Imaginá bo un hòmber sintá abou na suela. For di su plant’i pia te na su korona di kabes su kurpa tabata tur na blufein ku ta hasi masha doló. Su kabes i su skoudernan tabata di sak. E tabata solitario i sin muchu forsa pa kita e muskitanan ku tabata bula rònt di dje. El a sinta den shinishi pa mustra su tristesa, i ku un pida klei kibrá e tabata raspa su kurpa ku tabata tur na herida. El a pèrdè hopi kos. E tabata un persona masha respetá pero awor hende a menospresi’é! Su amigu-, bisiña- i famianan a bandon’é. Tur hende, asta mucha chikitu, tabata hasi bofon di dje. El a pensa ku su Dios, Yehova, tambe tabata kontra dje, pero e tabata kiboká.—Yòb 2:8; 19:18, 22.

 Nos ta papiando di Yòb. Dios a bisa di dje: “No tin ningun hende manera é riba tera.” (Yòb 1:8) Hopi siglo despues, Yehova a sigui mira Yòb komo un di e hòmbernan di mas hustu ku a yega di biba.—Ezekiel 14:14, 20.

 Bo ta pasando den difikultat i tragedia? E relato di Yòb por ta di gran konsuelo pa bo. Ademas, e relato di Yòb por yuda bo komprondé mihó un kualidat ku tur fiel sirbidó di Dios mester tin: integridat. Hende ta demostrá integridat na momento ku nan ta kompletamente dediká na Dios di manera ku nan ta sigui hasi su boluntat asta ora nan ta konfrontá situashon difísil. Laga nos wak kiko nos por siña di Yòb.

 Ta parse ku un poko tempu despues di Yòb su morto, Moises, un otro hòmber fiel, a skirbi e relato tokante Yòb. Bou di inspirashon divino, Moises por a relatá no solamente e susesonan ku Yòb a pasa aden riba tera pero tambe loke a tuma lugá den shelu.

 Na kuminsamentu di e relato, nos ta lesa ku Yòb tabatin un bida bon i felis. E tabata riku, un hòmber bon konosí i masha respetá den e tera Uz ku posiblemente tabata keda den e parti nort di Arabia. E tabata masha generoso ku hende pober i el a yuda i protehá hende indefenso. Yòb i su esposa a ser bendishoná ku dies yu. Mas ku tur kos, Yòb tabata un hòmber spiritual. El a purba di agradá Yehova manera su famianan djaleu Abraham, Isak, Yakòb, i Hose tambe a hasi. Meskos ku e patriarkanan akí, regularmente Yòb tabata ofresé sakrifisio komo saserdote na fabor di su yunan.—Yòb 1:1-5; 31:16-22.

 Diripiente, e relato tokante Yòb ta kambia. Nos ta haña un bista di loke tabata pasa den shelu i ta haña sa algun kos ku Yòb no por tabata sa. E angelnan fiel tabata reuní dilanti di Yehova ora ku e angel rebelde Satanas a drenta. Yehova tabata sa ku Satanas a odia e hòmber hustu Yòb, pues Dios a papia ku Satanas i a referí na Yòb su integridat. Na un manera masha arogante Satanas a kontestá: “Ta pòrnada Yòb ta teme Dios? Bo no a traha un trankera rònt di djé, rònt di su kas, i rònt di tur loke e tin na tur banda?” Satanas ta odia hende ku ta mantené nan integridat. Ora hende demostrá deboshon di henter kurason na Yehova Dios, nan ta mustra ku Satanas ta un traidó ku no ta stima niun hende. Pues, Satanas a insinuá ku Yòb a sirbi Dios pa motibu egoista i ku si Yòb pèrdè tur kos, lo el a maldishoná Dios den su kara!—Yòb 1:6-11.

