Sukursal di Ukrania ta traha huntu ku 27 Komité di Ousilio pa yuda nos rumannan na Ukrania ku mester a bandoná nan kas. For di komienso di e guera te ku awor, e rumannan na Ukrania a importá 250 tòn di produkto for di Polonia pa yuda nos rumannan. E produktonan ta entre otro kuminda, paña i produkto higiéniko. Ademas, 80 tòn di kuminda a bini di nos rumannan ku ta biba na otro parti mas safe na Ukrania.

Un ruman ku yama Valentyna ta biba na Kiev. El a manda un karta tokante e yudansa ku el a haña di e rumannan ku ta traha huntu ku Komité di Ousilio. El a bisa: “Ora e bringamentu a kuminsá tabata masha peligroso pa keda na Kiev. P’esei, mi a bai for di Kiev pa un pueblo chikitu den region Cherkasy. Awor, mi tin un poko mas ku dos luna einan. E rumannan den e kongregashon akí a kuida mi masha bon mes. Nan a trese vários kaha ku kuminda i produkto higiéniko. Loke nan a hasi a pone mi hemut yena. Den un di e kahanan tabatin un pintura di un hermanita di 4 aña di edat ku yama Blanca. Ademas, tabatin un pòstkart pintá ku waterverf. . . . Mi ta warda e pinturanan pa mi no lubidá e bondat ku e rumannan a mustra mi. Mi ke yama mi rumannan, i spesialmente Yehova, masha danki.”

Un ruman desabilitá di 83 aña di edat tambe a skirbi un karta. Su nòmber ta Valentyna, i e tabata biba na Sieverodonetsk. El a bisa: “Ora e guera a kuminsá, mi tabata biba mi so. Mi tabatin un yu hòmber, pero el a muri promé ku e guera. Mi tabatin masha hopi miedu mes, pasobra nos stat tabata ser bombardiá henter dia. No tabatin awa, ni koriente, ni gas. Anto e konekshon di Internet tabata masha malu. Mi ta masha gradisidu ku e rumannan a riska nan bida pa yuda mi.”

El a sigui bisa: “Despues, e rumannan a trese ami i dos otro ruman muhé desabilitá pa Dnipro, un stat mas safe. Na Dnipro, e rumannan a yuda nos haña un lugá pa keda. Awor, mi ta biba ku un famia ku ta Testigu. Nan ta kuida mi asina bon ku mi ta sinti komo si fuera mi ta parti di nan famia. Nan a yuda mi buska un telefòn pa mi por asistí i partisipá na reunion via konferensia di vidio. Nunka lo mi lubidá e kariño ku e rumannan a mustra mi.”

Nos ta yama Yehova, nos Tata amoroso masha danki, pasobra e ta kuida nos rumannan na Ukrania masha bon mes. Nos rumannan na Ukrania “no falta nada ku ta bon.”—Salmo 34:10, NW.

E siguiente sifranan ta for di un informe ku nos a haña di Ukrania te ku 7 di yüni 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 42 publikadó a muri

• 82 publikadó a ser heridá

• 46.145 publikadó a bandoná nan kas pa bai otro lugá di e pais ku ta mas safe

• 469 kas a ser destruí

• 540 kas tin daño grandi

• 1.405 kas tin daño leve

• 5 Salòn di Reino ta kompletamente destruí

• 8 Salòn di Reino tin daño grandi

• 33 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 50.663 publikadó haña otro lugá mas safe pa keda

• 22.995 publikadó a hui pa otro pais. Einan, nos rumannan ta yudando e publikadónan ei