“E promé biaha ku nos a papia ku nos yu muhé tokante uso di alkohòl, e tabatin seis aña. Pa nos sorpresa e tabata sa hopi mas tantu kos tokante alkohòl ku nos a pensa.”—Alexander

•  Loke ta bon pa bo sa

•  Loke bo por hasi

•  Loke Beibel ta bisa di alkohòl

 Ta masha importante pa papia ku bo yu tokante alkohòl. No warda te ora bo yu ta un tiner. Khamit, na Rusia, ta bisa: “Mihó nos a papia ku nos yu hòmber for di ora e tabata mas chikitu. Mi a mira konsekuensia di nos eror ora mi a deskubrí ku mi yu hòmber tabata bebe alkohòl regularmente for di ora e tabatin 13 aña.”

 Dikon esei mester preokupá bo?

•   Kompañero di klas, propaganda i programanan di televishon por influensiá bo yu su punto di bista tokante alkohòl.

•   Di akuerdo ku e Sentro pa Kontrol i Prevenshon di Enfermedat di Merka, un kantidat di 11 porshento di esnan ku ta bebe alkohòl ta menor di edat na Merka.

 No ta pòrnada e funshonarionan di salubridat ta animá mayornan pa siña nan yunan for di chikitu tokante e peligernan di alkohòl. Kon abo por hasi esei?

 Pensa adelantá tokante kua pregunta bo yu por hasi. Mucha chikitu ta kurioso i esnan un tiki mas grandi ta mas kurioso ainda. P’esei ta bon pa prepará bo kontesta. Por ehèmpel:

•   Si bo yu tin gana di sa kon alkohòl ta smak, bo por bisé ku biña ta smak manera un djus zür i serbes ta marga.

•   Si bo yu ke purba alkohòl, bo por bisé ku alkohòl ta muchu fuerte pa e kurpa di un mucha. Splik’é kiko ta e efektonan: Alkohòl por trankilisá un persona, pero demasiado alkohòl por pone un hende su kabes bira, hasi kos sin pensa i bisa kos ku lo e lamentá despues.​—Proverbionan 23:29-​35.

 Informá bo mes. Beibel ta bisa: “Tur hende prudente ta trata ku konosementu.” (Proverbionan 13:16) Informá bo mes bon tokante uso di alkohòl i lei, i tambe e límite legal na bo pais. Asina lo bo ta bon prepará pa yuda bo yu.

 Tuma inisiativa pa papia tokante e tópiko akí. Mark, un tata na Bretaña a bisa: “Uso di alkohòl por ta algu ku ta konfundí mucha. Mi a puntra mi yu hòmber di ocho aña si e ta haña ku ta bon òf malu pa bebe alkohòl. Mi a mantené e ambiente kalmu i informal, i esaki a yuda ku e por a ekspresá su mes abiertamente.”

 Lo bo laga un impreshon mas profundo si bo papia tokante e tópiko di alkohòl na vários okashon. Dependé di e edat di bo yu, kombiná e kòmbersashon tokante alkohòl ku otro tema di bida, manera siguridat riba kaminda i edukashon seksual.

 Pone un bon ehèmpel. Yunan ta manera spòns—nan ta apsorbá tur loke ta sosodé rònt di nan—i investigashon ta mustra ku un mayor ta esun ku tin mas influensia riba su yu. Esei ta nifiká ku si bo ta bebe alkohòl pa trankilisá bo mes òf pa baha strès, bo yu lo kere ku alkohòl ta e kontesta pa inkietutnan di bida. Pues sea un bon ehèmpel. Hasi sigur pa abo usa alkohòl na un manera responsabel.