Su esposa a deskubrí su sekreto. El a pidi su esposa pa pordon’é. El a primintí ku lo e stòp. El a stòp pa un tempu, pero despues el a haña un rekaida. I tur kos a bolbe ripití.

 Bo tambe ta den e mesun situashon? Si ta asina, ta importante pa bo komprondé kon e echo ku bo ta wak pornografia ta afektá bo kasá i kon bo por stòp ku e mal kustumber ei unabes pa semper. a

Den e artíkulo akí nos lo trata:

•  Loke bo mester sa

•  Loke bo por hasi

•  Si bo esposo ta wak pornografia

 Pornografia por kibra un matrimonio. E ta laga e persona inosente sinti renkor i e ta kousa deskonfiansa entre pareha kasá. b

 Si un esposo ta wak pornografia, su esposa por sintié:

•   Traishoná. Un esposa ku yama Sarah ta bisa: “Tabata komo si fuera mi esposo tabata kometé adulterio bes tras bes.”

•   Sin balor. Un esposa ta bisa ku e mal kustumber ku su esposo tabatin di wak pornografia a lag’é sinti su mes “mahos i yen di bèrgwensa.”

•   Sin konfiansa den su kasá. Un esposa ku yama Helen ta bisa: “Mi no ta konfia nada ku mi kasá ta hasi.”

•   Anshá. Un esposa ku yama Catherine ta atmití: “E preokupashon pa e mal kustumber di mi esposo tabata kaba ku mi.”

 Pensa riba esaki: Beibel ta bisa ku un esposo mester stima su esposa. (Efesionan 5:25) Pero, un esposo ta mustra ku e ta stima su esposa si e ta lag’é sinti manera a ser menshoná?

 No ta fásil pa stòp di wak pornografia. Un esposa ku yama Stacey ta bisa: “Mi esposo a stòp di huma, usa mariwana i bebe, pero te ainda e ta lucha pa stòp di wak pornografia.”

 Si bo tambe ta den un situashon asina, e siguiente sugerensianan por yuda bo vense bo adikshon na pornografia.

•   Komprondé dikon pornografia ta malu. Pornografia ta lanta deseo egoista den un persona. Esei ta afektá e amor, konfiansa i lealtat ku mester tin den un matrimonio felis. Ademas, e ta mustra falta di rèspèt pa e Persona ku a establesé matrimonio, Yehova Dios.

   Prinsipio di Beibel: “Laga matrimonio ta onorabel.”—Hebreonan 13:4.

•   Para responsabel pa loke bo a hasi. No bisa: ‘Si mi esposa tabata mas kariñoso, lo mi no tabatin ku wak pornografia.’ No ta hustu pa kulpa bo esposa, esei ta djis un èksküs pa bo bolbe wak pornografia ora bo esposa faya ku bo.

   Prinsipio di Beibel: “Kada hende ta ser poné na prueba ora e ser atraí i sedusí pa su mes deseo.”—Santiago 1:14.

•   Sea onesto ku bo kasá. Un esposo ku yama Kevin ta bisa: “Mi ta konta mi kasá tur dia kon a bai ku mi. Por ehèmpel: Ora mi a mira algu provokativo, mi a keda wak òf mi a kita mi kara? Debí ku nos ta papia habrí ku otro, mi esposa no ta sinti ku mi ta skonde algu p’e.”

   Prinsipio di Beibel: “Nos ke komportá nos mes na un manera onesto den tur kos.”—Hebreonan 13:18.

•   Semper keda alerta. Asta si pa vários aña bo a dominá e hábito ei, bo por haña rekaida. Kevin, menshoná anteriormente, ta bisa: “Mi a lucha ku pornografia pa dies aña largu i mi a kere ku mi a vense e problema ei. Pero e adikshon tabat’ei ketu bai, wardando e momento oportuno pa bolbe presentá.”

   Prinsipio di Beibel: “Laga esun ku ta kere ku e ta pará, tene kuidou pa e no kai.”—1 Korintionan 10:12.

•   Si bo sinti tentashon, no sede. Kisas bo no por evitá deseo robes, pero bo por skohe si bo ta bai tras di e deseo ei òf nò. E tentashon lo pasa, i e por pasa asta mas lihé si bo siña enfoká bo pensamentunan riba otro aktividat.

   Prinsipio di Beibel: “Kada un di boso mester sa kon pa dominá su mes kurpa den santidat i onor, no ku deseo seksual golos.”—1 Tesalonisensenan 4:4, 5.

•   Evitá situashon ku por bolbe pone bo kai den tentashon. E buki Willpower’s Not Enough ta bisa: “Unabes bo haña bo den un situashon vulnerabel ta manera bo a sende un lusafè. Djis un tiki gasolin mester pa sende e kandela.”

   Prinsipio di Beibel: “No laga nada malu dominá mi.”—Salmo 119:133.

•   No pèrdè speransa. Kisas ta tuma tempu, asta vários aña, pa bolbe gana e konfiansa di bo esposa. Pero eksperensia ta mustra ku esei ta posibel.

   Prinsipio di Beibel: “Amor tin pasenshi.”—1 Korintionan 13:4.