Ku tristesa, nos ta anunsiá ku mas di nos rumannan a muri pa motibu di e guera na Ukrania. Na tur, 28 Testigu di Yehova a muri.

Manera nos por a mira den notisia internashonal, den e promé siman di e guera, tabatin hopi bringamentu na e pueblonan den serkania di Kiev. Na e lugánan ei tin 4.900 publikadó. Di e publikadónan ei, 3.500 a hui pa un lugá mas safe.

E siguiente eksperensianan ta mustra ku nos rumannan na e lugánan ei ta sigui demostrá nan fe firme den Yehova apesar di vários prueba grandi.

Oleksandr ta un ansiano ku tabata biba na e stat Makariv. El a hui pa un lugá mas safe na e parti sentral di Ukrania. Sinembargo, tabatin kuater publikadó den su grupo ku e no a logra haña kontakto kuné; esei a preokup’é hopi. P’esei, el a bai bèk na e lugá kaminda nan tabata biba pa wak si e por a haña nan. El a hasi esei maske e tabata sa ku tabatin bringamentu pisá einan. El a konta: “Mi sa ku Yehova ta balorá su sirbidónan mashá. . . . Ora m’a yega dilanti di kas di un di e publikadónan, mi a mira ku bòm a kai den kurá di e publikadó. E porta di bodega di su kas tabata será i niun hende na e kas no tabata kontestá mi yamadanan. E kos ei a preokupá mi hopi.” Oleksandr a kibra e porta pa drenta e bodega. Ei bou, el a topa un grupo di hende ku a keda wak e. Ta ken nan tabata? Tabata e publikadónan i algun bisiña ku no ta Testigu ku a buska refugio serka e publikadónan.

Un di e publikadónan ku tabata den e bodega yama Yaroslav. El a bisa ku nan a keda den e bodega pa ocho dia. El a konta: “Nos tabatin djis algun buskuchi i un glas di awa pa persona pa dia. Nos tabata lesa Beibel i nos publikashonnan, hasi orashon i animá otro. Ora mi a tende Oleksandr ta grita mi nòmber pafó, m’a pensa ku e sòldánan a bini pa bai ku mi. M’a ègt pensa ku mi ta bai muri. . . . [Pero,] el a salba nos tur. Nos ta masha gradisidu na Yehova ku nos tin un famia spiritual ku ta asina amoroso. Nan ta resa pa nos, i nan ta asta riska nan bida pa salba nos.”

Ruman Pylyp i un otro ruman hòmber a disidí di bai hiba kuminda pa e rumannan ku ainda tabata na e pueblo Borodianka. Nan a bai e pueblo dia 17 di mart. Na kaminda pa e pueblo, algun sòldá a konfiská e outo di Ruman Pylyp i e kuminda ku nan tabatin. Despues, e sòldánan a arestá e dos rumannan. E sòldánan a bui e rumannan, tapa nan wowo i sera nan den un kamber chikitu den un bodega. E sòldánan a laga nan einan huntu ku shete otro hòmber. Dos dia despues, algun vigilante a sera e rumannan den un otro sèl, kaminda nan a bati e rumannan henter anochi. Ruman Pylyp a bisa: “Mi no tabata sa si mi lo a keda na bida. M’a hasi orashon pa mi keda fiel na Dios.”

Na un okashon, miéntras ku nan tabata bati Ruman Pylyp, el a pidi Yehova na bos haltu pa yuda e ruman muhénan di edat avansá ku no tabatin kuminda i pa protehá su famia. Ademas, el a gradisí Yehova pa tur e añanan bunita ku e por a sirbi Yehova. Dado momento, e vigilante a trese Ruman Pylyp bèk na su sèl. Einan, Ruman Pylyp a sigui pidi Yehova pa yuda e sòldánan komprondé ku e rumannan no ta peligroso. Ruman Pylyp i e otro ruman hòmber a kuminsá prediká na e vigilantenan. Pa dos dia largu, nan a prediká na tur e vigilantenan ku a tene warda e dianan ei. Un di e hòmbernan ku tabata será ku nan tabata interesá pa tende e mensahe di Beibel. El a gradisí e rumannan. Dia 27 di mart, e dos rumannan i e persona ku a mustra interes a sali liber.

Svitlana ta un ruman muhé soltera ku tabata biba na Bucha. Pa dos siman largu, e no por a bandoná e área kaminda tabatin bringamentu. El a bisa: “Awor, mi ta ègt komprondé kon presioso e pas ku Yehova ta duna nos ta. Ora nos tin e pas ei, esei no ke men ku semper nos sa kiko pa hasi. Pero ora nos no ta mira un solushon pa nos problemanan, nos ta konfia kompletamente den Yehova.”

Ruman Svitlana a biaha pa un lugá mas safe na Ukrania. Na kaminda, el a duna testimonio na un señora i e señora su subrino. Ora nan tur a yega na un lugá mas safe, un famia ku ta Testigu a yama nan bon biní. E famia Testigu a laga Ruman Svitlana i e señora ku su subrino keda na nan kas e anochi ei. Su siguiente dia, e señora a puntra si e por asistí na un reunion di kongregashon i si e por haña un Beibel i literatura. Ruman Svitlana a keda den kontakto ku e señora.

E siguiente sifranan ta for di un informe ku nos a haña di Ukrania te ku 12 di aprel 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin sigur ku tur sifra ta kuadra, pasobra ta difísil pa mantené kontakto ku nos rumannan na tur parti di Ukrania.

• 28 publikadó a muri

• 48 publikadó a ser heridá

• 40.778 publikadó a bandoná nan kas pa bai otro lugá di e pais ku ta mas safe

• 278 kas a ser destruí

• 268 kas tin daño grandi

• 746 kas tin daño leve

• 1 Salòn di Reino ta kompletamente destruí

• 9 Salòn di Reino tin daño grandi

• 26 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 41.974 publikadó haña otro lugá mas safe pa keda

• 18.097 publikadó a hui pa otro pais. Einan, nos rumannan ta yudando e publikadónan ei