Maria ta wak ariba i ta seka su lágrimanan. Su Señor stimá ta klabá na staka. Ta un dia di lènte, banda di 12or di mèrdia, pero “tòg un skuridat a kai riba henter e tera.” (Lukas 23:44, 45) E ta trèk su mantel mas pegá na su kurpa i ta bai para banda di e otro muhénan. E skuridat ei ku a dura tres ora no por tabata un eklipse solar, pasobra un eklipse ta dura solamente algun minüt. Kisas Maria i esnan ku ta pará den serkania di Hesus ta kuminsá tende zonido di e bestianan djanochi, algu ku normalmente lo bo no a tende den dia. Algun di e hendenan ei “a haña masha miedu i nan a bisa: ‘Di bèrdat esaki tabata e Yu di Dios.’” (Mateo 27:54) E siguidónan di Hesus i otronan a pensa ku ta Yehova mes lo ta ekspresá su tristesa debí na e manera kruel ku nan a trata su yu.

 Maria Magdalena kasi no por a sigui wak esaki pero e no kier a bandoná Hesus tampoko. (Huan 19:25, 26) Hesus lo mester tabatin un doló inimaginabel. I Hesus su mama tambe tabatin mester di gran konsuelo.

 Mirando tur loke Hesus a hasi pa Maria Magdalena, el a sinti ku e tambe tabata ke hasi tur loke e tabata por pa Hesus. Un tempu e tabata masha tristu i su situashon tabata mashá penoso. Pero Hesus a trese un kambio den su bida. Debí na Hesus su yudansa, awor e tin un sentido di balor propio i su bida tin propósito. Ademas, awor e tin un fe fuerte. Kon el a kultivá esaki? I kiko su ehèmpel di fe por siña nos awe?

 Den Beibel, e relato di Maria Magdalena ta kuminsá konta kon el a haña alivio. Hesus ta libra Maria for di un bida ku tabata manera un pesadia p’e. Durante e tempu ei e demoñonan tabata hopi aktivo i e spiritunan malbado ei tabata ataká hopi hende, i den algun kaso asta nan a poderá di e personanan ei i a dominá nan. Nos no sa ki efekto e demoñonan ei por tabatin riba pober Maria, pero sí nos sa ku e tabata poseí pa shete spiritu malbado, kruel i abusadó. Anto Hesus a libr’é di tur e demoñonan ei!—Lukas 8:2

 Maria a sintié librá i aliviá. El a kuminsá un bida kompletamente nobo. Kon e por a mustra su gratitut pa esei? Wèl, el a bira un fiel siguidó di Hesus. Anto tambe el a pone su mes disponibel pa yuda i kumpli ku e nesesidat di Hesus i su apòstelnan. Nan tabatin mester di kuminda, paña i lugá pa nan drumi. Nan no tabata hende riku ni tampoko nan no tabatin trabou durante e tempu ei. Pa por a enfoká riba e obra di prediká i siña hende, nan tabatin mester di yudansa den sentido material.

 Maria i algun otro hende muhé a perkurá pa e nesesidat ei, i a “usa nan pertenensianan pa sirbi Hesus i e apòstelnan.” (Lukas 8:1, 3) Algun di e hende muhénan ei kisas tabata hende riku. Kisas nan a sòru pa kuminda, laba paña i tambe pa algun lugá di drumi. Beibel no ta bisa spesífikamente kiko nan a hasi, pero nan tabata dispuesto pa yuda e grupo biahero ei ku a konsistí di mas òf ménos 20 hòmber. E yudansa di e hende muhénan ei siguramente a yuda di manera ku Hesus i su apòstelnan por a dediká nan atenshon kompleto na e trabou di prediká. Maria tabata sa ku nunka lo e por a paga Hesus pa loke Hesus a hasi p’e, pero e tabata masha kontentu di por a hasi tur loke e tabata por pa Hesus!

 Hopi persona awe kisas ta konsiderá hende ku ta hasi un trabou humilde pa yuda otronan komo inferior. Pero Dios no ta pensa asina. Imaginá bo kon kontentu Dios tabata pa mira kon Maria ta hasi tur loke e tabata por pa yuda Hesus i su apòstelnan! Awe tambe tin hopi ruman fiel ku ta hasi trabou humilde pa yuda otronan. Tin biaha, un yudansa práktiko òf asta algun palabra di animashon por ta un gran yudansa. Yehova ta apresiá yudansa asina mashá.—Proverbionan 19:17; Hebreo 13:16.

 Maria Magdalena tabata un di e hende muhénan ku a kompañá Hesus bai Herúsalèm pa e Pasku Hudiu di aña 33. (Mateo 27:55, 56) Ora el a tende ku nan a arestá i a husga Hesus e anochi ei mes, el a keda tur spantá i hopi rabiá. Anto pió ainda, bou di preshon severo di e lidernan religioso hudiu i e multitut ku tabat’ei, Gobernador Ponsio Pilato a sentensiá Hesus na un morto kruel riba un staka. Ya Maria por a imagin’é kaba kon Hesus lo tabata tur na sanger, kansá i maltratá, ta pasa den e kayanan ta lastra e staka di su ehekushon.—Huan 19:6, 12, 15-17.

