahe pa logra salba 254 di nos rumannan na e stat Chernihiv. Na un okashon, el a asta drecha un kaminda ku mashin grandi pa su konvoi por a pasa. Nos rumannan ta masha gradisidu pa e yudansa ei.

Nos ta masha tristu pa e rumannan ku a pèrdè ser kerí den e guera akí. Nos ta anhelá pa e tempu yega ku Dios su promesanan den Beibel lo kumpli i ku lo no tin morto ni tristesa mas.—Revelashon 21:3, 4.

E siguiente sifranan ta for di un informe ku nos a haña di Ukrania te ku 29 di mart 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin sigur ku tur sifra ta kuadra, pasobra ta difísil pa mantené kontakto ku nos rumannan na tur parti di Ukrania.

• 17 publikadó a muri

• 35 publikadó a ser heridá

• 36.313 publikadó a bandoná nan kas pa bai otro lugá di e pais ku ta mas safe

• 114 kas a ser destruí

• 144 kas tin daño grandi

• 612 kas tin daño leve

• 1 Salòn di Reino ta kompletamente destruí

• 7 Salòn di Reino tin daño grandi

• 23 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 34.739 publikadó haña otro lugá mas safe pa keda

• 16.175 publikadó a hui pa otro pais. Einan, nos rumannan ta yudando e publikadónan ei