Dia 24 di febrüari 2022, guera a kuminsá na Ukrania. Míles di Testigu di Yehova ainda ta biba na algun parti di Ukrania ku tin hopi bringamentu. Un grupo di 21 ruman hòmber di e statnan Kremenchuk i Poltava a demostrá ku nan ta stima nan rumannan mashá. Nan ta dispuesto pa bai na e partinan di Ukrania kaminda tin bringamentu pa yuda nan rumannan sali for di e áreanan ei. Ademas, nan ta entregá produkto nan nos rumannan den nesesidat.

E rumannan ei a hasi e biahenan akí 80 biaha den 6 siman. Na tur, nan a biaha 50.000 kilometer pa yega na e statnan ku a sufri hopi pa motibu di e guera. Un di e statnan ei ta Kharkiv. Einan, nan a yuda 400 di nos rumannan evakuá.

Te ku awe, nan a entregá 23 tòn di kuminda. Nan a entregá tambe remedi, gasolin i otro produkto. Promé ku e rumannan akí sali bai pa yuda nan rumannan, nan ta wak bon ki ruta ta mas safe i ta purba di evitá e áreanan kaminda tin hopi bringamentu. Tin biaha, nan biahe por dura 19 ora largu, pasobra e ruman hòmbernan mester para na vários blokeo militar pa nan outo ser listrá.

Na kaminda, e ruman hòmbernan por asta mira avion di guera bula. Nan ta mira vários edifisio ku a ser bombardiá. Nan ta topa tambe ku vários tanki di guera i outo ku a ser destruí. Na algun okashon, e ruman hòmbernan a sinti kon tera tabata sagudí ora bòm eksplotá den bisindario.

Dia 2 di aprel 2022, Ruman Roman tabata preparando algun produkto pa nos rumannan na Kharkiv. Diripiente, hopi misil a kuminsá kai riba kaminda. El a kore tuma refugio den un edifisio ku tabata serka di dje. Trinta minüt despues, el a mira kon e bombardeonan a destruí e kaminda ku e mester a tuma.

Ruman Volodymyr ta un di e boluntarionan ku a ofresé nan mes pa yuda kore e outonan ku ta entregá e produktonan. El a bisa lo siguiente tokante e situashonnan peligroso ku nan ta enfrentá: “Nos ta roga Yehova pa sabiduria pa nos tuma bon desishon.”

Ruman Oleksandr i su kasá, Valentyna, tabata biba na Kharkiv huntu ku Ruman Oleksandr su mayornan di edat avansá. Ora e atakenan tabata tumando lugá na nan stat, for di nan bentana, nan tabata mira bòm eksplotá apénas 100 meter for di nan kas. Komo ku nan no tabatin outo, nan no por a evakuá e stat.

Dado momento, e rumannan a yega nèt na ora pa yuda nan evakuá. Ruman Oleksandr a bisa: “Nos tabata gradisí Yehova pa e rumannan ku a yuda nos.”

Vasyl, su kasá, Natalia, i nan tres yunan tabata vários dia skondí den bodega di nan kas. Dia 28 di febrüari 2022, un bòm a eksplotá serka di nan kas miéntras ku nan tabata den bodega. E eksploshon tabata asina fuerte ku el a destruí henter nan kas. Ruman Vasyl ta kòrda kon duru e eksploshon a zona i ku tur lus den bodega a paga.

Ora ku e bringamentu a stòp un tiki, Ruman Vasyl i su famia a tuma refugio den bodega di un otro edifisio den bisindario. Dia 3 di mart 2022, e rumannan a haña e famia. E rumannan a yuda e famia evakuá e stat pa bai un lugá mas safe na Ukrania.

Ruman Vasyl a splika kon e tabata sinti despues ku e rumannan yuda nan bai un lugá mas safe. El a bisa: “Nos tabata asina gradisidu na Yehova. Maske tabata djis un siman, loke nos a pasa aden tabata parse un eternidat. Pa promé biaha, nos por a kome huntu atrobe na pas sin preokupá tokante siguridat di nos yunan.”

Ruman Oleksandr, un di e rumannan ku ta yuda transportá e produktonan pa nos rumannan, a bisa ku e asignashonnan pa bai yuda nos rumannan evakuá ta demostrá ku Yehova su pueblo ta uní. El a bisa: “M’a mira ku Yehova di bèrdat ta kuida su pueblo. Mi tabata masha kontentu pa mira riba kara di mi rumannan kon gradisidu nan ta.”

Nos ta apresiá nos ruman hòmbernan ku ta mustra tantu kurashi. Nos ta pidi Yehova pa sigui bendishoná nan pa e sakrifisio propio ku nan ta demostrá.—Romanonan 12:10.