•  Di bèrdat mi mester baha di peso?

•  Kon ta e mihó manera pa baha di peso?

•  Loke mi por hasi

•  Loke otro hóben ta bisa

 Algun hóben ta bisa ku nan ke baha di peso. Pero . . .

•   Hopi hóben ta mas preokupá ku nan aparensia en bes di nan salú. Algun di nan ku ke pèrdè peso lihé ta salta kuminda òf ta bebe píldora pa baha di peso. Pero por lo general, e métodonan akí no ta duna masha bon resultado i tin bes por ta asta peligroso.

   “Algun mucha muhé ta keda sin kome henter dia pa nan haña resultado rápido. Pero, esei no ta saludabel pa nan kurpa, i despues lo dura hopi tempu promé ku nan rekuperá.”—Hailey.

•   Hopi hóben no tin motibu pa ta preokupá ku nan peso. Nan peso ta bon—pero kisas nan ta pensa ku nan ta gordo pasobra nan ta kompará nan mes ku otro hóben ku ta mas delegá ku nan òf ku e figura “ideal” segun loke medionan di komunikashon ta promové.

   “Tempu mi tabatin 13 aña di edat, mi tabata kompará mi mes ku mi amiganan. Mi a pensa ku nan lo a gusta mi mas si mi tabatin mesun figura ku nan. Pero esei a nifiká ku mi mester a bira flaku manera skelèt.”—Paola.

 Di otro banda, tin algun hóben ku sí mester baha di peso. Di akuerdo ku un rapòrt di Organisashon Mundial di Salú . . .

•   Mundialmente, tin 340 mion mucha i hóben entre e edat di 5 pa 19 aña ku tin sobrepeso.

•   Na 1975 solamente 4 porshento di esnan entre 5 pa 19 aña tabatin sobrepeso. Na aña 2016, e sifra ei a subi te na 18 porshento.

•   Den mayoria di pais, ta masha komun pa hende tin sobrepeso, i no ta bou di peso.

•   Obesidat ta masha komun tambe den e paisnan pober, asta den e kasnan di famia kaminda algun miembro no ta kome bon.

 Kua método lo bo skohe?

1.   Salta kuminda.

2.   Hasi ehersisio i tin un dieta balansá.

3.   Bebe píldora pa baha di peso.

 E kontesta korekto: Método 2: Hasi ehersisio i tin un dieta balansá.

 Si bo keda sin kome nada òf keda sin kome for di sierto grupo di alimento, kisas lo bo baha lihé. Pero e métodonan ei no ta esnan di mas saludabel, i probablemente lo bo bolbe subi di peso ora bo kuminsá kome normal atrobe.

 Di otro banda, si bo pone komo bo meta pa kuida bo salú, lo bo tin bon aparensia i lo bo sinti bo bon. Dr. Michael Bradley a skirbi: “E manera di mas sigur, saludabel i ku lo duna bon resultado pa largu tempu ta . . . di kambia bo estilo di bida di tal manera ku bo por mantené e mesun kustumbernan ei pa restu di bo bida. a E punto ta: Si bo tin ku baha di peso, no ta nesesario pa sigui un dieta spesífiko. En bes di esei, bo por kambia bo estilo di bida.

 Beibel ta bisa nos pa ta “moderá den [nos] kustumbernan.” Esei ta konta pa nos kustumber di kome tambe. (1 Timoteo 3:11) Ademas, Beibel ta bisa spesífikamente pa evitá komementu di mas. (Proverbionan 23:20; Lukas 21:34) Ku e prinsipionan ei na mente, purba di hasi lo siguiente pa bo tin un estilo di bida mas saludabel:

•   Siña kiko kome saludabel ta enserá.

   Bo no tin nodi di bira un fanátiko, pero si bo sa un tiki tokante kiko ta bon nutrishon, esei por yuda bo mantené un dieta balansá pa un tempu largu. Pues, un dieta balansá ta e mihó método pa mantené bo peso bou di kontrol.

•   Hasi ehersisio regularmente.

   Pensa kiko bo por hasi durante dia pa keda den moveshon. Por ehèmpel, na lugá di usa left, hasi uso di trapi. Na lugá di hunga wega di vidio mei ora, usa e tempu ei pa bai kana pafó.

•   Remplasá junk food pa kuminda saludabel.

   Un hóben ku yama Sophia a bisa: “Mi ta purba di tin un snèk saludabel manera fruta òf bèrdura semper huntu ku mi. Esei ta yuda mi evitá di kome yen di kos ku no ta nutritivo.”

•   Kome slo.

   Tin hende ta kome asina purá ku nan no ta ni sinti ki ora nan stoma a yena! Pues, no kome purá. Tuma un pousa promé ku bo kue mas kuminda. E ora ei, kisas lo bo ripará ku bo no tin dje tantu hamber ei manera bo a pensa.

•   Kontrolá e kantidat di kaloria ku bo ta kome.

   Lesa riba e etikèt di un produkto pa bo sa kuantu kaloria e tin aden. Tep: Kos di bebe zut, fast food i kos dushi tin hopi kaloria den nan, i esei por hasi bo gordo.

•   Keda balansá.

   Sara, un hóben di 16 aña di edat a bisa: “Na dado momento, mi tabata asina opseshoná ku kontamentu di kaloria ku ki ora mi wak un plato di kuminda, ta sifra so mi tabata mira!” No bira un kontadó di kaloria. De bes en kuando, bo mag kome un kos dushi.

 Tep: Papia ku bo dòkter tokante bo preokupashon di sobrepeso. A base di loke ku e sa di bo kondishon i sirkunstansia, e por yuda bo traha un programa ku lo yuda bo mas mihó pa mehorá bo estilo di bida.