 E mèrdia ei, den e skuridat ku a kai, Maria Magdalena i e otro muhénan a bai para kaminda nan a ehekutá Hesus, esta, “banda di Hesus su staka.” (Huan 19:25) Maria a keda einan te último i a tende kon Hesus ta pidi Huan pa kuida su mama p’e. Tambe el a tende kon Hesus ta sklama na su Tata pa yudansa. Anto e ora ei, nèt promé ku e muri, Maria a tende Hesus su palabranan inolvidabel: “tur kos a kumpli.” Maria a sintié devastá. Ta parse ku el a keda einan asta despues ku Hesus a muri kaba. Mas lat, el a bai na e tumba nobo kaminda un hòmber riku ku yama Hose di Arimatea a pone e kurpa di Hesus.—Huan 19:30; Mateo 27:45, 46, 57-61.

 Maria su ehèmpel ta siña nos kon nos por yuda nos rumannan ora nan ta pasa den prueba pisá. Nos lo no por kita e prueba, doló òf tragedia ku e ruman ta pasando aden. Pero sí nos por mustra kompashon i kurashi. Na momentonan asina ta un gran animashon pa nos tin bon amigu ku ta ègt sostené nos den tempu difísil. Si nos ta un amigu leal asina, nos lo ta un konsuelo pa nos rumannan i lo yuda nan traha riba nan fe.—Proverbio 17:17.

 Despues ku nan a pone e kurpa di Hesus den graf, Maria tabata un di e hende muhénan ku a kumpra speserei pa hunta riba e kurpa di Hesus. (Marko 16:1, 2; Lukas 23:54-56) Su manisé, despues ku sabat a pasa, Maria a lanta bon trempan. Purba imaginá Maria i e otro muhénan ta kana den e kayanan skur pa bai na e graf di Hesus. Nan lo tabata puntra nan mes kon nan por kita e piedra pisá ku tin dilanti e graf. (Mateo 28:1; Marko 16:1-3) Pero, esaki no a stroba nan di bai. Nan fe fuerte a move nan pa hasi tur loke nan tabata por i laga sobrá den man di Yehova.

 Maria kisas tabata esun promé ku a yega na e graf. El a keda tur asombrá. E piedra tabata kitá i e graf tabata bashí! Siendo un muhé diligente, mesora el a kore bai serka Pedro i Huan pa konta nan loke el a mira. Bo por imaginá kaba kon el a kore yega tur kansá pa bisa nan: “Nan a bai ku Señor for di e graf, i nos no sa unda nan a pon’é”! Pedro i Huan a kore mesora bai n’e graf pa hasi sigur ku e tabata bashí, i despues nan a bai kas. a—Huan 20:1-10

 Ora Maria a bolbe na e graf, el a keda un ratu einan su so. E silensio di mainta trempan i e graf bashí a hasi Maria asina tristu ku el a kuminsá yora sin por stòp. Ainda e no por a kere ku e Señor no t’ei mas. El a bùk pa wak un biaha mas den e graf i diripiente el a mira dos angel bistí na blanku sintá den e graf. El a keda di shòk! E angelnan a puntr’é: “Pakiko bo ta yora?” Tur spantá Maria a bisa nan meskos ku el a bisa e apòstelnan: “Nan a bai ku mi Señor, i mi no sa unda nan a pon’é.”—Huan 20:11-13

 El a bira wak i a mira un hòmber pará su tras. E no a rekonos’é. P’esei, el a pensa ku tabata e hardinero ku ta kuida e lugá. Ku kariño e hòmber a puntr’é: “Pakiko bo ta yora? Ken bo ta buska?” Maria a kontest’é: “Mi shon, si ta abo a bai ku su kurpa, bisa mi unda bo a pon’é, i lo mi bai kuné.” (Huan 20:14, 15) Pensa un ratu riba loke Maria a bisa. Realmente, e muhé ei so por a karga e kurpa di Hesus, ku tabata un hòmber fuerte i vigoroso? E no a pensa riba nada otro e momento ei. Úniko kos ku el a pensa ta pa hasi tur loke ta na su alkanse.

 Akaso Maria Magdalena su ehèmpel por yuda nos ora nos ta enfrentá prueba i difikultat ku ta parse mas pisá ku loke nos por karga? Si nos enfoká solamente riba nos debilidat- òf limitashonnan, ansha i insiguridat por paralisá nos. Pero si nos ta determiná pa hasi tur loke ta na nos alkanse i laga sobrá den man di nos Dios, nos por logra mas di loke nos ta pensa. (2 Korintionan 12:10; Filipensenan 4:13) Mas importante ainda, nos lo agradá Yehova i hasié masha kontentu. Ta esei Maria a hasi, i Yehova a rekompens’é na un manera ekstraordinario.

