Na ougùstùs 2022, a ser anunsiá ku lo a reanudá e predikashon di kas pa kas den algun área na Ukrania kaminda ta safe pa hasi esei. Nos rumannan tabata ansioso pa kuminsá prediká di kas pa kas atrobe. Nan a ripará ku hopi hende tabata mustra interes den mensahe di Beibel. Un persona ku a aseptá un estudio di Beibel a bisa: “Despues di a mira e kosnan horibel ku ta tumando lugá durante e guera i kuantu hende ta sufri pa motibu di e guera, a bira bisto ku ta Dios so por resolvé e problemanan di humanidat.” Aki ta sigui algun eksperensia.

Ruslan, un ruman di Kongregashon Lanivtsi, tabata un poko nèrvioso pa kuminsá prediká di kas pa kas atrobe. E ku su esposa a hasi orashon na Yehova pa Yehova duna nan kurashi i yuda nan haña hende ku ta interesá den un mihó futuro. Nan a keda asombrá pasobra despues di apénas dos ora predikando, nan a papia ku ocho hende. Anto, tur ocho persona a aseptá un estudio di Beibel.

Olha i un otro ruman di Kongregashon Kremenets tabata predikando di kas pa kas. Un hòmber a aserká nan pa puntra si nan tabata papiando ku hende tokante Palabra di Dios. E hòmber a bisa nan: “Mi ta huma, i mi ta bebe di mas. Mi a komprondé ku pronto lo mi tin ku para dilanti di Dios pa duna kuenta na dje. Ora e momento ei yega, mi no ke ta e persona ku mi ta awor.” Nan a traha un afsprak kuné pa kuminsá un estudio di Beibel.

Ruman Vasyl di Kongregashon Lviv-Riasne-Skhidnyi tabata den sirbishi ku su grupo di sirbishi. El a rekonosé kas di un señora ku el a yega di papia kuné algun aña promé. El a kòrda ku e señora tabata rabiá i ku e no tabata ke papia ku Testigunan di Yehova. Ruman Vasyl a disidí di bati na e señora su porta pa ofres’é un estudio di Beibel. Pa su sorpresa, e mesun señora a bini na porta. E señora a bis’é ku e ke sa mas tokante e Skrituranan Santu. E señora a aseptá un estudio di Beibel, i nan a traha un afsprak kuné pa bishit’é atrobe.

Serhii, kende ta den Kongregashon Illintsi, a batisá na aña 2021. Nunka el a yega di prediká di kas pa kas. E tabata nèrvioso; p’esei, el a tuma tempu pa prepará masha bon mes. Serhii a bisa: “Mi a wak e vidionan di ehèmpel pa presentashon masha hopi biaha. Despues di a hasi esei, ta kurashi so mi tabatin mester.” Serhii a bisa ku ora el a haña oportunidat pa papia ku hende tokante e bon notisia, el a bira masha kontentu. E no tabatin miedu mas.

Nikol di Kongregashon Rozdil tambe tabatin un eksperensia similar. El a batisá na ougùstùs 2022. El a bisa: “Mi tabata hopi nèrvioso; mi tabatin asta miedu pa prediká na hende en persona. Pero despues, mi a eksperensiá kon dushi ta pa papia personalmente ku hende tokante Yehova!”

E siguiente sifranan ta for di un informe ku nos a haña di Ukrania te ku 11 di novèmber 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 46 publikadó a muri

• 97 publikadó a ser heridá

• 12.569 publikadó a bandoná nan kas pa bai otro lugá di e pais ku ta mas safe

• 590 kas a ser destruí

• 645 kas tin daño grandi

• 1.722 kas tin daño leve

• 6 Salòn di Reino ta kompletamente destruí

• 19 Salòn di Reino tin daño grandi

• 63 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 53.948 publikadó haña otro lugá mas safe pa keda

• 25.983 publikadó a hui pa otro pais. Einan, nos rumannan ta yudando e publikadónan ei