YUDANSA PA FAMIA
Kon Bo Por Yuda Bo Yu Mehorá Su Sifranan?
Ta parse ku bo yu no ta interesá den skol; e no ta siña ni no ta hasi su hùiswèrk. Ku ki resultado? Su sifranan na skol ta baha i su aktitut tambe ta kambia. Kon bo por yuda bo yu mehorá su sifranan?
Loke ta bon pa bo sa
Ponementu di preshon ta hasi e problema mas grandi. Si bo ta pone preshon riba bo yu, e ta bai sintié anshá na skol i na kas! I pa skapa di e strès ei, kisas e ta bai gaña, skonde su mal sifranan, falsifiká bo firma riba rapòrt òf keda sin bai skol. Esei lo hasi e problema mas grandi.
Rekompensa pa bon sifra por tin efekto robes. Un tata ku yama Andrew a bisa: “Pa motivá nos yu muhé, nos a purba di rekompens’é ki ora ku e haña bon sifra. Pero, esei a pon’é enfoká solamente riba e rekompensa. Ora e la haña un mal sifra, e tabata mas desapuntá pa e echo ku e no a haña un rekompensa, ku pa e echo ku e la haña un mal sifra.”
Kulpa e maestronan no ta yuda. Esei por pone bo yu konkluí ku e no tin nodi di hasi esfuerso pa haña bon sifra. E por asta kuminsá kulpa otro hende pa su fayonan i kuminsá spera ku otronan tin ku resolvé su problemanan. Ku poko palabra, bo yu por pèrdè e chèns di desaroyá un abilidat ku lo ta importante p’e komo adulto, esta, e abilidat di aseptá responsabilidat pa su echonnan.
Loke bo por hasi
Dominá bo emoshonnan. Si bo ta rabiá, papia mas despues ku bo yu enkuanto su sifranan. Un tata ku yama Brett a bisa: “Ami i mi esposa a haña mihó resultado ora nos a papia trankil i ku empatia.”
Prinsipio di Beibel: “Tur hende mester ta kla pa skucha, slo pa papia, slo pa rabia.”—Santiago 1:19.
Purba di saka afó kiko ta e problema. Hopi biaha e motibunan tras di mal sifra ta tèrmentu na skol, kambio di skol, ansiedat pa eksámen, problema den famia, falta di soño, un skèdjel ku no ta bon òf falta di konsentrashon. No asumí ku ta floho bo yu ta.
Prinsipio di Beibel: “Esun ku paga tinu na e palabra lo haña bondat.”—Proverbionan 16:20
Krea un ambiente ku ta yuda bo yu siña. Traha un skèdjel di siña lès i traha hùiswèrk. Sòru pa bo yu tin un lugá ku e por traha su hùiswèrk sin distraishon (inkluso di televishon i telefòn selular). Hasi e periodonan di traha hùiswèrk mas kòrtiku pa e por konsentrá mihó. Hector, un tata na Alemania, a bisa: “Si e tin un prufwèrk, nos ta repasá e lès tur dia un tiki, en bes di warda te n’e último ora.”
Prinsipio di Beibel: “Tin un tempu stipulá pa tur kos.”—Eklesiástes 3:1
Animá bo yu pa siña. Mas mihó e mucha komprondé kon e por benefisiá di skol aworakí, mas e ta ser motivá pa siña. Por ehèmpel, matemátika por yud’é traha un budget pa manehá su zakgeld.
Prinsipio di Beibel: “Atkerí sabiduria! Atkerí komprondementu! . . .Hals’é.”—Proverbionan 4:5, 8.
Tep: Yuda bo yu ku su hùiswèrk pero no trah’é p’e. Andrew ta atmití: “Nos yu muhé a stòp di pensa i a kuminsá stèns ku nos ta pensa p’e.” Siña bo yu kon pa hasi su hùiswèrk riba su mes.