 Yòb no tabata sa, pero Yehova a dun’é un gran oportunidat: Yòb mester a proba ku Satanas ta un gañadó. Dios a permití Satanas kita tur loke Yòb tabatin, pero e no a permití Satanas mishi ku Yòb. Mesora Satanas a kuminsá ku su plan malisioso. Riba un dia, Yòb a pasa den un seri di tragedia kruel. Yòb a haña sa ku su krio di bestia—promé su buey- i burikunan, despues su karnénan, kaba su kamelnan—diripiente a ser matá. Mas tristu ainda, nan a mata su sirbidónan ku tabata kuida e bestianan. Un mensahero a informá Yòb ku e motibu tabata “kandela di Dios”—probablemente welek. Promé ku Yòb por a komprondé tur loke tabata pasando, esta, dikon su sirbidónan a muri i e pobresa ku el a hañ’é aden, algu pió a sosodé. Su dies yunan tabata huntu den e kas di e yu mayó ora ku diripiente un bientu fuerte a suta e kas, destruyé i a mata nan tur!—Yòb 1:12-19.

 Ta difísil, òf kasi imposibel, pa imaginá kon Yòb a sintié. Yòb a sker su pañanan, a feita su kabes i a tira su kurpa abou. Yòb a yega na e konklushon ku ta Dios a duna i ta Dios a kita. En bèrdat, Satanas a laga parse ku ta Dios tabata esun ku a kousa Yòb su sufrimentu. Sinembargo, Yòb no a maldishoná Dios manera Satanas a insinuá. Al kontrario, Yòb a bisa: ‘Bendishoná sea e nòmber di Yehova.’—Yòb 1:20-22.

 Satanas tabata furioso i a nenga di entregá. El a bolbe presentá ora ku e angelnan tabata reuní dilanti di Yehova. Un biaha mas Yehova a elogiá Yòb pa su integridat. Yòb a keda fiel apesar di e atakenan di Satanas. Satanas a bisa: “Kueru pa kueru. Sí, tur loke un hende tin e lo duna pa su bida. Ma saka bo man awor i mishi ku su wesu i ku su karni; e lo maldishoná bo den bo kara.” Satanas tabatin sigur ku si Yòb bira hopi malu, lo e maldishoná Dios. Yehova tabatin konfiansa ku Yòb lo a keda fiel na dje, p’esei el a permití Satanas dal Yòb ku malesa—basta ku Satanas no kita Yòb su bida.—Yòb 2:1-6.

 Poko despues, Yòb a hañ’é den e kondishon ku e promé paragraf a deskribí. Imaginá bo kon su pober esposa tabata sintié. Ya e tabata tur kibrá pa motibu ku su dies yunan a muri, i awor e mester a mira su kasá sufri, sin por a hasi nada pa yud’é! E tabata asina desesperá, ku el a bisa: “Ainda bo ta mantené bo integridat? Maldishoná Dios i muri!” Esei no tabata algu ku e esposa ku Yòb a konosé i a stima lo a ekspresá den un situashon normal. Yòb a konkluí ku su esposa a papia asina debí ku el a pèrdè su sano huisio. No opstante, Yòb a nenga di maldishoná su Dios. E no a peka ku su lepnan.—Yòb 2:7-10.

 Bo tabata sa ku e historia real tristu akí ta afektá kada un di nos? Ripará ku Satanas no a hasi e akusashon kruel akí solamente kontra Yòb, pero kontra henter humanidat. El a bisa: “Tur loke un hende tin e lo duna pa su bida.” Ku otro palabra, Satanas ta insinuá ku ta imposibel pa nos mantené nos integridat! E ta pretendé ku abo no ta stima Dios di bèrdat i ku lo bo bira lomba pa Dios si bo tin ku skapa bo bida. De echo, Satanas ta bisa ku bo ta mes egoista kuné! Bo ke proba ku e no tin rason? Kada un di nos tin e oportunidat ei. (Proverbionan 27:11) Laga nos wak awor ki otro prueba Yòb a enfrentá.

 Tres hòmber ku Yòb tabata konosé—ku Beibel ta deskribí komo amigu òf kompañero—a haña sa di e tragedia i a biaha pa bishitá Yòb i konsol’é. Djaleu nan no por a rekonos’é. E doló ku e mester a soportá tabata teribel i su kueru a bira pretu debí na e malesa. P’esei, e no tabata parse e hende ku nan a konosé. E tres hòmbernan—Elifaz, Bildad, i Sofar—a fingi di tabata masha tristu. Nan a grita duru i a tira tera riba nan kabes. Despues, nan a sinta abou na suela banda di Yòb sin papia ni un palabra. Henter un siman nan a sinta einan, di dia i anochi, sin papia nada. Nan no a keda ketu pasobra nan kier a konsol’é. En realidat, nan no a puntr’é nada di su situashon. Úniko kos ku nan tabata sa ora nan a wak Yòb tabata ku e tabatin hopi doló.—Yòb 2:11-13; 30:30.

