Riba 24 di febrüari 2022, Rusia a invadí Ukrania. Tin mas ku 129.000 Testigu di Yehova (sin konta nan yunan) ku ta biba na Ukrania. E sukursal na Ukrania a forma 27 Komité di Ousilio pa yuda nos rumannan. Nos rumannan na Ukrania ta mustrando berdadero amor kristian. Nan ta dunando yudansa práktiko i sosten emoshonal na otro i na nan próhimo durante e tempu di krísis akí.

Mayoria di nos rumannan a keda na Ukrania, pero algun di nan a tuma e desishon personal pa bandoná e pais. E rumannan ku a hui a keda pegá den fila largu. Tin biaha, e filanan akí tabata 30 kilometer largu. Ademas, nan mester a warda entre tres pa kuater dia pa pasa duana. Tabatin ruman na Ukrania mes ku tabata duna e rumannan ku tabata warda den fila algu di kome òf di bebe i nan tabata duna otro yudansa práktiko. Anto ora ku finalmente e rumannan di Ukrania ku tabata hui a logra pasa frontera i drenta otro pais, nan tabata topa vários ruman ku tabata yama nan bonbiní ku bòrchi di jw.org. E rumannan ei tabata kla pa konsolá i yuda nos rumannan di Ukrania.

• Ku tristesa, nos mester informá ku, riba 1 di mart 2022, 1 ruman surdu na Kharkiv a muri durante e bombardeonan. Su kasá a ser gravemente heridá

• 3 otro ruman tambe a ser heridá

• Mas ku 5.000 publikadó a bandoná nan kas

• 2 kas a ser destruí

• 3 kas tabatin daño grandi

• 35 kas tabatin daño leve

• 2 Salòn di Reino tabatin daño

• Hopi publikadó a pèrdè koriente, kalefakshon (verwarming), telefòn i no tabatin sufisiente awa.

• Sukursal a forma 27 Komité di Ousilio

• E komiténan a yuda 867 publikadó haña otro lugá mas sigur pa keda

• E komiténan ta trahando pa pèrkurá loke e rumannan tin mester, manera kuminda i awa

E sifranan aki riba ta di e promé informenan ku a drenta.

Nos ta pidi Dios pa duna nos rumannan sabiduria i komprondementu pa trata ku e situashon difísil akí i pa e yuda nan sigui mustra berdadero amor kristian.—Proverbionan 9:10; 1 Tesalonisensenan 4:9.