Ruman Liudmyla Mozul i Ruman Kateryna Rozdorska a sufri hopi pa motibu di e guera. Pero Yehova ta konsolando nan. Ruman Liudmyla su kasá Petro i Ruman Kateryna su kasá Dmytro tabata un di e promé Testigunan di Yehova ku a muri pa motibu di e guera na Ukrania. Lamentablemente, te ku awe, 34 di nos rumannan a muri pa motibu di e guera.

Ruman Petro i Liudmyla a batisá na aña 1994. Nan tabatin 43 aña kasá.

Ruman Liudmyla a bisa: “Tur dia, mi rumannan ta animá mi. Nan ta sigui yama mi na telefòn pa animá mi. Ademas, m’a haña un karta di sukursal ku tabata asina bunita ku awa a basha for di mi wowo ora mi tabata les’é.”

E guera a kuminsá dia 24 di febrüari 2022. Ruman Petro tabata sirbi komo sirbidó ministerial den un kongregashon di idioma di seña. El a muri riba 1 di mart 2022 ora e ku su famia tabata purba di hui for di e bombardeonan na e stat Kharkiv.

Riba e dia ei, despues ku tabatin vários dia di bombardeo, avion di guera a kuminsá ataká e stat. Ruman Petro i su famia a kohe djis e kosnan nesesario, i nan a sali den 30 minüt. Ruman Petro ku Liudmyla tabata den un outo i nan yu hòmber, Oleksii, i su kasá, Maryna, tabata den un otro outo. Liudmyla a konta: “Nos tabata kore riba kaminda den un área residensial. Dado momento, tabatin un atake aéreo kaminda nos tabata kore. Nos outo tabata sagudí pisá pa motibu di e bombardeonan.”

Ruman Petro, kende tabatin 67 aña di edat, a kore hala un banda pa evitá di dal kontra e outo di Ruman Oleksii. Tòg, el a haña basta herida grave. Ruman Petro ku su kasá Liudmyla mester a ser hibá hospital. Poko despues, Ruman Petro a muri. Ruman Liudmyla tambe tabatin herida. E tabatin pida heru di e bòmnan den su pia i barika. Oleksii ku Maryna no a ser heridá. Tres dia despues ku Ruman Liudmyla a sali for di hospital, el a haña sa ku su kasá a fayesé.

Ruman Liudmyla a bisa: “Ora mi meditá riba Yehova su bondat i su maravioso propósito pa futuro, esei ta laga mi sinti mi mas trankil. Mi tin sigur ku lo mi mira mi kasá atrobe den e mundu nobo. Mi ta anhelá pa e bunita dia ei yega.”

Ruman Dmytro ku Kateryna tabatin ocho aña kasá. Dia 8 di mart 2022, Ruman Dmytro a yama su kasá for di trabou, algun ora promé ku el a muri. Ruman Dmytro su último palabranan tabata: “Un djis mi ta bini kas.”

Algun ora despues, un kolega di Ruman Dmytro a yama Ruman Kateryna. E kolega a bisa ku Ruman Dmytro a trapa riba un mina, i e mester a ser transportá pa hospital. Ruman Dmytro a muri sinku ora despues di su operashon.

Despues ku Ruman Kateryna a haña sa ku su kasá a muri, el a bisa: “E anochi ei, Yehova a gara mi man tene, i el a kargá mi den su brasanan. Mi tabata sinti ku Yehova tabata ku mi.”

Ruman Dmytro tabatin 28 aña di edat. El a batisá na aña 2006, i e tabata sirbi komo ansiano den Region Donetsk na Ukrania.

Poko despues di Ruman Dmytro su entiero, Ruman Kateryna a biaha 12 ora pa e por a bai un lugá mas safe na Ukrania. El a bisa: “Mi a haña masha tantu animashon di mi rumannan di tur parti di Ukrania i asta di otro pais. Nan a mustra hopi amor na mi, i esei a fria mi doló.”

El a sigui bisa: “Sirbishi tambe a yuda mi. . . . Ora mi ta sinti mi hopi tristu, mi ta pensa riba teksto di Beibel ku mi a siña for di kabes, manera Filipensenan 4:6 i 7. I mi ta bisa nan na bos haltu.”

Nos tin sigur ku Yehova lo sigui fortalesé i konsolá nos rumannan ku a pèrdè ser kerí pa motibu di e guera na Ukrania.—Salmo 61:1-3.