 Finalmente, Yòb mes a kuminsá papia ku nan. Pa ekspresá kuantu doló e tabatin, el a maldishoná e dia ku el a nase. I el a revelá e motibu prinsipal pakiko e tabata sintié asina miserabel. El a pensa ku ta Dios tabata kousa su problemanan! (Yòb 3:1, 2, 23) Yòb no a pèrdè su fe den Dios, pero e tabatin mester di hopi konsuelo. Ora Yòb su kompañeronan a kuminsá papia, Yòb a realisá ku lo tabata mihó si nan a keda ketu.—Yòb 13:5.

 Elifaz, probablemente esun di mas edat i hopi mas grandi ku Yòb, a kuminsá papia. Despues, su otro dos kompañeronan tambe a papia. Simplemente, nos por bisa ku nan a usa mesun rasonamentu di Elifaz sin pensa. Algun kos ku nan a bisa por a parse inofensivo pasobra nan a menshoná algun bèrdat tokante Dios, manera Dios su posishon elevá, i ku Dios ta kastigá mal hende i ta rekompensá bon hende. Sinembargo, for di prinsipio tabata bisto ku nan interes den Yòb no tabata sinsero. Elifaz a rasoná di un forma ku a parse lógiko, pero ku a pasa por alto di e bèrdatnan importante. El a insinuá ku si Dios ta bon i ta kastigá mal hende, e ora ei ta bisto ku Yòb a haña kastigu pasobra e mester a hasi algu malu.—Yòb 4:1, 7, 8; 5:3-6.

 Klaru ku Yòb no tabata di akuerdo ku e rasonamentu ei. El a rechasá esei kompletamente. (Yòb 6:25) Pero e tres konsoladónan kada bes tabata mas konvensí ku Yòb a kometé un piká i tabata purba di skonde esei. Nan tabata konvensí ku Yòb a meresé tur loke ku tabata pasando kuné. Elifaz a akusá Yòb di ta arogante, malbado i un persona ku no ta teme Dios. (Yòb 15:4, 7-9, 20-24; 22:6-11) Sofar a bisa Yòb pa e stòp di hasi maldat i stòp di disfrutá di piká. (Yòb 11:2, 3, 14; 20:5, 12, 13) I loke Bildad a bisa tabata masha kruel. El a insinuá ku e yunan di Yòb a muri di e forma ei pasobra nan a peka i a meresé morto!—Yòb 8:4, 13.

 E hòmbernan bobo ei a hasi algu muchu mas pió. No solamente nan a kuestioná integridat di Yòb; nan a bis’é tambe ku no ta bale la pena hasi esfuerso pa keda fiel na Dios! E promé biaha ku Elifaz a papia, el a splika ku e tabatin un enkuentro ku un ser invisibel. E konklushon ku Elifaz a saka despues di e enkuentro ku e demoño ei tabata robes: Dios “no ta pone konfiansa ni sikiera den su sirbidónan, i e ta kulpa su angelnan di eror.” Si e idea ei ta sierto, e ta nifiká ku hende nunka por agradá Dios! Despues, Bildad a afirmá ku Dios no ta interesá den e integridat di Yòb, meskos ku lo e no ta interesá den e integridat di un bichi!—Yòb 4:12-18; 15:15; 22:2, 3; 25:4-6.

 Bo a yega di purba di konsolá un hende ku tabata sufri hopi? No ta nada fásil. Pero nos por siña hopi for di Yòb su kompañeronan—prinsipalmente kiko nos no mester bisa. E tres kompañeronan akí a bisa hopi kos ku a parse masha sabí i lógiko, pero nunka nan a mustra kompashon na Yòb i nunka nan a sikiera yam’é na su nòmber! Nan no a preokupá ku Yòb tabata afligí ni no a mira e nesesidat pa trat’é di un forma amabel. a Pues si un hende ku bo ta apresiá ta tristu, sea kaluroso, amabel i tene konsiderashon kuné. Trata na fortalesé su fe i anim’é. Yud’é konfia den Dios, den su gran bondat, su miserikòrdia i su hustisia. Esei ta loke Yòb lo a hasi pa su kompañeronan si nan tabata sufri i tabatin mester di konsuelo. (Yòb 16:4, 5) Pero, kon Yòb a reakshoná na nan atake kontinuo riba su integridat?

