Elías a kaba di haña e notisia: Rei Akab a muri. Imaginá bo kon e profeta di mayor edat akí ta pasa man na su barba i ta kòrda riba e dékadanan ku e mester a trata ku e rei malbado akí. Elías a soportá hopi kos. El a ser menasá, persiguí i a asta enfrentá morto​—tur esaki na man di Akab i su esposa reina Yézabèl. Rei Akab no a hasi nada pa stòp e òrdu ku Yézabèl a duna pa mata vários profeta di Yehova. E pareha akí, djis pa golosidat, a asta konspirá pa mata Nabot, un hòmber hustu i inosente, i tambe su yu hòmbernan. Pa e motibu akí, Elías a proklamá Yehova su huisio kontra Akab i su desendientenan. Awor, e palabranan di Yehova a bira realidat. Akab a muri manera Yehova a bisa.​—1 Reinan 18:4; 21:​1-​26; 22:37, 38; 2 Reinan 9:​26.

 Sinembargo, Elías tabata sa ku e tabatin ku sigui perseverá. Yézabèl tabata na bida ainda i e tabatin mal influensia riba su famia i e pueblo. Elías lo a sigui enfrentá mas prueba i ainda e tabatin hopi kos di siña su kompañero i susesor, Eliseo. P’esei, laga nos analisá e tres último asignashonnan di Elías. Segun ku nos ta mira kon e fe ku Elías tabatin a yud’é perseverá, nos tambe por siña kon pa fortalesé nos fe den e tempu difísil akí.

 Awor Okozias, yu hòmber di Akab ku Yézabèl, a bira rei di Israel. Na lugá di siña di e erornan ku su mayornan a kometé, el a sigui nan mal ehèmpel. (1 Reinan 22:52) Okozias tambe a adorá Baal. Adorashon di Baal a degradá tur hende ku tabata praktik’é, ya ku e tabata promové prostitushon den tèmpel i asta sakrifisio di mucha. Tabatin algu ku lo por a motivá Okozias pa bira di su mal kaminda i evitá ku su pueblo lo a sigui peka gravemente kontra Yehova?

 Diripiente algu teribel a pasa ku e rei yòn i arogante akí. El a kai dor di trali di su kamber ariba i a keda gravemente heridá. Aunke su bida tabata na peliger, e no a buska yudansa serka Yehova. Na lugá di esaki, el a manda algun mensahero bai e stat enemigu filisteo Ekron pa puntra e dios Baal-zebub si lo el a rekuperá di su malesa. Awor si tabata basta pa Yehova. El a manda un angel serka Elías, pa bis’é bai topa e mensaheronan di rei na kaminda. E profeta ta manda nan bai bèk ku un mensahe skèrpi. Okozias a peka gravemente ora el a hasi komo si fuera ku Israel no tin Dios. Yehova a disidí ku Okozias lo no baha for di su kama di malesa nunka mas.​—2 Reinan 1:​2-4.

 Sin niun klase di arepentimentu Okozias a puntra: “Kon e aparensia di e hòmber ku a topa boso na kaminda i a papia e palabranan akí ku boso tabata?” E mensaheronan a kontestá i a splika kon simpel e profeta tabata bistí i mesora Okozias a bisa: “Ta Elías.” (2 Reinan 1:​7, 8) Ta importante pa menshoná ku Elías a hiba un bida simpel, enfoká riba sirbishi na Yehova. P’esei, ora nan a duna deskripshon di su bistí simpel, tabata fásil pa identifik’é. Esei siguramente no por a bisa di Okozias i su mayornan ku tabata pensa riba kos material so. E ehèmpel di Elías ta yuda nos kòrda riba Hesus su konseho pa mantené un wowo simpel, esta, keda enfoká riba loke realmente ta importante.​—Mateo 6:​22-​24.

 Okozias tabata buskando vengansa; el a manda 50 sòldá, dirigí pa un kabesante, pa bai arestá Elías. Ora nan a haña Elías sintá “riba kabes di e seru,” a e kabesante di e sòldánan a orden’é den nòmber di rei pa e “baha”​—ku intenshon pa mat’é. Imaginá bo! Aunke nan tabata sa ku Elías tabata un “hòmber di e Dios berdadero,” e sòldánan akí a kere ku nan por a spanta i menasá Elías. Esta kiboká nan tabata! Elías a bisa e kabesante di e sòldánan: “Awèl, si mi ta hòmber di Dios, laga kandela baha for di shelu i kaba ku bo i ku bo sinkuentanan.” Dios a aktua mesora! “E ora ei kandela a baha for di shelu i a kaba kuné i ku su sinkuentanan.” (2 Reinan 1:​9, 10) E final trágiko di e sòldánan akí ta yuda nos kòrda ku Yehova ta mira hende ku ta despresiá su sirbidónan i ku ta falta nan rèspèt komo algu grave.​—1 Krónikanan 16:21, 22.

