Algun mayor ku ta traha ta laga nan yunan chikitu bai krèsh òf un sentro di edukashon preeskolar. Esei lo ta bon pa bo yu?

•  Pregunta pa pensa riba dje

•  Loke bo por hasi

 Krèsh lo afektá e relashon ku bo tin ku bo yu? E por afektá e relashon ei. Durante un mucha su promé añanan di bida, su selebro ta desaroyá hopi lihé, i esei por influensiá e manera ku e mucha lo anda ku hende. Purba di pasa mas tantu tempu posibel ku bo yu durante e añanan krusial ei.—Deuteronomio 6:6, 7.

•    E mayornan ku tin pensá di laga nan yu bai krèsh mester pensa kiko nan por hasi pa mantené un bon relashon ku nan yu.

 Si bo manda bo yu krèsh, lo bo tin ménos influensia riba bo yu? Esei por ta posibel. E buki Hold On to Your Kids ta bisa: “Mas tantu tempu mucha chikitu pasa ku otro, mas influensia nan tin riba otro.”

•    E mayornan ku tin pensá di laga nan yu bai krèsh mester pensa si di bèrdat ta nan mes lo tin mas tantu influensia riba nan yunan òf si ta otro hende.

 Si bo yu bai krèsh, lo e presta mihó na skol despues? Algun hende ta bisa ku ‘sí.’ Otro hende ta bisa ku ‘nò,’ i tin hende ta pensa ku krèsh no tin masha influensia riba desaroyo di un mucha. Penelope Leach, un sikólogo di mucha, a skirbi: “No pensa ku ‘enseñansa’ ta e klave pa bo yu bai bon den bida. No pensa tampoko ku ta mihó pa un mucha bai mas skol posibel i ku ta mihó pa e kuminsá bai skol mas trempan posibel. Si bo ta pensa asina, bo ta balotá e edukashon ku abo ta dunando bo yu for di dia ku el a nase.”

•   E mayornan ku tin pensá di laga nan yu bai krèsh mester pensa si esei lo benefisiá nan yu òf si esei ta nesesario mes.

 Abo òf bo kasá por keda kas pa kuida boso yu? Den algun kaso, tur dos mayor ta traha djis pa nan tin un nivel di bida haltu. Pero esei ta bale la pena?

•   E mayornan ku tin pensá di laga nan yu bai krèsh mester wak si nan por gasta ménos plaka di manera ku un di nan por keda kas pa kuida nan yu.

 Pensa bon riba e bentahanan i e desbentahanan di hiba bo yu krèsh promé ku bo tuma bo desishon. Awor, kiko si bo ta pensa ku tòg ta mihó pa laga un hende kuida bo yu durante dia?

 Beibel ta bisa ku un hende sabí “ta wak bon unda e ta bai.” (Proverbionan 14:15, Beibel Santu) Ku e prinsipio ei na mente, pensa bon kua opshon lo bo skohe.

 Haña sa ki opshon bo tin

•   Algun mayor ta skohe pa hiba nan yu un kas kaminda nan ta kuida mucha. Einan, sa tin un òf mas hende ku ta kuida mucha, i e grupo di mucha ku nan ta kuida ta chikitu.

•   Algun mayor ta laga un famia di nan òf un babysitter kuida nan yu. Òf kisas nan ta laga un persona ku nan a kontratá biba na nan kas pa e kuida nan yu.

 Tur opshon tin bentaha i desbentaha. Bo por papia ku otro mayor ku tin eksperensia ku un di e opshonnan menshoná den e artíkulo akí. Beibel ta bisa: “Sabiduria ta ku esnan ku ta aseptá konseho.”—Proverbionan 13:10, Beibel Santu.

 Kiko si bo opta pa laga bo yu bai krèsh? Den tal kaso, . . .

 Buska informashon tokante e krèsh

•   E krèsh ta registrá? E tin e pèrmitnan nesesario? Hende ta papia bon di e krèsh?

•   E krèsh ta limpi i safe?

•   Ki aktividat e krèsh tin pa e muchanan? a

 Buska informashon tokante e hendenan ku ta traha na e krèsh

•   Ki diploma òf sertifikado nan tin? Nan a sigui un estudio tokante edukashon preeskolar? Nan a sigui un lès òf kurso di promé ousilio i reanimashon?

•   Tin trahadó na e krèsh ku tin strafblad? Tin manera ku bo por haña sa esei?

•   E krèsh ta kambia trahadó kada biaha? Si ta asina, kada biaha bo yu lo tin ku kustumbrá ku hende nobo.

•   Kuantu mucha kada trahadó na e krèsh tin ku atendé? Si kada persona tin ku kuida hopi mucha, esei ta nifiká ku bo yu lo no haña sufisiente atenshon. Klaru ku e kantidat di atenshon, òf kuido, ku un mucha tin mester di dje ta dependé di su edat i kapasidat.

•   E personanan ku ta kuida e muchanan ta dispuesto pa komuniká ku bo? Nan ta skucha bo si tin algu ku ta preokupá bo? Nan ta habrí pa ekspresá nan mes si nan tin kualke preokupashon?