Bo ta ègt gusta e mucha muhé òf mucha hòmber akí i bo tin sigur ku e tambe ta sinti meskos pa bo. E señalnan tur t’ei: boso ta manda mensahe pa otro tur ora bai, ora boso sali, semper boso dos ta resultá band’i otro . . . i algun di e mensahenan ku bo a haña ta mustra ku ta flirt e ta flirt ku bo.

 Pues bo ta disidí di puntr’é unda e relashon akí ta bayendo, djis pa bo tin sigur ku e tambe ta sinti meskos ku bo. E ta kontestá: “Ta amigu nos ta, nada mas.”

•  Kon bo ta sinti bo?

•  Dikon e kos ei a pasa?

•  Kiko abo por hasi?

 “Mi tabata masha rabiá . . . rabiá kuné i ku mi mes! Nos tabata manda mensahe pa otro tur dia i di bèrdat el a mustra interes den mi. Ta normal ku mi a haña sierto sintimentu p’e.”​—Jasmine.

 “Ami ku un mucha muhé tabata kompañá un otro pareha ku tabata date. Tabatin biaha ku a parse ku nos tambe tabata forma un pareha. Nos dos tabata papia hopi ku otro i nos a kuminsá manda hopi mensahe pa otro. Tabata difísil pa mi ora el a bisa mi ku e ta wak mi djis komo un amigu, anto riba dje m’a haña sa ku tur e tempu e tabata date un otro mucha hòmber.”​—Richard.

 “Un mucha hòmber tabata manda mensahe pa mi tur dia, i nos tur dos sa flirt ku otro. Pero ora mi a bis’é kiko mi ta sinti p’e, el a hari mi i bisa mi: ‘Aworakí mi no ke tin nada ku niun hende!’ Mi a yora masha hopi mes.”​—Tamara.

 E punto ta ku si bo ta pensa ku bo tin algu spesial ku un hende i bo haña sa ku e no ta sinti nada pa bo, ta normal pa bo rabia, sinti bèrgwensa i te asta sinti bo traishoná. Un hóben ku yama Steven ta bisa: “Ora e kos ei a pasa ku mi, mi a keda tur kibrá. El a hùrt mi hopi. A dura basta promé ku mi por a konfia un otro hende atrobe.”

 Ku mandamentu di mensahe i ret sosial ta hopi fásil pa bo pega emoshonalmente na un hende ku en realidat no tin interes romántiko den bo. Wak kiko algun hóben ta bisa.

 “Un hende por manda mensahe pa bo djis pa tene nan mes bezig, pero abo por kere ku ta interes e tin den bo. I si e ta manda mensahe pa bo tur dia, bo por yega na e konklushon robes ku bo ta spesial p’e.”​—Jennifer.

 “Un persona di bèrdat por ta interesá den kuminsá un relashon ku un otro, miéntras ku e otro persona ke djis un hende pa papia kuné, un hende pa lag’é sintié bon.”​—James.

 “Un simpel mensahe di ‘bonochi’ por parse romántiko, pero e por a ser mandá sin ningun sintimentu ètòl.”​—Hailey.

 “Un smiley por nifiká sea ‘Mi ta amabel’ òf ‘Mi ta flirt.’ Tin biaha e persona ku ta haña e mensahe ta asumí ku ta flirt esun ku a manda e mensahe ta flirt kuné.”​—Alicia.

 E punto ta, no kere ku atenshon ta meskos ku interes romántiko.

 Ta mas fásil pa bisa ku pa hasi, no? Bèrdat! Beibel ta bisa: “E kurason ta mas traishonero ku kualke otro kos i ta desesperá.” (Yeremías 17:9, Beibel Santu) E por pone ku bo ta traha un kastel di santu romántiko ku ta laba bai ora ku bo realisá ku ta den bo imaginashon so e ta eksistí.

•   Pensa lógiko. Para ketu i analisá e relashon. Puntra bo mes: “Mi tin bon motibu pa pensa ku e persona akí ta dunando mi un trato spesial?” No laga bo emoshonnan dominá bo “kapasidat di pensa,” esta, stroba bo di pensa ku klaridat.—Romanonan 12:1.

•   Purba di wak mas aleu. Di tur e señalnan ku ta laga bo kere ku boso ta mas ku amigu, paga mas tinu na e señalnan ku ta pone bo duda. No kere ku djis pasobra abo ta sinti un sierto manera pa un hende, e tambe ta sinti meskos pa bo.

•   Tene pasenshi. Te na ora ku e persona bisa bo bon kla ku e ke kuminsá date bo, no kore kere un kos pa otro pa despues bo keda mal desepshoná.

•   Sea franko. Beibel ta bisa ku tin “un tempu pa papia.” (Eklesiástes 3:7) Si bo ke sa si un mucha hòmber òf un mucha muhé ta mira bo pa mas ku djis un amigu, papia kuné. Un mucha muhé ku yama Valerie ta bisa: “Si e no ta sinti meskos pa bo, ta mihó bo sinti bo un poko tristu aworakí en bes di haña sa algun luna despues ku e no tabata interesá mes den bo.”

 E punto ta ku Proverbionan 4:23 ta bisa: “Protehá bo kurason.” Si bo gusta un hende, hasi sigur ku e tambe ta gusta bo. Si bo laga bo sintimentunan bira mas fuerte promé ku bo sa esei, ta manera kos ku bo ta trata na laga un mata krese riba un baranka.

 Si bo haña sa ku e persona tin sintimentu pa bo i si bo ta sufisiente madurá pa date, ta keda na abo pa disidí si bo ke kuminsá un relashon. Kòrda bon, un matrimonio fuerte ta konsistí di un hòmber i muhé ku tin e mesun metanan spiritual i ku ta habrí i franko ku otro. (1 Korintionan 7:39) Sin duda, nan a kuminsá komo bon amigu di otro i lo sigui asina tambe.​—Proverbionan 5:18.