 Yòb tabata desanimá kaba ora el a kuminsá ku e diskushon largu akí. For di prinsipio, el a atmití ku loke el a bisa kisas tabata ‘palabra no kontrolá’ i “palabra di un hende ku ta desesperá.” (Yòb 6:3, 26) Nos por komprondé dikon el a ekspresá asina. Su palabranan a reflehá kuantu doló e tabatin i tambe ku e no a komprondé e kousa di su sufrimentu. Yòb a yega na e konklushon ku ta Yehova a kousa su sufrimentu, debí ku e tragedianan ku e i su famia a pasa aden a bini asina diripiente i a parse di ta di un fuente sobrenatural. Tabatin suseso importante di kua Yòb no tabata sa nada, pues el a saka konklushon a base di idea robes.

 Apesar di tur kos, Yòb tabatin fe fuerte. Su fe tabata bisto den mayoria di e kosnan ku el a bisa durante e diskushon largu ei. El a menshoná algun bèrdat bunita ku ta animá nos awe. Ora el a papia tokante e kosnan maravioso di kreashon, el a deskribí algun kos ku niun ser humano no por a sa sin yudansa di Dios. Por ehèmpel, el a bisa ku Yehova ta “kologá tera riba nada,” algu ku e sientífikonan a deskubrí hopi siglo despues. b (Yòb 26:7) I ora Yòb a papia tokante su speransa pa futuro, el a ekspresá mesun konfiansa ku otro hòmber fiel tambe tabatin. Yòb a kere ku si e muri, Dios lo kòrda riba dje, lo anhelá di mir’é i lo resusit’é.—Yòb 14:13-15; Hebreonan 11:17-19, 35.

 Pero kiko di integridat? Elifaz i su dos kompañeronan a pretendé ku Dios no ta interesá den hende su integridat. Yòb a aseptá e idea malbado akí? Di ningun manera! Yòb tabata konvensí ku integridat ta importante pa Dios. Ku konfiansa el a bisa: “Laga Dios konosé mi integridat.” (Yòb 31:6) Ademas di esei, Yòb a realisá ku e rasonamentu falsu di su supuesto amigunan tabata simplemente un atake riba su integridat. Esei a motivá Yòb pa duna su diskurso di mas largu, ku finalmente a pone e tres hòmbernan ei keda ketu.

 Yòb a komprondé ku e tin ku demostrá su integridat den su bida di tur dia. I el a hasi esei den su forma di biba i su echonan. Por ehèmpel, el a rechasá tur sorto di idolatria; el a trata otro hende ku bondat i dignidat; el a keda moralmente limpi i a kuida su matrimonio; i riba tur kos, el a keda leal na Yehova, e úniko Dios berdadero. P’esei Yòb por a bisa di henter su kurason: “Te na mi morto lo mi no bandoná mi integridat!”—Yòb 27:5; 31:1, 2, 9-11, 16-18, 26-28.

 Integridat ta mes importante pa bo ku e tabata pa Yòb? E ta parse djis un palabra, pero Yòb a komprondé ku nos mester demostrá integridat ku nos echonan. Nos ta demostrá nos deboshon kompleto na Dios ora nos ta obedes’é i ta hasi loke ta korekto den su bista den nos bida di tur dia, asta ora nos ta enfrentá difikultat. Si nos ta biba di tal manera, meskos ku Yòb a hasi hopi tempu pasá, nos lo hasi Yehova kontentu i proba ku Satanas ta un gañadó. Esei ta e mihó manera pa imitá fe di Yòb!

 Pero e relato di Yòb no a kaba aki. Dado momento e no a kontrolá su mes, el a defendé su propio hustisia mas ku esun di Dios. E mester a ser korigí i haña yudansa pa e mira e asuntu for di e punto di bista di Dios. Ainda e tabatin hopi doló i tristesa, i tabatin mester di berdadero konsuelo. Kon Yehova lo a yuda e hòmber di fe akí ku a mantené su integridat? Un otro artíkulo den e seri akí lo kontestá e preguntanan ei.