Na region Donetsk, e bringamentu tabata fuerte. Apesar di esei, Ruman Mykola Bozhedomov tabata bai Kramatorsk vários biaha pa yuda mas tantu ruman posibel evakuá e stat pa skapa nan bida.

Sinembargo, dia 8 di aprel 2022, Ruman Mykola a fayesé pa motibu di un bombardeo ku a tuma lugá riba e stashon di trein na Kramatorsk. Ruman Mykola tabatin 58 aña di edat.

Riba e dia ei, mas ku 50 hende a fayesé, i mas ku 100 hende a ser heridá despues di e bombardeo. Entre nan, tabatin un ruman muhé ku a fayesé. Anto, un ruman hòmber a ser heridá. Otro ruman ku a sobrebibí e atake a bisa ku tabatin dos eksploshon masha duru mes, i pida heru di e bòmnan a bula bai tur kaminda.

Ruman Mykola tabatin 22 aña kasá ku Ruman Nina. Ruman Nina a bisa: “Mi kasá semper a pone interes di otro hende promé. Semper e tabata masha interesá pa yuda e rumannan di edat avansá i e rumannan ku tabata malu. Vários biaha, el bai Kramatorsk, pero kada bes tabata bira mas peligroso pa bai. Esaki lo mester tabata su último biaha.”

Ruman Mykola i su kasá a batisá huntu na aña 1997. Ruman Mykola tabata un ansiano pa hopi aña. E rumannan ta dunando Ruman Nina hopi amor i apoyo. Ruman Nina a bisa: “Nan palabranan di konsuelo ta loke ta yudando mi hopi den e momentonan difísil akí.”

Ruman Nina a bisa tambe ku e ta hañando hopi konsuelo for di Beibel. Un teksto ku a anim’é hopi ta Isaías 40:28-31. Ruman Nina a bisa: “Yehova ta yuda mi haña forsa atrobe. Mi ta ègt sinti ku Yehova ta stima mi. Den pasado, mi tabata lesa tokante Yehova su amor den nos publikashonnan. Pero awor, mi mes ta sinti Yehova su amor.”

Nos ta sigui resa pa Ruman Nina i otro ruman ku a pèrdè ser kerí den e guera akí. Nos tin sigur ku Yehova lo sigui sostené nan.—Salmo 20:2.