 Okozias a bolbe manda un kabesante ku 50 sòldá. E di dos kabesante akí tabata pió ku esun promé. Un kos ta sigur, e no a siña nada for di e morto di e 51 hòmbernan, kendenan nan shinishi ainda tabata benta abou na e barika di seru. Pa kolmo, no solamente el a ripití e palabranan di esun ku a bini promé kuné, sino ku el a agregá e palabranan “hasi lihé”! Ki un bobedat esaki tabata! Pues e ku su sòldánan a pèrdè nan bida meskos ku esnan promé. Pero e rei tabata mas bobo ainda. Sin wòri ku nada, el a manda un di tres grupo di sòldá. Pero e di tres kabesante di sòldá akí tabata mas sabí. Humildemente el a aserká Elías i a rog’é pa e no mata e ni su sòldánan. Komo un hòmber di Dios, Elías a reflehá Yehova su kualidat di miserikòrdia ora el a kontestá e kabesante di e sòldánan. E angel di Yehova a bisa Elías pa e bai ku e sòldánan. Elías a obedesé i despues ta ripití e palabranan di Yehova ku ta bisa kiko lo pasa ku e rei malbado. Di akuerdo ku e palabra di Dios, Okozias ta muri. El a goberná solamente dos aña.​—2 Reinan 1:​11-​17.

 Kon Elías a perseverá apesar di e komportashon tèrko i rebelde di e hendenan rònt di dje? Esaki ta un pregunta masha importante pa nos awe. Bo a yega di sinti bo frustrá ora ku un hende ku bo ta stima ta nenga di sigui bon konseho i ta insistí pa sigui den mal kaminda? Kon nos por trata ku e desepshon akí? Nos por siña hopi for di e echo ku Elías tabata sintá “riba kabes di seru” na momento ku e sòldánan a hañ’é. Nos no por bisa ku eksaktitut dikon Elías tabata einan, pero nos sa si ku e tabatin kustumber di hasi orashon. Pues, probablemente e trankilidat di e lugá ei a yud’é hala mas serka di su Dios stimá. (Santiago 5:​16-​18) Nos tambe por traha tempu ku regularmente pa nos ta nos so ku Dios, yam’é na su nòmber i papia kuné di nos problemanan i preokupashonnan. Di e manera akí, nos lo ta mihó prepará pa perseverá miéntras ku e hendenan rònt di nos ta hiba un bida deskabeyá i ta perhudiká nan mes.

 Tabata momento pa Elías nombra un susesor. Tuma nota di loke el a hasi. Ora ku e i Eliseo tabata sali for di e stat Gilgal, Elías a pidi Eliseo pa keda miéntras ku e lo a bai Bètel su so, ku ta keda mas o ménos 11 kilometer leu. Ma Eliseo a bisa: “Manera SEÑOR ta biba i manera abo mes ta biba, lo mi no laga bo.” Despues ku nan dos a yega Bètel, Elías a bisa Eliseo ku lo e biaha su so bai Yériko, ku ta keda 22 kilometer leu. Ma Eliseo a kontestá meskos ku el a kontestá promé. Pa di tres bes, na Yériko, meskos a bolbe sosodé, promé ku nan a sali bai direkshon di Riu Hordan, ku ta keda mas o ménos 8 kilometer leu. Atrobe e hòmber yòn akí a para firme. Lo e no bandoná Elías!​—2 Reinan 2:​1-6.

 Eliseo a demostrá un kualidat importante, amor leal. Esaki ta e tipo di amor ku Rut a demostrá pa Noemí; e klase di amor ku hende ta demostrá ora nan ta determiná pa kumpli ku un meta i no ta laga bai. (Rut 1:​15, 16) Tur sirbidó di Dios mester di e kualidat akí​—awe mas ku nunka. Meskos ku Elías, nos ta mira e importansia di tin e kualidat akí?

 E amor leal ku Elías su kompañero yòn a demostrá, siguramente a konmové Elías. Pa e motibu akí, Eliseo tabatin e privilegio di mira Elías su último milager. Kantu di Riu Hordan, ku na algun parti ta kore duru i por ta profundo, Elías ta dal e awa ku su mantel i e awa ta parti! Tabatin “50 yu hòmber di e profetanan” ku tambe a mira e milager akí. Nan tabata forma parti di un grupo kresiente di hende hòmber ku a ser entrená pa dirigí e pueblo den adorashon puru. (2 Reinan 2:​7, 8) Probablemente, Elías tabata e persona ku a supervisá e programa di entrenamentu ei. Algun aña promé, Elías tabata pensa ku e so a keda fiel den e pueblo. Desde e tempu ei, Yehova a rekompensá Elías pa su perseveransia i e por a mira gran parti di e progreso entre e sirbidónan fiel di Dios.​—1 Reinan 19:10.

