Maneho General di Privasidat

•  Rèspèt pa Bo Privasidat

•  Informashon di e Data Controller

•  Siguridat i Konfidensialidat di Dato Personal

•  Persona Menor di Edat

•  Suministradó di Servisio Eksterno

•  Notifikashon ora Hasi Kambio na e Maneho Akí

•  Active Scripting òf JavaScript

Wak Tambe

• Maneho Mundial di Testigunan di Yehova pa Protekshon di Dato Personal

• Maneho Mundial di Uso di Dato Personal

• Maneho Mundial di Uso di Cookie i Otro Teknologia Similar

Nos ta komprometé nos mes pa protehá i respetá bo privasidat. E Maneho akí ta indiká kon nos lo prosesá kualke dato personal ku nos kompilá di bo òf ku bo mes a suministrá riba e website akí. Ora bo bishitá nos website, nos ta warda algun informashon básiko di bo, i nos ta rekonosé e importansia di protehá e informashon ku nos warda di bo, i laga bo sa kiko nos ta bai hasi kuné. Bo por disidí di duna nos sierto dato ku ta ser konsiderá dato personal. Den e Maneho di Privasidat akí, e término “dato personal” ta referí na informashon manera bo nòmber, e-mail, adrès, number di telefòn i kualke otro informashon ku por usa pa identifiká bo. Bo no tin obligashon di duna nos niun di bo datonan personal pa bo por nabegá e parti públiko di e website akí. E término “website” ta inkluí e website akí i e websitenan ku ta asosiá kuné, manera apps.pr418.com, ba.pr418.com, stream.pr418.com i wol.pr418.com.

Doño di e website akí ta Watchtower Bible and Tract Society of New York, Inc. (“Watchtower”), un korporashon no komersial di New York ku ta apoyá e aktividatnan di Testigunan di Yehova i nan edukashon bíbliko. Si bo disidí boluntariamente di habri un kuenta, hasi un donashon, pidi un kurso di Beibel grátis òf hasi kualke otro kos riba e website akí i pa hasi esei bo tin ku duna nos sierto dato personal, esei ta enserá na mes momento ku bo ta bai di akuerdo ku e Maneho akí i ta duna outorisashon pa warda bo datonan personal riba server situá na Merka, komo tambe pa kompilá, prosesá, i transferí bo datonan, i pa Watchtower i otro organisashonnan ku ta kooperá i duna sosten na Testigunan di Yehova den vários pais warda bo datonan personal ora ta nesesario pa prosesá e akshon ku bo a skohe. E organisashon religioso akí ta operá rònt mundu usando vários entidat lokal. Den konteksto di protekshon di dato personal, e entidatnan akí por inkluí kongregashon lokal, sukursal, i otro organisashon ku ta operá i kooperá na un manera similar ku Testigunan di Yehova.

E data controller pa bo informashon personal lo varia dependiendo di kiko presis bo a skohe pa hasi riba e website. Por ehèmpel, si bo hasi un donashon na un entidat legal den un sierto pais, e nòmber i informashon di kontakto ku bo a suministrá lo ser mandá pa e instansia ku nos a indiká durante e proseso di hasi un donashon. Un otro ehèmpel: Si bo pidi un kurso di Beibel, bo nòmber i informashon di kontakto lo ser mandá pa un sukursal i un kongregashon lokal di Testigunan di Yehova pa asina nan kumpli ku bo petishon.

Si e pais kaminda bo ta biba tin lei aplikabel pa protekshon di dato personal, bo por haña e informashon di kontakto ku ta konta pa e pais ei riba e página di e website titulá “Data Protection Contacts” (Kontakto pa Protekshon di Dato).

Nos ta tuma siguridat i konfidensialidat di bo datonan personal masha na serio. Nos ta hasi uso di teknologia moderno pa warda i sigurá dato, pa asina protehá bo datonan personal kontra persona no outorisá, uso indebido, divulgá informashon sin outorisashon, modifikashon no outorisá, destrukshon ilísito i pèrdida aksidental di dato. Tur persona òf instansia ku ta prosesá dato personal i tur otro terser partido ku nan ta usa pa prosesá bo datonan personal tin un obligashon di respetá konfidensialidat di bo datonan. Nos ta keda warda bo datonan personal solamente pa e tempu ku ta rasonablemente nesesario pa kumpli ku e propósito ku a kompilá nan òf pa kumpli ku posibel obligashon di lei pa raportá òf rekisito pa warda dokumento.

