Dia 24 di febrüari 2022, zonido fuerte a lanta mi for di soño. Na promé instante, m’a pensa ku ta bos, pasobra awa tabata yobe. Pero despues m’a ripará ku mi tabata tende zonido di bòm.

E ora ei, mi tabata sa ku mi mester a bandoná mi kas. Mi tabata biba den sentro di Mariupol. Su siguiente dia, mi a bai keda na kas di mi wela Iryna. E ta biba un tiki pafó di stat. Poko despues, mi mama tambe a bini serka nos. Pues, tabata ami, mi mama, mi wela i mi primu. Tabata mas safe na kas di mi wela. Tòg, nos mester a keda drumi den bodega.

Un biaha, un bòm a kai den kurá di mi wela. Nos tabata skondí den bodega. E eksploshon a zona masha duru mes. Mi tabata hasi hopi orashon na Yehova. Despues di un siman, nos a bin realisá ku no tabata safe mas pa keda na kas di mi wela. Pues, nos a disidí di bai bèk na sentro di stat pa buska un manera pa evakuá. Mi a roga Yehova pa nada no pasa nos i pa e yuda nos haña un manera pa evakuá e stat.

Mainta, dia 4 di mart, niun trein no tabata sali di Mariupol pasobra e stat tabata rondoná di sòldá. P’esei, nos a disidí di tuma refugio den teater di e stat. Nos a keda dies dia einan, i tabatin sentenáres di otro hende einan. Tabatin asina tantu hende ku nos mester a drumi riba flur. E situashon higiéniko na e teater tabata masha malu mes. Tabata masha difísil pa haña kuminda òf awa kayente; nos tabata para den rei pa hopi ora.

Un dia, un bòm a eksplotá serka di e teater. E eksploshon tabata asina duru ku el a kibra hopi di e bentananan di e teater. Esei a pone ku aire friu a drenta paden; tabata hasi masha friu mes.

Loke a yuda mi hopi durante e tempu difísil ei tabata e relato tokante Yòb. Ora mi tabata mira hende drenta pániko despues di zonido di eksploshon, mi tabata lesa e relato tokante Yòb den mi Beibel. E relato tabata yuda mi sinti mas trankil. Tabata komo si fuera Yòb tabata huntu ku mi den e teater, i mi tabata bis’é: “Awor sí mi ta komprondé kiko bo a pasa aden.” Mi tabata pensa: Yòb a pèrdè tur kos. El a pèrdè su famia, su pertenensianan, i el a bira malu. Mi tambe a pèrdè kos material. Pero ainda mi tabatin mi famia, i nos tabata na bida i bon di salú. Pues, m’a realisá ku mi situashon no tabata mes malu ku e situashon di Yòb. Esei yuda mi sinti mihó.

Riba 14 di mart, nos a tende ku un grupo a logra evakuá e stat. Pues, nos a disidí di bai tambe. Nos a logra haña transporte huntu ku algun otro persona ku tabata na e teater.

Un total di 20 vehíkulo a sali for di e stat. Nos tabata 14 persona den un bùs chikitu. Nos tabata sinta basta pèrtá. Durante henter nos biahe, bòm tabata eksplotá tur rònt di nos. Mi tabata hasi orashon sin stòp. Ora nos a logra sali for di Mariupol, e konduktor di nos bùs a stòp e bùs, sali pafó i basha na yoramentu. E tabata asina emoshoná, pasobra el a logra evitá tur e minanan riba kaminda. Despues, nos a tende ku dos dia despues ku nos a evakuá e stat, e teater a ser bombardiá. Por lo ménos, 300 hende a muri.

Despues di 13 ora, nos a yega e stat Zaporizhia. Su manisé mainta, nos a subi un trein ku a hiba nos Lviv. Riba e trein, tabatin 16 hende den un sekshon di e trein kaminda normalmente 4 hende ta sinta. Tabata hasi masha kalor mes. Durante kasi henter e biahe, mi a para den un pasio di e trein. Ta einan so mi por a haña airu fresku. Dia 16 di mart, nos a yega Lviv. Einan, nos rumannan a duna nos un kaluroso bon biní. Nos a keda den un Salòn di Reino pa kuater dia. E rumannan a kuida nos a asina bon ku mi a kuminsá yora. Esaki tabata un regalo di Yehova.

Dia 19 di mart, nos a disidí di bandoná Ukrania. Nos a bai Polonia. Einan tambe, nos rumannan a bin yama nos bon biní. Nan a duna nos tur loke nos tabatin mester. Nos por a sinti nan amor pa nos.

Mi tin solamente 19 aña di edat. Pero ya kaba mi a siña un lès importante for di tur loke nos a pasa aden: Ta masha importante pa nos fortalesé nos fe ora kos ta bai bon. Fe ta yuda bo sobrebibí. Si mi no tabata hasi estudio personal promé ku e guera, kos lo tabata hopi mas duru pa mi.

Yehova ta un Tata amoroso. Den tur loke nos a pasa aden, mi a sinti komo si fuera e tabatin mi man drechi tené. E tabata guia mi den tur kos. Mi no por kaba di gradisí Yehova pa tur loke el a hasi pa mi.—Isaías 41:10.