 Despues ku nan a krusa Hordan, Elías a bisa Eliseo: “Pidi loke bo kier pa mi hasi pa bo promé ku mi wòrdu kitá for di bo.” Elías tabata sa ku e momento pa e bai a yega. E no a nenga su kompañero yòn e privilegionan i prominensia ku e tabatin ku haña. Mas bien, e tabata determiná pa yud’é den tur sentido. Eliseo a hasi solamente e siguiente petishon: “Pa fabor, laga un dòbel porshon di bo spiritu ta riba mi.” (2 Reinan 2:9) ) Esaki no a nifiká ku e tabata ke e dòbel kantidat di spiritu santu ku Elías a risibí. Mas bien, el a pidi pa un herensia di e promé yu hòmber, ku pa lei ta risibí un kantidat grandi òf porshon dòbel di herensia pa e por kumpli ku su responsabilidat nobo komo kabes di famia. (Deuteronomio 21:17) Komo susesor spiritual di Elías, Eliseo a komprondé ku e tabatin mester di e mesun spiritu di kurashi ku Elías tabatin pa kumpli ku su trabou.

 Humildemente, Elías a laga Yehova disidí. Elías a bisa Eliseo ku si Yehova permití Eliseo mira kon Yehova ta tuma Elías bai kuné, Eliseo lo a risibí loke el a pidi. Un ratu despues, segun ku e dos bon amigunan akí tabata kana i papia ku otro, algu ekstraordinario a sosodé.—2 Reinan 2:​10, 11.

 Un lus masha straño a aparesé den shelu i e lus tabata yega kada bes mas serka. Nos por imaginá e boroto di bientu fuerte (un warwarú) ku diripiente ta kuminsá zona, i huntu kuné un opheto briante ku ta bin den nan direkshon, ku ta pone nan pèrdè balansa i separá nan for di otro. Nan a mira un garoshi di kandela ku tabata bria. Elías tabata sa ku esei tabata e momento. El a subi den e garoshi? Wèl, e relato no ta bisa esei. En todo kaso, el a sinti un bientu fuerte mand’é laira i karg’é bai kuné.

 Eliseo tabata wak tur asombrá. E tabata sa ku debí ku e por a wak e esena akí sosodé, Yehova siguramente lo a dun’é “un porshon dòbel” for di e spiritu di kurashi di Elías. Pero Eliseo tabata muchu tristu pa pensa. E no tabata sa na unda su bon amigu lo a bai, ni si lo e bolbe mir’é. El a sklama: “Mi tata, mi tata! E garoshi di Israel i su koredónan di kabai!” I ora e no por a mira su kerido tutor mas, el a sker su paña na dos di tristesa.​—2 Reinan 2:​12.

 Segun ku Elías tabata bai den laira, lo e por a tende e gritu di tristesa di su amigu i mir’é kisas basha lágrima? En todo kaso, e tabatin sigur ku un amigu asina a yud’é perseverá den tempu difísil. Nos por siña hopi for di Elías su ehèmpel i sera amistat ku hende ku ta stima Yehova i ku ta hasi nan esfuerso pa kumpli ku su boluntat!

 Unda Elías a bai despues? Algun religion ta siña ku el a ser tuma den shelu pa ta huntu ku Dios. Pero esei ta imposibel. Siglonan despues, Hesus a bisa ku niun hende no a subi na shelu promé ku e tempu ei. (Huan 3:​13) Pues, ora nos lesa ku “Elías a subi bai shelu den un warwarú,”nos tin ku puntra: Kua shelu? (2 Reinan 2:​11) Beibel ta usa e palabra “shelu” no solamente pa referí na e lugá kaminda Yehova ta biba, sino tambe na e parti di nos atmósfera kaminda tin nubia i para ta bula. (Salmo 147:8) Ta na​—e shelu​—ei Elías a subi. Kiko a pasa despues?

 Yehova simplemente a transferí e profeta na un asignashon nobo, den e teritorio bisiña den e reino di Huda. E relato bíbliko ta indiká ku Elías a sigui traha pa por lo ménos shete aña ayanan. Na e tempu ei, e rei malbado Joram tabata goberná riba e pueblo di Huda. El a kasa ku e yu muhé di Akab ku Yézabèl, pues ainda nan influensia malbado tabata presente. Yehova a manda Elías skirbi un karta di huisio kontra Joram. Manera a ser bisá, Joram a muri na un manera trágiko. Pió ainda, e relato ta bisa na final: “el a muri sin ku ningun hende a lamentá p’e.”​—2 Krónikanan 21:12-​20.

 Ki un kontraste grandi entre e hòmber malbado ei i Elías! Nos no sa kon ni na ki tempu Elías a muri. Pero nos sa ku e no a muri manera Joram a muri, sin ku niun hende a lamentá. Eliseo a sinti falta di su amigu. Klaru ku e otro profetanan tambe a sinti meskos. Yehova a sigui balorá Elías asta mil aña despues, ora el a usa e profeta akí ku a aparesé den e vishon di e transfigurashon. (Mateo 17:​1-9) Lo bo ke kultivá un fe fuerte manera Elías ku lo yuda bo perseverá durante prueba? Pues, no lubidá nunka pa sera amistat ku hende ku ta stima Yehova i ku lo yuda bo keda enfoká riba kosnan spiritual, i hasi orashon di kurason. Di e manera akí, lo bo haña un lugá permanente den Yehova su kurason!