Tardi òf trempan, bo yunan lo kometé eror òf lo haña nan ku desepshon den bida. Kiko bo por hasi pa yuda nan?

•  Loke bo mester sa

•  Loke bo por hasi

 Kometé eror ta parti di bida. Beibel ta bisa: “Nos tur ta trompeká.” (Santiago 3:2) Nos yunan tambe. Sinembargo, ora nos yunan ta kometé eror, esei por tin un efekto positivo riba nan pasobra e ta duna nos yunan oportunidat di kultivá perseveransia. Nos yunan no ta nase ku perseveransia, pero nan por siña kultiv’é sí. Un mama ku yama Laura a bisa: “Ami i mi esposo ta ripará ku ta mihó pa un mucha siña trata ku su eror, en bes di hasi komo si fuera nada no a sosodé. Asina, e ta siña perseverá ora kos bai robes.”

 Hopi mucha no sa kon pa trata ku frakaso. Algun hóben no a siña trata ku frakaso, pasobra nan mayornan semper ta protehá nan di e konsekuensianan. Por ehèmpel, ora nan yu haña mal punto na skol, mesora nan ta kulpa e maestro. Òf ora nan yu tin problema ku un amigu, outomátikamente nan ta kulpa e amigu.

 Pero si e mayornan ta hasi esei, kon e yunan por siña para responsabel pa nan echonan?

•   Siña bo yunan ku tur loke nan hasi tin konsekuensia.

   Beibel ta bisa: “Kiko ku un hende sembra, esei lo e kosechá tambe.”—Galationan 6:7.

   Tur kos ku nos hasi tin su efekto. Tur eror tin su konsekuensia. Si bo kibra algu, bo tin ku paga pa e daño hasí. Nos yunan tin ku siña ku kada akshon tin su konsekuensia. Nan tin ku komprondé kiko nan a hasi robes i ku nan tin ku karga responsabilidat pa esei. P’esei, evitá di tira falta riba otro hende òf bini ku èksküs pa bo yunan. Na lugá di esei, laga nan karga konsekuensia di nan echonan di akuerdo ku nan edat. Hasi sigur ku bo yu ta komprondé bon, e relashon entre su erornan i e konsekuensianan di esakinan.

•   Yuda bo yunan buska solushon.

   Prinsipio di Beibel: “Pasobra un hende hustu ta kai shete bes, i ta lanta atrobe.”—Proverbionan 24:16.

   Ta fastioso ora algu no bai bon, pero esei no ta nifiká ku ta fin di mundu. Yuda bo yu enfoká riba kon pa solushoná e asuntu, en bes di konsumí pasobra e situashon ta parse inhustu. Por ehèmpel, si bo yu hòmber haña un mal punto na skol, yud’é komprondé ku si e siña mihó i si e ta dispuesto pa traha mas duru e por mehorá. (Proverbionan 20:4) Si bo yu muhé tin problema ku su amiga, yud’é pensa kon e por tuma inisiativa pa drecha e asuntu entre nan dos, sin importá ken tin falta.—Romanonan 12:18; 2 Timoteo 2:24.

•   Siña bo yunan pa ta modesto.

   Prinsipio di Beibel: “Mi ta bisa kada un di boso pa no pensa mas di su mes di loke ta nesesario.”—Romanonan 12:3.

   Si bo yu hasi algu bon, lo no ta realístiko ni korekto pa bis’é ku e “ta mihó” ku tur hende. Al fin i al kabo, asta e mihó alumnonan ta hasi fout den eksámen. Ademas, no ta tur ora e muchanan ku ta bon den un sierto deporte ta gana. Un hóben ku no ta pensa demasiado di su mes, tin mihó chèns pa trata ku frakaso òf desepshon.

   Beibel ta bisa ku prueba ta hasi nos mas fuerte i ta yuda nos perseverá. (Santiago 1:2-4) Pues, ora bo yunan haña nan ku desepshon ora algu no bai bon, ta un bon oportunidat pa bo yuda nan kultivá un punto di bista realístiko di nan mes.

   Meskos ku ta tuma tempu pa siña kualke abilidat, asina tambe ta tuma tempu i esfuerso pa siña bo yunan perseveransia. Pero, despues esei lo duna bon resultado, segun ku e ta krese i bira adolesente. E buki Letting Go With Love and Confidence ta bisa ku “e tinernan ku siña kon pa trata ku problema, tin e tendensia di aktua sabí ora nan ta bou di preshon. Ora un situashon inesperá presentá, nan lo ta bon prepará.” E benefisionan di nan perseveransia lo yuda nan asta ora nan bira adulto.

 Tep: Pone bon ehèmpel. Kòrda ku e manera ku abo ta trata ku desepshon den bida lo siña bo yunan kon pa trata ku nan desepshonnan.