Pa protehá bo datonan personal ora ta transmitiendo nan, nos ta usa protokòl di siframentu di dato (encryption protocol) manera Transport Layer Security (TLS). Nos ta usa kòmpiuter ku protokòl di akseso limitá, i nan ta wardá na sitionan ku ta usa prosedura spesial i medida físiko i elektróniko pa protehá konfidensialidat i siguridat di e informashon transmití na nos. Tambe, nos ta kumpli ku norma estrikto di siguridat pa prevení ku kualke persona no outorisá por haña akseso na e datonan.

Si bo ta ser konsiderá un persona menor di edat na e pais kaminda bo ta subiendo nos website, bo tin mag di manda bo datonan personal riba e website akí solamente ku outorisashon di bo mayor(nan) òf voogd. Si bo ta un mayor òf voogd i bo duna outorisashon pa un persona menor di edat manda dato personal riba e website akí, esei ta enserá ku bo ta bai di akuerdo ku e Maneho akí pa loke ta toka e manera ku e menor ta usa e website.

Tin bes, e website akí lo kontené un link ku ta hiba bo riba website di un suministradó di servisio eksterno ku nos ta kontratá pa duna sierto servisio pa nos (por ehèmpel, pa yena sierto formulario online). Lo bo ripará ku bo a yega riba website komersial di un suministradó di servisio eksterno, esta, un website ku no ta di e organisashon akí, pasobra e website su aspekto ta diferente i e adrès den e bara ariba na bo browser a kambia. Ademas, lo bo por risibí un e-mail òf mensahe riba bo telefòn di un suministradó di servisio eksterno debí na un petishon pa informashon ku bo a hasi riba e website akí. Esei por inkluí informashon ku bo pidi tokante sierto aktividat. Na momento ku nos skohe un suministradó di servisio eksterno, i despues di esei de bes en kuando tambe, nos ta studia su maneho di privasidat i di protekshon di dato pa sa sigur ku nan ta kumpli ku e mesun normanan ku nos ta usa pa nos propio maneho. Pero e suministradónan ei ta ofresé programa di kòmpiuter i servisionan, i nos no tin kontrol riba nan programashon, nan kondishonnan di uso, maneho di privasidat i nan otro kondishonnan. Ta e kondishonnan di uso i otro kondishon general di e suministradónan eksterno ta aplikabel ora bo usa nan programa- i servisionan riba e website akí. E suministradó no ta informá nos di e kambionan den e kondishonnan ei, pues, lo ta bon pa bo repasá e kondishonnan ei promé ku bo uso e programa òf servisionan di e suministradó. Si bo tin pregunta tokante e maneho di un suministradó di servisio eksterno, sea asina bon di lesa e maneho ku ta aparesé riba nan website.

 E servisionan di Google Maps riba e website aki ta kai bou di e kondishonnan di uso ku yama “Google Privacy Policy.” Google ta un suministradó eksterno di programa di kòmpiuter i servisionan, pero nos no tin kontrol riba nan programanan di kòmpiuter, programashon i Kondishonnan di Uso. P’esei, ora bo usa Google Maps bo ta bai di akuerdo ku e kondishonnan di uso ku yama “Google Maps/Google Earth Additional Terms of Service.” Google no ta informá nos di e kambionan den e kondishonnan ei, pues, lo ta bon pa bo repasá e kondishonnan ei promé ku bo usa e servisionan di Google Maps. No usa e servisionan di Google Maps si bo no kier aseptá su kondishonnan di uso.

 Kontinuamente nos ta keda mehorá i agregá mas funshon na e website akí, i mehorá i amplia nos servisionan eksistente. Debí na e kambionan kontinuo ei, i tambe debí na kambio di lei i desaroyo den teknologia, e manera ku nos ta atendé ku dato lo kambia de bes en kuando. Na momento ku bira nesesario pa nos kambia nos Maneho, nos lo publiká e kambionan ei riba e página akí. Asina semper lo bo por ta na haltura di e datonan ku nos ta kompilá i kon nos ta usa nan.

Scripting ta un teknologia ku ta ser usá pa mehorá funshonamentu di nos website. Scripting ta permití e website duna bo resultado na un manera mas lihé. Nunka nos website no ta usa scripting pa instalá software riba bo kòmpiuter ni pa kompilá bo informashon sin bo outorisashon.

Pa sierto parti di e website funshoná debidamente, mester aktivá Active Scripting òf JavaScript den e browser. Hopi browser ta duna bo e opshon di skohe pa kua website spesífiko bo ke aktivá e funshon akí i pa kua bo ke ten’é desaktivá. Wak e dokumentashon (Help) di bo browser pa bo sa kon bo por aktivá scripting pa un website spesífiko ku bo a skohe.