 E hòmber ku tabata pará dilanti Maria no tabata e hardinero. Un tempu e hòmber akí tabata un karpinté, despues un maestro, i finalmente, e Señor ku Maria a stima. Pero Maria no a rekonosé Hesus, i tabata kla pa bai for di einan. E no por a kere loke realmente a tuma lugá, esta, ku Hesus a lanta for di morto komo un kriatura spiritual poderoso. I siendo un spiritu Hesus a bisti un kurpa humano. Pero, e kurpa ei no tabata e kurpa ku el a sakrifiká. Durante e dianan emoshonante despues di Hesus su resurekshon, vários biaha el a aparesé na hende sin ku nan a rekonos’é, ni sikiera e esnan ku tabata konos’é bon.—Lukas 24:13-16; Huan 21:4.

 Kon Hesus a yuda Maria rekonos’é? Wèl, Hesus a bisa un solo palabra: “Maria!” Mesora Maria a drei wak i a sklama e nòmber Hebreo ku vários biaha el a yama Hesus: “Raboni!” Tabata su Maestro stimá! El a yena ku alegria i a brasa Hesus sin ke stòp.—Huan 20:16.

 Hesus a konosé Maria su pensamentunan. El a bisa Maria: “No keda tene mi.” Nos por imaginá kon kariñoso, kisas asta ku un smail, Hesus lo a bisa e palabranan ei segun ku e ta kita for di dje. El a trankilisá Maria bisando: “Mi no a subi bai serka e Tata ainda.” Ainda no tabata tempu pa Hesus bai shelu. E tabatin mas trabou pa hasi riba tera ainda i e tabata ke pa Maria yud’é ku esaki. Maria tabata kla pa skucha. El a bisa Maria: “Bai serka mi rumannan i bisa nan: ‘Mi ta subi bai serka mi Tata, ku ta boso Tata tambe, i serka mi Dios, ku ta boso Dios tambe.’”—Huan 20:17.

 Ki un tarea importante el a haña serka su Maestro. Maria tabata un di e promé disipelnan ku tabatin e privilegio di mira Hesus despues di su resurekshon. I awor Maria tabatin e privilegio di hiba e bon notisia ei pa otronan. E tabata asina kontentu i entusiasmá ku el a sali bai mesora pa buska e otro disipelnan. Morto kansá i hopi kontentu el a ekspresá e palabranan memorabel akí: “Mi a mira nos Señor!” E palabranan ei lo a keda zona pa hopi tempu den mente di Maria i e otronan. Emoshoná el a konta nan tur loke Hesus a bis’é. (Huan 20:18) Su relato a konfirmá loke e disipelnan a tende for di e otro muhénan ku a bai na e graf bashí di Hesus.—Lukas 24:1-3, 10.

 Kon e hòmbernan a reakshoná? Na promé instante, no dje bon ei. Nos ta lesa: “E palabranan akí a zona manera ko’i loko pa nan, i nan no kier a kere e muhénan.” (Lukas 24:11) E hòmbernan ei a krese den un kultura kaminda hende muhé no ta konfiabel; den e tradishon rabíniko un hende muhé no por a duna testimonio den korte. Kisas esei a influensiá e apòstelnan mas ku nan a pensa. Pero Hesus i su Tata no ta hasi distinshon di persona. Ki un privilegio e muhé fiel ei a haña!

 Maria no a laga e reakshon di e hòmbernan ei strob’é. E tabata sa ku su Maestro ta konfi’é, i esei tabata sufisiente. Tur hende ku ta sigui Hesus awe tambe ta ser konfiá ku un mensahe. Beibel ta yam’é “e bon notisia di e Reino di Dios.” (Lukas 8:1) Hesus no a primintí su disipelnan ku tur hende lo aseptá nan òf balorá nan trabou. Hende lo a aktua kontrario di esei. (Huan 15:20, 21) Pues ta importante pa nos kòrda riba e relato di Maria Magdalena. Asta e palabranan sarkástiko di su rumannan spiritual no a kibra su entusiasmo pa konta hende e bon notisia di Hesus su resurekshon!

 Ku tempu, Hesus a aparesé na su apòstelnan i despues na mas siguidó di dje. Na un okashon el a aparesé na mas ku 500 hende! (1 Korintionan 15:3-8) Ta sigur ku Maria su fe a bira mas fuerte kada bes ku el a tende òf a mira Hesus aparesé. Kisas Maria tabata un di e hende muhénan presente na e reunion di Pentekòste ora spiritu santu a ser dramá riba e siguidónan di Hesus.—Echonan 1:14, 15; 2:1-4.

 En todo kaso, nos por ta sigur di esaki: Maria Magdalena a mantené un fe fuerte te final. Laga kada un di nos ta determiná pa hasi meskos! Si nos ta mustra apresio pa tur loke Hesus a hasi pa nos i ta sirbi otro hende humildemente ku e konfiansa ku Yehova lo yuda nos, nos ta imitando e fe di Maria Magdalena.